اِنت
نبشتہ کار: زاھد رزا
وانگ پہ ھر بنی آدم ءَ یک مزنیں دولتے پرچا کہ وانگ ءُ چیزے دربرگ بنی آدم ءِ زِند ءَ آسودگ ءُ وشھال کنت پمیشکا اِے دنیا ءِ توک ءَ وانگ پہ ھر مردم ءَ الّمی اِنت۔ بزانکہ مئے وانگ پہ ما ھر کارے ءِ آسانی ءَ کنت۔ اگاں ما مہ وان این ءُ مہ زان ایں گُڑا ما وتی زند ءَ چون گوازین ایں؟ پرچا کہ بے وانگ ءَ مارا دنیا ءُ راج ءِ ھچ سرپدی نہ بیت۔ اِے وھد ءَ دْراھیں کار بے وانگ ءَ نہ بنت، وانگ انسان ءِ چمّ ءُ دل اِنت ھمے واست ءَ ھرچ انسان ءِ سر ءَ وانگ زانگ ءُ چیزے دربرگ الّمی اِنت۔
وھدیکہ تو ھر جاگہ ءَ رو ئے گڑا تئی زانت، تئی اَلم ھر کُجا ھمراہ اِنت تو ھچ بر لاچار نہ بَہ ئے اگاں تو وانگ نہ زان ئے تو دگہ در ملک ءَ شُت نہ کن ئے۔ وانگ مئے سَیمی چمّ اِنت پمیشکا اگاں ما مہ وان ایں گُڑا ما گوں کُوراں ھساب ایں۔ وانگ ھما چیز اِنت کہ ایش ءَ کَس دُز اِت ءُ بْرت کُت نہ کنت چیاکہ اِے تئی ھنر اِنت۔ گِند ئے تئی زر ءَ مال ءُ ماڑی، تئی ءُ دِگہ آسراتی ءُ میراس چہ ترا برگ بنت بلے تئی زانت برگ نہ بیت۔
اے تئی سرجم زند ءِ ھمسپر انت۔ تو ایشی ءَ ھر کُج ءَ کارمرز کن ئے۔ اگاں تو نہ وان ئے گڑا دیمتر ءَ تو باز بژن ءُ اپسوز کن ئے۔ تو دگہ ملک ءُ جاگہ ھم شت نہ کن ئے۔ اے وھد ءَ مردم انگلیش ءَ باز ھبر کنت۔ باید اِنت ما انگلیش ءِ ھمراھی ءَ وتی جِند ءِ راجی زبان ءَ ھم بہ وان ایں۔ گُلامی ءَ پِٹ بات کہ بلوچی ماں وانگجاھاں وانینگ نہ بیت گُڑا باید اِنت ما موبائلاں وتی بلوچی کتاب پھم ایں ءُ ھر روچ بلوچی دَرونت ءُ زبان دوستی نبشتانکاں وانان ءَ وتی بلوچی وانگ ءُ راست نبیسّی ءَ ھم ھیل بہ کن ایں۔ گِند ئے نودربر چہ درونتانی وانگ ءَ ھیل کن اَنت بلے مئے راج بلوچی درونتاں ھچ دلگوش نہ کن اَنت پد ءَ گْوش اَنت کہ بلوچی وانگ ءُ نبشتہ گِران اِنت۔
باید اِنت ما اِے وڑیں مردماں بزان ایں کہ بلوچی زبان ءِ ھلاپ ءَ دْروگیں پوتاری کن اَنت۔ باید اِنت ما بلوچی بہ وان ایں کہ مئے راج ءِ تہ ءَ راجدوستی ودی بہ بیت۔ ما بوان ایں داں کہ ما وتی ھک ءَ بہ زان ایں ءُ راست ءُ دْروگ ءَ سرپد بَہ ایں کہ مئے زندگی چتور گوزگ ءَ انت۔
گِند ئے مرچاں باز گریبیں مردم ھست۔ آ وتی زھگاں وانینت کُت نہ کن اَنت۔ ھمے زھگ وتی زند ءَ پہ واری گْوازین اَنت پد ءَ بلوچ راج ءِ ھمے پدریچ بے وانگی ھچ سرپد نہ بیت پمیشکا باید اِنت ما یکتوار ءُ یکمُشت بَہ ایں کہ وانگ ءُ زانگ ءِ ھک ھرکَس ءَ بہ رس ایت۔
شالا بلوچ راج وت ماں وت تپاک ءُ یکمُشت بات۔ بلوچی ءُ بلوچ راج شالا دیمروی بہ کنات۔
