گْوھار: مرچی سال ءِ گُڈ سر اِنت۔
برات: بْگُش منی لاڑوکیں گْوھار تو چی گوشگ لوٹ ئے؟
گْوھار: من ءَ جُستے ھست، دیر اِنت منی دِل ءَ بیتگ کہ ترا جُست بہ کن آں بلے مرچی سال ءِ گڈ سر اِنت ءُ من سک گَل آں کہ من اے سال ءِ درگت ءَ وتی لوگ ءَ یک کسانیں مراگِشے اڈ بِہ دے آں۔ بلے تو مرچی چہ درانڈیھ ءَ آتکگ ئے اے ھم سکیں وشیں ھبرے گوں تئی آیگ ءُ نوکیں سال ءِ بُنگیج بوگ پہ من وشبتی یے، من اے ھم جیڑ اتگ من ھُمک سال ءِ گڈسر ءَ وت ءَ گوں اِے وشیاں ھوار بِہ کن آں لوگ ءِ توک ءَ چاپ ءُ نازینک ءُ نوکیں پُچ ءُ پوشاک وتی وست بہ کن آ پرچا کہ مُلک ءِ ھُمک مردم اے وشیانی درگت ءَ ءُ نوکیں سال ءِ ولکم کنگ ءَ وڑ وڑیں وشیانی تہ ءَ وت ءَ ھوار کن اَنت بلے ما بلوچ وت ءَ انچوں بے سما کُتگ اے وڑیں وشی ڈلچار کُتگ۔
برات: تئی گپ رد نہ اَنت، من تئی مستریں برات آں، منی ھم دِل لوٹ ایت کہ وتی لاڈکیں گْوھار ءَ پہ زند ءِ دراھیں وشی ندر بہ کتیں بلے!
گْوھار::بلے چے یے؟
بْرات: منی گپے مکسد ایش اِنت پہ بلوچ ءُ بلوچی ءَ وشی نیست۔ انی اد ءَ یک جُستے ھم چِست بیت وشی پرچا نیست؟ منی ھیال ءَ ما کُل سرپد ایں کہ بلوچ گُلام اِنت۔گْوھار: زاناں گلامی چی یے ؟ زاناں ما گُلام نہ ایں؟ گلامی ھمائی گُش اَنت کہ آئی ءِ زند ءِ بستار ھم پُلگ بیت بلے اد ءَ ھُمک بلوچ ءِ زند ءِ تہ ءَ اے آسراتی ھست اَنت کہ وتی زند ءَ یک شریں وڑے ءَ دیم ءَ بُرت بہ کنت گڑا آ کُجام گلامی اِنت کہ بلوچاں وتی پاد پہ وشیاں داشتگ اَنت۔
بْرات: آ مجگی گلامی اِنت، چوناھا اگاں یک زورگرے یک راجے ءِ سر ءَ کبزہ کنت گُڑا آئی ءِ مستریں مول ءُ مراد لوٹ ماری ءُ لگتمالی اِنت بلے اے اد ءَ ھم لھتیں جُستانک دیم ءَ کیت، ھرچ راجے کہ دُگنیا ءِ سر ءَ ھستی(وجود) دار ایت ھما راجانی سر آ گلامی کنگ بوتگ اَنت گڑا آیاں گھگیری ءِ وست ءَ دست ھم چِست کُتگ بلے ھمے گھگیری کہ گلامیں راج کن اَنت گڑا آ شور جوڑ کن اَنت بزانکہ ترا گوں لھتیں آسراتیاں بندوک کنت ترا انچوں مجگی نِزور کنت کہ تئی جیڑگی سرجم ءَ ھلاس بیت کہ تو وتی گلامی ءِ جند ءَ سرپد مہ بَہ ئے۔ ما ھما مجگی گلام ایں۔ ما ھما وھد ءَ وت ءَ گلام سرپد بَہ ایں وھدیکہ ما وان ایں وتی تہ ءَ راجی زُرمبشے ودی کن ایں۔ سیاسی رِد ءَ وتی تہ ءَ سنچ جوڑ کنگ پرچا کہ سیاست ھما راہ اِنت کہ آ چاگرد ءَ راستی ءِ نیمگ ءَ بارت، ھما رھشون ءِ پلہ مرزی کنگ بہ بیت ھما ترا تئی راج ءُ زبان ءِ رکینگ ءِ وست ءَ گوں تو ھوار بہ بیت تئی زبان دیمروی بہ کنت پرچا کہ زُبان راج ءِ چیدگ اِنت۔
گْوھار: بْرات منی لھتیں جُست ھست اَنت۔
بْرات: بگُش اگاں تو سرپد نہ بوت ئے۔
گْوھار: تو سیاست، رھشون ءُ زبان ءِ سر ءَ انچوں باز گپّ کُتگ اَت بلے منی ھیال ءَ اے دُرس بوگ ءَ اَنت۔
بْرات: منی پسہ چوں اے وڑ ءَ اِنت کہ ھما سیاست مرچی آئی ءِ پشت ءَ بلوچی ءِ نسل کُشی بوگ ءَ اِنت ھما زبان مرچی مئے وانگجاہ ءِ توک وانینگ نہ بوگ ءَ اِنت ھما رھشون مرچی بلوچ ءِ سُستکگیں لوگانی ماندارگ ءَ دست اِش ھوار اَنت، منی گْوھار، منی رھشون ھما اَنت کہ آیاں مُدام بلوچ ءِ وبادگاں ھمے سرپد کنگ ءِ جُھد کُتگ کہ راج گلام اِنت، آ گڑا ڈکٹر منان ءِ دْروشم بہ بیت یاکہ چیرمین گلام مھمد دگہ ھما بہ بنت کہ آیاں وتی سر پہ گلازمین ءَ ندر کُتگ انچوں کہ مئے بانکیں رھشون کریمہ یک شریں درورے دنت ءُ گْش ایت بلوچ ءَ بلوچی زُبان بلوچ کنت۔ اگاں زبان ھست راج مان ایت۔ بلے مرچی مئے وانگجاھاں ریاستی داتگیں زُبان وانینگ بوگ ءَ اِنت مئے بلوچی ءِ زِگریں گال گار ءُ بیگواہ اَنت۔ زورگر ءِ داتگ ھمے اردو مرچی لوگ لوگ ءَ کارمز بوگ ءَ اِنت، دیم ءَ تو وت شر سرپد ئے، منی ھیال ءَ مئے ھند ءُ دمگ ءَ مدام یک ناشناسیں لاشے دست کپ ایت ھُمک روچ ءَ مئے کسان سالیں بچ بہ بنت یاکہ کلمکار ءُ نودربر بہ بنت کہ آ چِست کنگ بنت باز گوں اے گھیگری ءِ بارورد ءَ آجو بنت ءُ لھتیں مات ءُ بانُکیں گْوھار وتی براتانی وھدار ءَ کِشکانی نیمگ ءَ وپتگ ءُ ودار ءَ اَنت باریں مردمانی ژنگولیں لاش دست کپ ایت؟ منی گْوھار اے دْراہ گلامی ءِ سانمند اَنت باریں مردم انچوں تنگ دست بیت ءُ وتکُشی ھم کنت۔ تو وَ گپے ءَ سرپد ئے، مئے تہ ءَ وشی نیست، انچوں سما بیت ما توک ءَ پُرشتگ ایں اگاں آسراتی ھست گڑا آ ھم مارگ یک دروشمے۔
گْوھار: منی برات من ءَ بکش من نہ زانتگ، ھو ما گلام ایں۔
بْرات: کُربان باتاں تئی سر ءَ منی کامریڈیں بانُک، ترا من کامریڈ ءِ نام ءَ گوانک جن آں۔ گْش چی ءَ پرچا کہ کامریڈ ھما مردم ءَ گْش اَنت آ وتی گلامی ءُ راجی وتواجهی ءِ بابت ءَ سرپدی دار ایت ءُ ھمے سرپدی ءَ دنت کہ مئے راج ءِ سر ءَ چی بوگ ءَ اِنت ھمے سرپدی ءَ وتی راج ءِ کُلیں مردماں سرپد کنت ءُ گْش ایت گلامیں راج ءَ بستار نیست ءُ ھر وڑ ءَ ایرجیگ کنگ بیت۔ گاں گلامیں زند ءِ باھوٹ بوگ ءَ نہ لوٹ اِت۔ گُڑا کُربانی لوٹ ایت ءُ ھما کُربانی راج ءِ یکجاہ کنگ گھگیری ءِ رھبند دربرگی اِنت۔ منی گْوھار من اُمیت کن آں تو اے کُلیں سرپدیاں وتی راج ءَ سر کن ئے۔ سلامت بات ئے منی کامریڈیں بانُک۔
گْوھار: تو ھم سلامت بات ئے منی رھشونیں برات۔
