نبشتہ کار: ڈاکٹر بلوچ
زبان ءِ جیڑہ چہ بلوچ راج ءِ مستریں جیڑھاں یکے، اے تھنا مردمے ءِ ، لوگے ءِ ، ھاندان ءُ زاتے ءِ جیڑہ نہ اِنت بلکیں اے سرجمیں بلوچ راج ءِ جیڑہ اِنت۔ ایشی ءِ سر ءَ نندگ ءُ باوست کنگ لوٹ اِیت بلے من ءَ ھم لھتیں گپ ءُ تران ھمے جیڑہ ءِ سر ءَ کنگی اِنت ءُ بازیں جستے ھم جست کنگ بوتگ کہ ما کئی راھبنداں بزور ایں؟ کئی رندگیری ءَ بہ کن ایں ؟چہ رومن ءُ اربی ءَ کجام نبشتھی سیاھگ ءَ بزور ایں؟ زانتکارانی ھیال؟ براھوئی گپ جنوکانی جیڑہ ھم دگر اَنت۔ بیا اِت اے دراھیں جیڑھانی سر ءَ یک پہ یک ءَ چمشانکے دے ایں۔
رھبند ءِ جیڑہ:
وھدیکہ گپ بلوچی زبان ءِ راھبندانی سر ءَ کیت گڑا مئے دپ ءَ سید ءِ رھبند کیت اے نوں جتائیں گپے کسے سید ءِ رھبندان ءَ منّ اِیت یا منّ اِیت، بلے آئی ءِ کر ءَ منگ ءُ نہ منگ ءِ سوب لازم بوگی اِنت۔ اے ھک ھرکس ءَ ھست آ سید ءِ رھبندانی سر ءَ جست ءُ پرس بہ کنت بلے اے ھم شریں گپے نہ اِنت وھدیکہ تو وت پٹ ءُ پول نہ کرت ءُ نہ ونت انچو جست گپت پسو رسگ ءَ پد ھم ھمے گپ ایر کرت مھلوک نہ منّ اِیت ئِے بلے من ھم نہ منّ آن ئِے گڑا اد ءَ تو وت رد ئے ترا مھلوک چارگی نہ اِنت پرچی ءَ ھر انسان ءِ ھیال یک وڑ نہ اِنت ءُ اے ھم ھژدری اِنت ھر یکے گوں تو تپاک بہ کنت یا گوں ھریکے ءَ تو تپاک بہ کن ئے؟ نوں اِد ءَ اے جست چست بیت ما چون زبان ءِ سر ءَ پٹ ءُ پول بہ کن ایں؟
پٹ ءُ پول ءِ واست ءَ ھژدری اِنت تو دری زبان ءِ دراھیں کتاباں بوان انا اے وڑ نہ اِنت اگاں تو گیشتر پٹ ءُ پول کن ئے آدگہ گپے بلے ترا ھمنچو پٹ ءُ پول کنگی اِنت کہ تو بزان ئے وتی کجام رھبند تچک ءُ راست انت انچو ما اِشکت ھمنچو اِلم دربرگی اِنت کہ تو ھلال ءُ ھرام ءَ بزان ئے مارا ھم ھمے رنگ ءَ پٹ ءُ پول کنگی اِنت تانکہ ما رد مہ ور این ءُ دلپروش مہ بہ ایں بزانکہ بندات ترا بلوچی زبان ءِ درونت وانگ ءُ زانگی اَنت ترا اے سرپد بوگی اِنت کئی نبیس اِتگیں درونت تچک ءُ راست اَنت ءُ سید ءِ نبیس اِتگیں کتاب بلوچی سیاھگ ءِ راست نبیسگ ءِ وانگ ھم ھژدری اِنت پرچی واجہ سید زھور شاہ ھاشمی ءَ بازیں پٹ ءُ پولے ءَ پد نبیس اِتگ بازجوانین کتابے ترا کمک کنت۔ پٹ ءُ پول ءَ پد ترا ھرکسی رھبند وشتر ءُ آسان لگ اِتگ اَنت ھما رھبنداں بزور_
رومن یا اربی؟
زبان ءِ دیم نہ روگ ءِ مستریں سبب یکے ھمیش اِنت مردم نہ زانت کجام رنگ ءَ بلوچی ءَ نبشتہ کن اَنت اے جیڑہ ءِ بارو ءَ مارا وتی کر ءُ کش ءَ چارگ لوٹ ایت کجام رنگ بلوچی وانگ ءُ وانینگ ءُ پٹ ءُ پول کنگ بوگ ءَ اِنت ایشی ءِ سرپد بوگ ءَ مارا پیسر ءَ روکپتی بلوچستان چارگ لوٹ اِیت اِد ءَ بلوچ راج گوں مزنین آبادی ءَ نشتگ مارا اے چارگ لوٹ اِیت اِد ءَ وانگجاھان ءَ کجام رنگ ءَ وانینگ بوگ ءَ اِنت بندات ءَ ما بچار ایں اِد ءَ بلوچی وانینگ نہ بوگ ءَ اِنت بلے لھتیں جاھاں اربی رنگ ءَ کتاب شنگ بوگ ءَ اِنت ءُ چکاس گرگ بوگ ءَ اِنت سرکار ءِ نیمگ ءَ چہ چاپ بوتگیں کتاب چہ اولی تبک ءَ بگر تا پنچمی تبک ءَ گوں اربی ءِ رنگ ءَ چاپ بوتگ اَنت ءُ وانگجاھاں وانینگ ءِ ھاتر ءَ دیگ بوتگ اَنت ھاں بلے اے کتاب گوں سید ءِ رھبنداں نبشتہ نہ اَنت دومی چہ نھمی تبک بگر تا چاردہ تبک ءَ گوں اربی ءِ رنگ ءَ نبسیگ ءُ وانینگ بوگ اَنت البت پاکستان ءِ مستریں چکاس بزانکہ سی ایس ایس ءَ ھم بلوچی گوں اربی ءَ نبیسگ بوگ ءَ اِنت۔
ما روکپتی بلوچستان ءَ بچار ایں اَود ءَ ھم ھمے وڑ ءَ نیکراھی ءُ سرکاری وانگجاھاں پارسی وانگ بوگ ءَ اِنت کسے کہ پارسی ونت کنت آئی ءِ واست ءَ بلوچی ءِ وانگ آسان بیت ھمے رنگ ءَ ما اوگانستان بزانکہ گوریچانی بلوچستان ءَ بچار ایں اَود ءَ ھم بلوچی گوں اربی رنگ ءَ وانینگ بوگ ءَ اِنت۔ اگاں کسے ءَ اربی ءُ پارسی ونتگ آئی ءِ واست ءَ بلوچی وانگ سک آسان بیت۔
رسانکدر
اگاں ما انیگیں جاور ءَ بزانکہ نوکیں آسراتیانی نیمگ ءَ بچار ایں مارا گندگ ءَ کیت کجام پیم ءَ بلوچی ءِ سر ءَ گیشتر کار بوگ ءَ اِنت وھدیکہ گپ رسانکدر ءِ بیت مئے چم بہ بلوچی زرمبش ءَ کپ اَنت اولی بلوچی زبان ءِ مستریں چینل اِنت ءُ آئی راہ داتگیں گوں اربی ءِ رنگ ءَ اَنت ھمے رنگ آدگہ چینل ھم ھمے وڑ ءَ اِنت بلے لھتیں سیاھگی نزوری اَنت ۔دومی وٹس ایپ ءِ گپ بہ بیت مروچاں ھر زبان جھدکارے ءَ سے سے ءُ چارچار دیوان گون اِنت شریں رنگے ءَ کار کنگ ءَ اَنت انچونکہ ابدلستار بگٹی ، ایم شکاری ، زیا بلوچ گل بلوچ ، ڈاکٹر لاشاری ، ءُ دگہ
رومن آب
نو ما رومن آب ءِ نیمگ ءَ رو این ءُ چار ایں بندات ءَ من ھمے گوشگ لوٹ آں ھرکسے ءَ کہ زبان ءِ سر ءَ پٹ ءُ پول کت آ سید ءِ رھبنداں منّ اِیت ئِے لھتیں جھدکار ھست ھمے گوش اَنت کہ بلوچی گوں رومن ءَ تچک اِنت ءُ چہ ایردستی ءَ ساری جھد گوں رومن ءَ بوتگ بلے بوت کنت دومی نیمگ ءَ سید زھورشاہ ھاشمی نبیس اِتگیں کتاب ءِ تہ ءَ ھمے نبیس اِتگ کسے ءَ رومن ءِ سر ءَ کار بہ کتیں بازیں جوان اَت بلے آئی ءَ وت جھد نہ کتگ۔انیگیں وھد ءَ رومن ءِ سر ءَ کار نہ بوگ ءِ برابر اِنت بزانکہ گیشتِر مھلوک گوں اربی رنگ ءَ دلگوش اِنت۔
ما رودراتکی بلوچستان ءَ بچار ایں اِد ءَ لھتیں جاہ ھست اَود ءَ بلوچی وانگ وانینگ نہ بوگ ءَ اِنت بلے انگلیش وانینگ بوگ ءَ اِنت انچونکہ تُربَت، گوادر ،شال، مستونگ،ھژدار ءُ دگہ جاہ یک ءُ بوت کنت اے جاہ ءِ نندوکیں نودربرانی واست ءَ بلوچی گوں رومن ءَ آسان بہ بنت دو وانگجاہ دست ّکپ اِیت ءُ دومی ما روکپتی بلوچستان ءِ نیمگ ءَ بچار ایں اَود ءَ ناں رومن وانینگ بیت ناں ھم انگلیش وانینگ بوگ ءَ اِنت من وھدیکہ زبان دوستیں سنگتے ءَ جست گپت واجہ شمئے کر ءَ مھلوک ءِ چے ھیال اِنت؟ آئی ءَ من ءَ پسو دات اے رومن ءِ ھیال شمئے کر ءَ ھست مئے نیمگ ءَ ھمیشی نام ھم نیست ۔ ما اگاں اوگانستان ءِ نیمگ ءَ بچار ایں اَود ءَ رومن وانینَگ بوگ ءَ نہ اِنت
سیمی ما رسانکدر ءُ آسرایاتی ءَ بچار ایں گڑا مارا رومن ءِ رنگ ءَ نبیس اِتگیں کمپوٹر ، گوانکو، لیپ ٹاپ ءُ دگہ گندگ ءَ کیت۔ انیگیں وھد ءَ چشیں ھم زبان زانتے نیست کہ آ رومن ءِ سر ءَ کار ءَ اِنت یک زبان ءِ جھدکار ڈاکٹر ناگمان ھست رومن ءِ بارہ مھلوک ءَ سرپدی دیگ ءَ اِنت لھتیں روچ پیسر آئی ءَ یک تامرے شنگ کتگ اَت کہ بلوچی زانتکار ءُ ندکارانی بارو ءَ گپ جنگ ءَ ات بلے مھلوک ناگمان ءِ جتگیں گپ ءُ پنتاں دلگوش نہ کنگ ءَ اِنت پرچی ءَ کہ ناگمان ءِ جند انگت وت اربی رنگ ءَ نبیسگ یل نہ داتگ آئی نبشتہ کتگیں کتاب ءُ کلو ھم اربی ءِ رنگ ءَ اَنت بزانکہ آ انگہ سوبین نہ اِنت ناں ھم اے جاور ءِ بوگ ءِ موہ رس اِیت۔
براھوئی گپ جنوک
ھما بلوچ کہ براھوئی گپ جن اَنت آئی ءِ نبیسگ ءِ دروشم اربی رنگ ءَ ِانت دریگتیں ما بلوچی رومن ءَ نبشتہ بہ کنیں گڑا آیان ءَ ھم رومن زورگی بیت پرچی ءَ یک راج ءِ دو زبان ءِ نبیسگ جتا جتا بیت وش نہ اِنت ءُ ما یک ءُ دومی ءِ زبان ءِ دربرگ ءِ واست ءَ مارا ھر دوئیں دورشم وتی کنگی بیت چہ اڑ ءُ جیڑہ ءَ جوانتر ھمیش اِنت ما یک رنگے ءَ نبشتہ بہ کنیں۔
یات بہ کن اِت من زبان زانتیں نیاں تھنا وتی ھیال ءُ لیکہ درشان کتگ، بوت کنت من رد بہ باں ءُ کسے گوں من ءَ تپاک مہ کن۔
