نبشتہ کار: بابل لتیپ
بی این ایم ءِ راجی لوٹ چو روچ ءَ سھرا اِنت، ھمے راجی لوٹ ءِ پد ءَ بی این ایم ءَ وتی رھشُونیں سر ءُ تنگوئیں کیڈرانی دیمونی داتگ کہ منی چیردستیں سرڈگار چہ زورگِر ءِ پنجگاں آجو ءُ منی راج وتی گُلزمین ءِ وتواجہ بہ بیت۔ ھمے وتواجھی ءِ جُھد ءَ بی این ایم گُلائیش ءُ دیم ءَ جُنزان اِنت، جزماں سوب مئے بیت۔
آ راج کہ دیمونی ءِ دِیدانک ءَ وتی زندمان بہ لیک اِیت آ راج ءَ جھان ءِ ھِچ زوراک ءُ توانمند پْروش دات نہ کنت، بلوچ راج ھمے لیکہ ءِ رِد ءَ دیمونی دیان ءُ دیم پہ وتی منزل ءِ پاند ءَ جُنزگ اِنت۔
بی این ایم ءَ وتی راج اے سِتک ءُ باور داتگ کہ منی مکسد راجی آجوئی اِنت ، اگاں اے راہ ءَ چونیں شرتگ ءُ جنجالے بئیت چہ راجی آجوئی ءِ جُھد ءَ کدی دزکش نہ باں۔
آ کہ پاکستان ءِ پارلیمنٹ ءَ نشتگ ءُ بوٹانی لگتمالیں کانود ءِ منّوگِر اَنت ، آ ھجبر بلوچ ءِ دوست ءُ دوزواہ نہ بہ اَنت۔ پمیشکا اے بلوچ پُسّگ ءِ بستار ءَ مئے راجی زمہ واری بیت کہ ما وتی راجی آجوئی ءِ زْرمبشت ءَ گوں ھمگْرنچ ءُ آئی مُھکم کنگ ءِ واستا ھِچ وڑ ءَ چک ءُ پد مہ بہ اِیں۔
آیاں کہ تھنا اوگام جتگ ءُ سارتیں ماڑی ءِ واب دیستگ ، آ وتی نامانی دیم ءَ راجدوست نبیسّگ ءِ بدل ءَ دوتل ءُ دوپوست نبشتہ بہ کن اَنت۔ برے گوں زورگِر ءَ ھمدست ءُ بلوچ ءِ چُکچینی ءَ گُلائیش اَنت ، برے چو سِستگیں ٹولی ءَ زورگِر ءَ وشّان ءُ وتی کچکول ءِ پُر کنگ ءَ ماں بیجنگ ءَ چین ءِ دلاسہ دَیگ ءَ دِرک اَنت ، بلے گْوستانک کس ءَ نہ بکش اِیت۔
بلکیں! گْوستانک ھما آدینک اِنت کہ ھر شِرّ ءُ شَرّ ءِ کِرد ءُ کارپد ءَ سھرا ءُ وتی ڈوبر ءَ پہ آیوکیں پدریچ ءِ واستا ساٹ اِیت ، گُڑا اے گوں ھرکسی جِند ءَ بندوک اِنت کہ وت ءَ چو گُلام مھمد ، لالا منیر ءُ ڈاکٹر منّان ءُ ایدگہ شھیدیں سرانی دْروشم ءَ نبشتہ کنت یا کہ چو ائیدو ءُ مُلّا ھسن ءَ۔
آیانی دل ءُ مجگاں لب ءُ ملاماں کہ جاگہ کُتگ ، گُڑا بامرد ءُ باجبر بوَگ ءِ بدل ءَ پہ وت لگور ءُ راجدْروھیں ائیدو ءُ مُلّا ھسن ءِ نام ءَ شات کن اَنت ، پہ آیاں واجہ گلام مھمد ءُ آئی شھیدیں سنگتانی نام گْرانیں بارے بیت کہ گامے جُنز اِت نہ کن اَنت۔
بلے! بی این ایم ءِ ھر باسک ءَ اے نام پہ وت شات کُتگ ءُ ھما لیکہ ءِ پُژدر ءَ وتی راجی ڈُبّہ ءُ زمہ واریاں پیلو کنان دانکہ مُرادانی آجوئیں منزل ءَ سر بہ بہ اَنت۔
ھمے واستا بی این ایم مئے اُوست ءُ اُمیت ءِ رُوژنائیں چیدگ اِنت ، پہ اے گُلبوئیں چیدگ ءُ سُرکم ءِ پھریزگ ءَ سرانی مُلّ ھِچّ وڑیں نِھادے نہ کرز اِیت۔ چی ءَ کہ بی این ایم ءِ لوٹ چیردستیں راج ءِ آجوئی اِنت ، پہ راج ءِ ھاتِر ءَ رھشُونیں گُلام مھمد ، ڈاکٹر منّان ءُ لال منیریں سرانی دیمونی دَیگ مئے تاوان نہ پھر ءُ شان اِنت۔ ھمے داتگیں دیمونیانی برورد اِنت کہ بی این ایم اے پدانک ءَ سر ءُ بلوچ راج ءِ مُھکمیں توار جوڑ بوتگ۔
مروچی زورگِر بی این ایم ءِ نام ءَ پرے واستا آسی ءُ آئی رھشُون ءُ کیڈر شھید کُرتگ اَنت کہ آیاں راجی آجوئی ءِ کلوہ بلوچ ءِ کُڈُک ءُ گدان ، ھلک ءُ میتگ ، دشت ءُ کوچگاں سر کُرتگ ءُ سما ، سسّا ءُ پِگر ءِ کندیل گوں ھوناں بال اِتگ کہ مارا پہ وتی تھاردیمگیں آکبت ءِ سینگارگ ءَ چونیں کہ دیمونی یے دَیگ کپت چک ءُ پد مہ بہ اِیں۔
اے ھبر بی این ایم ءَ گوں وتی راجدوستی ءِ لیکہ ، گْواچنیں مول ءَ مکسد ءِ منّانکاں پیشداشتگ کہ واجہ گُلام مھمد زندانی ءُ آئی تیر سُپتگیں جون گوں سنگتاں پرچا ماں مُرگاپ ءِ سْیاہ ڈنیں ڈل ءَ چگل دَیگ بیت؟ لالا منیر ءِ ڈوبر پرچا گوں تیراں دوچگ ءُ ھوناں میچل کنگ بیت؟ ، ڈاکٹریں منّان ءِ شھید کنگ ءَ پرچا مستونگ کلی دتو ءِ ھند ءُ میتگ چاریں آتراپاں زورگِریں لشکر ءِ انگرّاں بیت؟ ، سمد تگرانی ، ھاجی رزاک ، رزاک گُل ، ماسٹر بیت اللہ ، امداد بُجیر ، سلیمان ، اُستاد الی جان ءُ ایدگہ بیل ءُ ھمبلاں پرچا شھید کنت؟
پرچا کہ بی این ایم ءَ گوں وتی تچکیں دانکاں اے جار پِرّینتگ کہ من تئی بے پدانکیں ریاست ءِ ھستمان ءَ نہ منّاں ءُ تو پہ زور منی ڈگار گِپتگ ءُ مارا گُلام داشتگ۔ ما ھمے گُلامی ءِ سانکلانی سِندگ ءَ سرانی دیمونی دے اِیں ، بلے تئی چیردستی ءَ کدی نہ منّیں ءُ سر ءَ جھل نہ کنیں۔ ھمے منّانکاں بی این ایم ءَ را راج ءِ دل ءَ جتائیں شرپے ءِ واھُند کُتگ ءُ راج ءِ مُھکمیں توار اِنت ، پمیشکا بی این ایم وتی راج ءَ اے گپّ ءَ ھر ساھت ءُ دمان گْوش اِیت کہ پاکستان ءِ وتگڑیں پارلیمنٹ ءُ پَوجی بوٹاں گوں لپاشتگیں کانود مئے درد ءِ درمان نہ اِنت ، بلکیں مئے درد ءِ درمان ءُ اشکام آجوئی اِنت۔ پہ آجوئی ءِ دزگِرگ ءَ بلوچ راج ءِ ھر زھگ ءَ را وتی ونڈ ءُ بھر دَیگی اِنت دانکہ ما باندا چر اے سیاہ ءُ پوچیں زندمان ءَ در بہ کپ اِیں ءُ وتی ڈگار ءِ وتواجہ ءُ واھُند بہ بہ اِیں۔ اے کُل گوں وتگڑیں پاکستان ءِ پارلیمنٹ ءُ آئی لپاشگیں کانود ءَ نہ ، بلکیں گوں آجوئی ءِ جُھد ءَ ھمگْرنچ اَنت۔ پمیشکا مارا وتی زمہ واری زانگی ءُ راجی زْرمبشت مُھکم کنگی اِنت ، پرچا کہ اے جُھد ءَ گوں مئے مُجّتی ئیں زندمان ءُ راجی ھستمان پیوند اِنت۔
اگاں ما نِند اِیں ءُ دومی راجانی درور ءَ دے اِیں ، گُڑا پرچا وت ھمے درور نہ بہ اِیں؟ اگاں ما وت ءَ پہ دومی راجاں یک درورے ءِ چمّاں چارگ لوٹ اِیں گُڑا مارا راجی آجوئی ءِ موکگ ءَ پہ ھر وڑیں دیمونی ءَ دَیگ ءَ چاڑِکّہ ءُ ساجو بوَگی اِنت۔ جزماں سوب مئیگ ءُ پْروش بدواہ ءِ دپتر ءَ نبشتگ بیت۔
