نبشتہ کار: چراگ بلوچ
سلام ءُ دروت ھمبل!
من اُمیت کن آں کہ تو وش ءُسلامت ئے۔ھداوند ترا وش ءُ سلامت بہ کنت مدام وش ءُ سلامت بات ئے۔
ھمبل تو گپے زان ئے؟کہ تئی روگ ءَ چہ پد من سک تھنا آں ءُ ملوراں من وھدے ایوک ءُ ابیتک با گڑا پہ ترا جیڑاں کہ تو چون ئے ءُ باریں کجا ئے ءُ چی کنگ ءَ ئے۔
من مدام بس تئی یاتانی تہ ءَ آں۔چَہ تئی روگ ءَ من تراچی بہ گُش آں۔من سک ایوک آں، تو مارا یل دات شُت ئے بلے من ترا انگت دل ءَ نہ بُرتگ۔
من مدام ترا گیر کار آں، پہ ترا جیڑاں چہ تئی روگ ءَ رند اے میتگ گُش ئے سک ابیتک اِنت، گُش ئے زاناں تھاری ءَ مانشانتگ، چہ تئی روگ ءَ پد اے میتگ ھچ وش نہ اِنت، بس ھر نیمگ ءَ تھار ءُ مُج اِنت۔ھر نیمگ ءَ ابیتکی اِنت، ھر نیمگ ءَ تھنائی اِنت، ترا یات بیت تو شال ءَ اَت ئے۔تو مدام گوں من ءَ ھال ءُ اھوال کُت، تو مدام من ءَ یات کُت، تو سکیں مھروانے ئے۔
تو چِد ءَ چے درکپت ءُ مارا تھنا کُت بلے تئی داتگیں مھر من ءَ مدام یات اَنت۔ترا گوں وتی زبان ءَ ھم سک مھر اَت، من ءَ یات اِنت تو یک دیوانے ءِ کارمستر اِت ئے ءُ نودربراں بلوچی وانینگ ءَ ات ئے۔من ھمے دیوان ءَ ھوار اِت آں، باز شوک اَت، بازیں نودربراں ھمے دیوان ءَ چہ بازیں چیزّے دربرت ۔من چہ ھمے دیوان ءَ باز دربرت ءُ بلوچی وانگ ءُ نبشتہ کنگ ھیل کُت۔کہ مرچی پہ ترا یک نمدی یے نبشتہ کنگ آں، من یک روچے ترا گُشت وتی اکسے روان بہ دے باریں تو چون ئے، دیر اِنت کہ من ترا نہ دیستگ، تو یک اکسے روان دات من چار اِت ءُ گُشت کک تو چُش ئے تو کند اِت ءُ گُشت کہ اے انوگیں اکسے نہ اِنت، اے وھد ءَ من شوانگے بوتگاں،من گُشت کہ انیگیں اکسےدیم دے تو گڑا اکسے روان دات من چار اِت تو سک شوک اِت ئے۔
من وھدے تئی اکس ءَ چاراں گڑا من ءَ تو سک گیر کائے۔ تئی بچکندگ یات کا اَنت، تئی داتگیں مھر یات کا اَنت، بلے من زانان کہ تو نی پہ من ءَ واتر نہ بہ ئے۔ چی ءَ کہ تو پہ وتن رپتگ ئے، داں بلوچستان آجو نہ بیت تو واتر نیا ئے۔ھر کُجا ءِ سلامت ءُ سوبین بات ئے۔
تئی کستر چراگ بلوچ
