نبشتہ کار: ڈاکٹر مبارک اَلی
رجانکار: شمس بلوچ
راجدپتر نویسانی تہ ءَ اے گپ چہ کرناں ھست اِنت کہ راجدپتر ءِ وانگ راجانی واست ءَ نپ اِنت یا نکس اِنت بلے ایشی ءِ پیسلہ انگت نہ بوتگ بلے اے جیڑہ دوئیں نیمگ ءِ مردماں وتی وتی منّانک ءِ ایر کنگ ءُ راست کنگ ءَ پورائیں جُھد کتگ۔ چوناھا راجدپتر ءِ بارو ءَ گوشگ بیت کہ اگاں کسے چہ ایشی ءَ سبک بہ زور ایت گڑا وتی گوستانک ءِ ردیاں بار بار مہ کنت گڑا ایشی متلب ایش انت کہ راجدپتر ءِ اے سبک ھکمران ءُ راھشونانی واست ءَ اِنت کہ پرچا ھمے ھاسیں پیسلہ کن اَنت ایشی ءِ سْیادی گوں لس مھلوک ءَ نیست بلے اے ھم گوش اَنت کہ لس مھلوک ءَ سبک ءِ زورگ ءَ راجدپتر ءِ وانگ ءِ زرورت بیت۔ بلے ھکمراناں چہ ھبردار کنگ ءَ ابید آ راجدپتر ءَ ھچ در نہ بر اَنت ءُ گْوست ءِ ردیاں بار بار کن اَنت۔ پہ درور سویڈن ءَ زار پیٹر ءِ زمانگ ءَ روس ءِ سر ءَ اُرش کُتگ بلے برپ باری ءِ سبب ءَ بے سوب بوتگ
ھمے وڑ ءَ 1812 ءَ نپولین ءَ روس ءِ سر ءَ ارش کتگ اے ھمے سبب ءَ بے سوب بوتگ پرچاکہ برپ باری ءَ باج برگ ءَ نہ اشتگ۔ دوھمی جھانی جنگ ءَ جرمنی ءَ وتی پوج روس ءَ دیم داتگ بلے جرمن ءِ پوج روس ءِ برپ باری ءِ سبب ءَ پروش وارتگ۔ ھمے وڑ ءَ گْوستانک ءِ تہ اے وڑیں بازیں ویل ھست اَنت کہ راجاں سبک نہ زرتگ ءُ ھمے کار بار بار کتگ۔ ھکمرانیں ٹولی مُدام چہ دنیا بامرداں سانمند بنت ءُ ھمایانی وڑ ءَ جھد کنگ ءِ کوشست کن اَنت انچوشکہ سکندر ءَ وتی ورنائی ءَ سوبمندی رس اتگ ھمے سبب ءَ ھر جنرل وت ءَ سکندر ءِ وڑ ءَ کنگ لوٹ ایت۔
جولیس سیزر گوشتگ کہ منی اُمر گوزگ ءَ اِنت ءُ من انگہ سکندر ءِ وڑ ءَ کار نہ کتگ وھدے سیزر اسکندریہ ءَ ایردست کنت ءُ ھاس سکندر ءِ کبر ءِ زیارت کنگ ءَ روت۔ھندوستان ءَ اَلاوالدین خلجی وت ءَ را دوھمی سکندر گوشتگ ءُ وتی سیادی ءَ را سکندر ءَ گوں جوڑینگ ءِ جھد کتگ۔ ایرانی گْوستانک ءِ تہ نوشیروان آدل مزنیں بامردے بوتگ ھمیشی وڑ ءَ بوگ ءِ واست ءَ مسلمان ھمکمراناں وتی نام ءِ دیم آدل جتگ۔ راجدپتر ءِ تہ ءَ اے وڑیں ھم ھکمران گْوستگ کہ وتی زلم ءُ زوراکی ءِ سبب ءَ بدنام بوتگ اَنت پہ درور روم ءِ بادشاہ کلی گُلا ءُ نیرو اَنت کہ ھمے سبب ءَ اے گوستانک ءِ تہ ءَ ایر جنگ بنت۔ ایشانی نام ءَ گوں ھرابی ھمگرنچ کن اَنت۔ یورپ ءِ میانی اھد ءَ چرچ تاکتور بوتگ گڑا مزھب ءَ راجدپتر ءَ وتیچماں چارگ ءِ جھد کت۔ بادشاھانی جاگہ ءَ مسیھی ءُ اولیاں گپتگ ولی پِرانسیسی ءُ اگناشیس ءَ لوٹ اِت کانود ءِ رندگیری بندات کتگ۔
راجدپتر پہ ھکمرانانی واست ءَ پنت ءُ سوج ءِ یک وسیلہ بوتگ۔ھکمراناں گوشگ بوتگ کہ شما نیک ءُ پرھیزگار بہ اِت ءُ وتی مھلوک ءِ واست شریں ءُ دیمرویں کار بہ کن اِت دانکہ مُز شمارا آ دنیا ءَ رس اَنت۔ رینانسس ءِ اھد ءَ راجدپتر نویسانی ءُ سیاستدانانی راجدپتر ءِ بارو ھیال مٹ بوتگ اَنت پہ درور میکاولی راجدپتر ءَ را اکلاکی کدراں چہ آجو کتگ ءُ ھما مردمان ءَ بامرد پیش داشتگ کہ آیاں مزھبی ءُ اکلاکی کدر پامال کتگ اَنت ۔روشن ھیالی( Age of Enlightenment) ءِ دور ءَ کواس ءُ زانت کاراں چرچ ءُ مزھب ءِ تاکت پروش داتگ ءُ راجدپتر ءَ را چہ مزھب ءَ کشتگ ءُ بےنیکرہ جوڑ کتگ۔ ھمے سبب ءَ راجدپتر ءِ کارمرز کنگ ھکمران ٹولی ءَ چہ ابید لس مھلوک ءَ بندات کتگ۔ اد ءَ پد ءَ جستے چست بیت راجاں وتی گوست ءِ زلورت ھست نیست؟
راجدپتر نویسانی یک ٹولی یے گوشگ ءَ اِنت کہ گوستانک گوستگ ءُ ھلاس بوتگ ناں تو گوستانک ءَ نوکیں پکرے مان کت کن ئے ناں کہ گھتر کن ئے پرچا کہ گوست نوں ھچ کار ءَ نیت پمیشکا شرتر ھمیش اِنت راج وتی گوستانک ءَ بے ھال بہ کن اَنت انوں راجاں وتی انیگیں اھد ءُ دیم ءِ باریگ بارو ءَ جیڑگی اِنت۔ راجدپتر نویسانی دوھمی ٹولی اے لیکہ ءِ منوگر نہ اَنت آ گوش اَنت کہ ءَ گوستانک بے ھال کنگ نہ بیت پرچا کہ اے راجدپتر ءِ تسلسل اِنت کہ پیداک اِنت گوست ءَ چہ ابید تو ھستانک ءَ پھم اِت کُت نہ کن ئے پرچہ کہ ھستانک ءِ بُن چہ گوستانک ءَ بندوک اِنت۔ نوکیں دور ءَ وھدے نوکیں لیکہ دنیا ءِ تہ اتکگ اَنت گڑا اے لیکھان ءَ راجدپتر ءِ تہ ءَ ھوار کنگ بندات کتگ پہ درور یورپی کالونیلزم ءَ ایشیا ءُ اپریکہ ءِ راجدپتر رد کُتگ ءُ وتی چماں چاریتگ ءُ نبشتہ کتگ ءُ راجدپتر وتی ھساب ءَ ترینتگ یورپ ءَ شرتر پیش دارگ ءِ جھد کتگ ءُ ایشیا ءُ اپریکہ ءِ دودمان ءُ راجدپتر ءَ را جھل جتگ ءُ ھمے مارشت داتگ کہ شما وتواک بہ ات ءُ ھچ کُت نہ کن اِت۔
اگاں شمارا چیزےکنگی اِنت گڑا یورپ ءِ دودمان ءُ راجدپتر ءَ بزور اِت ءُ ھمیشی ءِ بھر بہ ات۔وھد وھد ءِ سر ءَ اے ھیال بدل بوان بوتگ ءُ ایشیا ءُ اپریکہ ءِ راجانی تہ ءَ راجدوستی ءِ جزبگ ودی بوان بوتگ ءُ وتی راجدپتر پد ءَ نوک بندات کنگ ءُ نبشتہ کنگ بندات کُت ءَ گڑا اد ءَ ما گند ایں کہ راجدپتر ءِ تہ ءَ پائدگ ءُ نکسان ھست اِنت بلے راجدپتر راجانی تہ ءَ ھمے زانت ءُ جزبگ ودی کنت کہ وتی جیڑہ ءَ وت گیش ءُ گیوار کنگ ءِ جھد ءَ بہ کن بلے انوگیں وھد ءَ راجدپتر ءِ بیانیہ مٹ بوتگ ءُ انوں لس مردم ناں تھنا راجدپتر ءِ بھر اَنت بلکہ راجدپتر ءِ جوڑ کنوک اَنت۔
