چمروکیں سمیر جان

نبشتہ کار: شلی بلوچ

2013 ءَ وھدے بلوچستان ءَ کُدرتی مزنیں زمین چنڈّے اتک، چہ اے زمین چنڈّ ءِ سبب ءَ بلوچ راج سک باز تاوان بار بوت۔ بلے ھمے ویل ءَ گوں پاکستان ءِ ناشریں لشکر ءَ زمین چنڈّ ءِ آماچیں بلوچ مھلوک ءِ کُمک کنگ ءِ نام ءَ دشت ءُ کیچ ءَ بہ‌گِر داں برزادی نیمگ ءَ اتک ءُ پہ وت ءَ کیمپ جوڑ کُت ءُ نِشت۔ پاکستانی لشکر ءَ زمین چنڈ ءِ ویل ءَ چہ سوب کُت ءُ بلوچستان ءِ ھند ءُ دمگاں نِشت ءُ بلوچ جھدکار ءُ سرمچارانی ھلاپ ءَ مزنیں کچ ءَ آپریشن بندات کُت۔ ھمے آپریشن ءَ گوں لشکر ءَ بلوچانی لوگ بُن دات اَنت۔ بلوچ مھلوک پہ زور لڈّ ءُ بار ءَ مجبور کنگ بوت ءُ مزنیں کچّے ءَ بلوچ ورنا آوار جَنگ بوت اَنت ءُ بازیں بلوچ ورنا دیم پہ کوہ ءَ شُت انت۔ زمین چنڈّ  ءَ گوں ھوار پاکستانی لشکر ءِ  ناشرکاریانی سبب ءَ بازیں کسّہ بندات بوت ءُ بازیں کسّھاں وتی دْروشم مٹّ کُت اَنت۔ ھمے بازیں کسّھانی نْیام ءَ یک سپرے ءِ کسّھے نمیران ءُ دلیریں شھید سمیر جان ئیگ اِنت۔

تربت شھر ءَ چِہ سِی دو (32) کلو میٹر دور یک بھشت دْروشمیں دوارے ڈانڈل ءِ ڈنّ ءِ نام ءَ شاپک ءَ ھست کہ اُود ءَ بازیں نمیرانیں سرے ودی بوتگ۔ 25 دسمبر 1990 ءَ ڈانڈل ءِ ڈنّ شاپک ءَ کماش جان مھمد ءُ مات سابرہ ءِ لوگ ءَ شھید سمیر جان ءَ وتی چمّ پچ کُرت اَنت۔ شھید سمیر جان ءِ شش گْوھار ءُ سَے برات ءِ تہ ءَ چہ دُرستاں کستِر ءُ مات ءُ پت ءِ لاڑُوکیں بچک اَت۔

شھید  سمیر جان یک وانوکیں بچکے بوتگ، ءُ آ چہ درکسانی ءَ سوھو ءُ دانائیں ورنایے بوتگ۔ شھید ءَ وتی بنداتی وانگ اولی جمائت ءَ داں پنچمی جمائت ڈانڈل ءِ سرکاری وانگجاہ ءَ در بُرت ءُ وانگ ءُ زانگ ءَ شر بوَگ ءِ سبب ءَ شھید مدام سالی چکاساں اول نمبر ھم بوتگ ءُ  پد ءَ شھید ءَ دھمی جمائت چہ شاپک ءِ بچکانی مزنیں مکتب ءَ ونتگ۔

آئی ءَ چہ پد پہ گِیشیں وانگ ءُ زانگ ءِ ھاتر ءَ شھید سمیر جان دیم پہ مزن شھر تربت ءَ شُت ءُ تربت ءِ آ وھد ءِ مستریں دربرجاہ بزاں چہ اتا شاد ڈگری کالج ءَ چہ ایپ ایس سی ءُ بی اے ءِ ڈگری شریں نمبراں گوں گپت ءُ سوبین بوت۔

سمیر جان ءَ شکار ءِ ھم سک باز شوک بوتگ ءُ ھمک سال کہ مُرگ واران بوتگ گُڑا گوں سنگتاں شُتگ مُرگ ءِ شکار ءَ۔ سنگتانی گْوشگ ءِ رِد ءَ شھید نشانگ ءِ جَنگ ءَ ھم بلد بوتگ  ھمے  نشانگ ءِ وج کنگ ءِ ھُنر ءَ شھید ءَ جنگ ءِ میدان ءَ دُژمن ءَ را  لاچار کُتگ ءُ مدام باج بُرتگ۔ شھید ءَ را لیب ءُ گْوازی ءِ ھم باز شوک بیتگ۔ گُوازیانی تہ ءَ پُٹبال ءُ کرکٹ ءِ شوکے داشتگ ءُ وتی ھنکیں ڈانڈل ءِ پُٹبال ٹیم ءِ باسکے ھم بوتگ۔

شھید ءِ کماش پہ کار ءُ بار ءَ باز وھداں درملک دبئی ءَ بیت، کماش کہ دبئی ءَ چہ واتر بیت گُڑا مال ءُ مڈّی ڈگار بنت ءُ ڈگارانی سر ءَ کار کنت۔ شھید ءَ وتی وانگ ءِ ھمرائی ءَ ڈگارانی سر ءَ ھامین ءِ وھد ءَ وتی کماش ءِ ھم کُمک کُتگ۔ شھید سکیں وش تب ءُ مھروانیں بچکے بوتگ۔ شھید ءَ را وتی زمین، وتی ھنکیں، وتی مردُمانی گوم ءَ مدام مھر بوتگ ءُ ھمے مھر ءَ شھید ءَ را وش وابی ءُ تھنا وتی وشھالی ءِ بابت ءَ جیڑگ ءَ نیشت۔ شھید ءَ را وتی زمین ءُ راج ءِ بزّگی ءُ گلامی ءَ تچکیں منزل پیشداشت، ءُ سمیر جان ءَ زانت کہ من ءَ ماتیں گُل زمین چہ بدواھاں رکینگی اِنت ءُ بس جنگ کنگی اِنت۔

 شھید سمیر جان ءَ ماں 2013 ءَ یک نوکیں سپرے بندات کُت۔ اے سپر آجوئی ءِ سپر اَت، ماتیں وتن بلوچستان ءِ چہ لگوریں پاکستان ءَ آجو کنگ ءُ رکینگ ءِ سپر، وش ءُ زیبائیں کوھانی گْور ءَ روگ ءِ سپر، ھمدلیں دوست ءُ سنگتانی ھمرائی ءِ سپر، راستی ءِ سپر ءُ وتی پجّار ءِ سپر۔

2013 ءَ کہ لگوریں پاکستان ءِ لشکر بلوچستان ءَ کئیت ءُ سرجمیں کیچ ءَ کمیپ ءُ آپریشن بندات کنت، ھمے سال ءِ گُڈّی وھداں سمیر جان بلوچ آجوئی گَل بی ایل ایپ ءَ گوں ھوار بیت اِنت، بلے بندات ءَ پہ گل ءِ سنگتاں دوزواہ ءُ راھچاری ءِ ھساب ءَ کار کنت ءُ ھمے نیام ءَ چہ گل ءِ سروکاں سرپدی زور اِیت ءُ وت ءَ گیشتر مھکم کنت۔

پاکستان ءِ لشکر کہ میتگ ءُ بازاراں دور کنت ءُ مھلوک ءَ لڈّ ءُ بار ءَ پہ گْوش اِیت ءُ آپریشن کنت، گُڑا شھید دمگ ءَ گیش نِشت نہ کنت ءُ نومبر 2014 ءَ کوہ ءَ روت ءُ بی ایل ایپ ءِ سنگر ءَ تیر ءُ کتار بیت۔ شھید سمیر جان گوں کسانیں اُمر ءَ کوہ ءَ سنگتانی ھمراہ بیت۔ اے سپر ءَ وتی میتگ ، مات ءُ پت ، سنگت ءُ ھمراھاں یل دنت ءُ ھمے سپر ءَ وتی اِیمان ءَ گیش مھکم کنت ءُ گُژن، بے وابی ءُ سکّیاں سگ‌ اِیت دانکہ دُژمن ءِ واب ءَ ھرام نہ کنت۔ شھید گوں وتی پگر ءَ مھکمیں رنگے ءَ دیم ءَ جُنزان کنت ءُ دُژمن ءَ پہ اِیمنی وتی زمین ءَ نِندگ ءَ نیل اِیت۔ پد ءَ ھما روچ کئیت کہ شھید زمین ءِ سالونک بیت ءُ وتی ھاک ءَ امباز کنت ءُ مدامی گوں ھاک ءِ وشبوھاں ھوار بیت۔

4 پروری 2022 ءَ جما (آدینگ) ءِ روچ ءَ ھال اتک کہ شھید سمیر جان گوں دگہ دو ھمبلاں بازار ءِ نیمگ ءَ اتکگ پہ تُوشگ ءِ زُورگ ءَ، بلے بدوائیں پاکستان ءِ لشکر ءِ داشتگیں کاسگ چٹّ ءُ چارِیگاں رہ بستگ ءُ شھید ءِ سر ءَ اُرش کُتگ۔ شھید ٹپی بیتگ ءُ گیش جنگ داشت نہ کتُگ ءُ وتی جند ءِ تُپنگ ءَ چہ وتی جند وت جتگ، بلے وتی جند لگورانی دست ءَ نہ داتگچءُ نمیران بیتگ۔ ھمے رنگ ءَ سمیر جان مدامی ھاک ءِ وشبوھاں گوں ھوار وتی سپر سرجم کُت، سرمچار ءُ آئی گُڈّی تیر ءِ کسّہ ابدمان بوت۔

” زندگیں کارِست دائم چو چراگ ءَ روک بنت

ھو زمین زادگ مدامی پہ وتن سالونک بنت “