نبشتہ کار: بْرمش شاشانی
انچوشکہ شما دْراہ زان اِت کہ مئے ماتی زُبان دژمن ءِ اڈ داتگیں یک پندلے ءِ سبب ءَ گار ءُ بیگواہ کنگ بیگ ءَ اِنت تاکہ بلوچ راج ءِ تہ ءَ زبان دوستی ءُ راجدوستی مہ بیت، پہ راجی پجّار ءِ ھلاسی ءَ مئے راجی ءُ ماتی زُبان گار ءُ بیگواہ کنگ بیگ ءَ اِنت۔ البت چہ ایشی ءَ ھوار چیزے ما وت ھم وتی ماتی زُبان ءَ ڈالچار ءُ وت گار ءُ بیگواہ کنگ ءَ اِیں۔ گِند ئے ما دْراہ وتی راجی زبان ءَ ونت کُت کن ایں بلے پہ وانگ، زانگ ءُ راجی زبان ءِ نبیسگ ءَ وھد نہ کش ایں۔ بلوچی دربری(کورس) ءِ درونت، راجدوستی نبشتانک ءُ بُنرھبندی نکاناں نہ وان ایں۔
انّوں سرجمیں بلوچ راج وتی راجی زُبان ءَ وتی گْوانکوھانی تَھ ءَ وانگ ءُ زانگ ءَ اَنت پرچا کہ مرچیگیں ڈجیٹل زمانگ گْوانگو مئے بلوچی کتاب اَنت۔
بلے ما تنیگا وتی راجی زُبان ءَ وانگ ءُ دربرگ ءِ جُھد نہ کن اِیں۔ چوناھا ما وتی ماتی ءُ راجی زبان ءَ ونت کُت نہ کن اِیں گُڑا باید اِنت مئے مزنیں جیڑہ ءُ سوال ھمیش بوتیں کہ مئے راجی زُبان پرچا گار ءُ بیگواہ کنگ بیگ ءَ اِنت؟ باید ما وتی ماتی زُبان ءَ بہ وان اِیں ،باید اِنت مئے ماتی زُبان چَہ دْرستیں زُبانان دیم ءَ سر ءُ شر بوتیں۔ پیسر ءَ ما وتی ماتی زُبان ءِ درونتاں بہ وان اِین ءُ پم ایں، پد ءَ نبیس ایں۔ باید اِنت ما آ دِگہ زُبانان مہ وان اِیں بلکیں پیسر ءَ ما وتی جِند ءِ راجی زُبان ءَ بہ وان اِیں کہ بلوچی ءِ راجی پجّار اِنت۔
چوناھا بلوچ یک بیرگِریں راجے پمیشکا باید اِنت ما آ دِگہ اردو، پارسی، سندھی ءُ سرائیکی ءِ وڑیں زُباناں چہ بلوچ راج ءِ دپ ءَ گار ءُ بیگواہ بِہ کن اِیں کہ ھمے زباناں مئے بلوچی زبان ءَ تاوان داتگ۔ ما یک گپے گْوش ایں کہ انگریزی بہ وان اِت کہ انگریزی یک میان اُستمانی زبانے۔ میڈیکل سائنس، انجینئرنگ ءُ دنیا ءِ راجی دیمروی گوں انگریزی ءَ ھمگرنچ اَنت بلے دژمن ءِ زبان ءَ مہ وان ایں دژمن وتی جِند ءِ زھگاں انگلش میڈیم ءَ وانین ایت۔
گِند ئے پیسر ءَ ما وتی ماتی زُبان ءَ دربر اِیں کہ اِے مئے وتی ماتی زُبان اِنت۔ کبرے مردُم وتی چیزاں دیم ءَ کار اِیت۔ باید اِنت ما وتی ماتی زُبان ءَ پیسر ءَ دیم ءَ بِیار اِیں پرچاکہ دْرستیں زُباناں ما دیم ءَ آرگ ءَ اِیں۔ پد ءَ وتی ماتی زُبان ءَ ھمے زُبانانی تَھ ءَ گار ءُ بیگواہ کنگ ءَ اِیں۔ مئے ماتی زُبان ءِ تَھ ءَ باریں چینچو اردو گال مان اِنت، ما وتی ماتی زُبان ءِ تَھ ءِ ھمے اردو ءِ گالاں در کن اِیں گُڑا مئے ماتی زُبان باریں چینچو ھست بیت۔
باید اِنت ما وتی ماتی زُبان ءَ پیسر ءَ گوں وت بِیار اِیں۔ اگاں ما وتی ماتی زُبان ءَ مہ وان اِیں مئے ماتی زُبان انچوش گار ءُ بیگواہ بیت وتی ماتی زُبان ءَ دیمروئی بہ کن اِت پرچاکہ مئے ماتی زُبان گار اِنت گار ءُ بیگواہ کنگ بیگ ءَ اِنت۔۔
زُبان دوست ءُ راجدوستیں بلوچ بات اِت، وت ماں وت تپاک، ھمکوپگ ءُ ھمدست بات اِت۔ بلوچ راج، بلوچستان ءُ بلوچی دیمروی بکنات۔ شالا سوبین بات اِت۔
