نبشتہ کار: بْرمش شاشانی
انچوشکہ نمیرانیں راجی رھشون شھید بانُک کریما بلوچ ءَ گُشتگ اَت کہ وتی ماتی زُبان ءَ بہ وان اِت، وتی ماتی زُبان ءَ وت دیم ءَ بیار اِت ءُ گوں وتی ماتی زُبان ءَ مھر بہ کن اِت۔ بزانکہ بلوچی بہ وان اِت، ھبر بہ کن اِت ءُ وتی راجی زبان ءَ نبشتہ بہ کن اِت۔ بلے سک بژن اِنت کہ بلوچ وتی ماتی زُبان ءَ گپ نہ کن اَنت، بازیناں وتی ماتی زُبان یل کُتگ ءُ دری ءُ دِگہ زُباناں نبشتہ کن اَنت ءُ پد ءَ ھمے زُباناں گپ جن اَنت! سد بژن کہ اے بلوچ پرچا وتی ماتی زُبان ءَ نہ وان اَنت؟
بانُک کریما بلوچ ء گُشتگ اَت کہ اگاں تو گوں راج ءَ مھر کنگ لوٹ ئے گُڑا چہ دّرستاں پیسر وتی ماتی زُبان ءَ بہ وان، وتی ماتی زُبان ءَ دیم ءَ بیار ءُ وتی ماتی زُبان ءَ نبشتہ بہ کن کہ زبان راج ءَ راجدوست جوڑ کنت پمیشکا باید اِنت ھرکس وتی ماتی زُبان ءَ بہ وان اِیت، براھوئی ھبر کنوکیں بلوچ وتی ماتی زُبان براھوئی ءَ بہ وان اَنت ءُ بلوچی ھبر کنوک بلوچی بہ وان اَنت۔ اگاں مئے زُبان بلوچی اِنت ما وتی بلوچی درونت ءُ نبشتانکاں وانان ءَ بلوچی نبشتہ ھیل بہ کن ایں۔ اگاں مئے زُبان براھوئی زُبان اِنت باید اِنت ما وتی اے ماتی زُبان ءَ ھم بہ وان اِیں۔ پہ بلوچ راج ءَ دوئیںئے ماتی ءُ راجی زبان اَنت، بلکیں راجی پجّار اَنت۔
گڑا باید اِنت شُما وتی ماتی زُبان ءَ بہ وان اِت۔ گوں وتی ماتی زُبان ءَ مھر بہ کن اِت۔ وھدیکہ شما گوں راج ءَ ھمراہ بَہ اِت گُڑا ما سرپد بَہ ایں مئے بلوچ راج گوں ما مھر کنت۔
مرچاں اِے دامگ(نٹرنیٹ) ءِ وھد اِنت باید اِنت ما وتی ماتی زُبان ءَ وتی گْوانکوھانی تَھ ءَ بہ وان اِیں۔ ھرکس وتی زُباناں وتی گْوانکوھانی تَھ ءَ وانگ اِنت ۔ من زان آں کہ ما سرجمیں روچ ءَ نہ وان اِیں باید اِنت ما ھر روچ کمّو وتی ماتی زُبان ءَ ھم بہ وان ایں ءُ نبشتہ بہ کن اِیں ءُ کمّو وتی ماتی زُبان ءَ چمشانکے بِہ دے اِیں۔
گوں شما دزبندی کن ایں کہ مئے اِے نبشتانک ءَ دیم ءَ روان بہ کن اِت کہ وانوکاں سرپدی بہ رس ایت۔ باید اِنت مئے راج ءِ تَھ ءَ کمّو سرپدی بہ بیت کہ مئے ماتی زُبان گار ءُ بیگواہ اِنت ۔ کُل سلامت بات اِت ، زُبان دوست بات اِت۔ شالا یکجاہ بات ات ۔ مُدام انچوش بات اِت
