شھید جھانزیب ءِ یات

نبشتہ کار: مزار شاشانی

جھانزیب جان تو شھید بوت ئے، تو نی چہ من ءَ دور شُت ئے،  گِند ئے بے ترا من سک ایوک آں،  بے ترا ما دْراہ ملور ایں۔  من نہ زان آں من چے بکن آں تو من ءَ چی ءَ یل کُت ءُ شُت ئے؟

انی دیر مہ کن ءُ ￶بیا کہ تئی مات تئی وداریگ اِنت! اِے شاشان تئی وداریگ انت، بے ترا مئے میتگ ءَ  ھچ زیب نیست۔ بے ترا اِے شاشان تھار ءُ ملور اِنت وتی ارساں ریچگ ءَ اِنت۔ تو کُجام نیمگ ءَ شُت ئے من ھچ نہ زان آں۔ تو چون شُت ئے من ھچ نہ زان آں۔ من بس ھمے زان آں تو کا ئے۔ باریں تو کدین کا ئے دیر مکن زوت بیا۔

ترا یات بیت من ءُ تو مُدام مسکرا کُتگ،  من مدام اِے دلاراں ءَ زاہ ءُ بدیں ھبر گُشتگ بلے تو مدام من ءَ گُشتگ چوش مہ گُش شر نہ اِنت چی ءَ کہ آ بلوچ اَنت، مئے برات اَنت بلے ھرچی کن اَنت پہ وت کن اَنت۔ آ یک روچے وتی جاہ ءُ وتی اِزت ءَ گند اَنت۔ تو مدام وت ءَ انچو شُوک کُتگ وتی مود انچو رستگ من ترا گُشتگ من تئی سر ءَ گنوک آں۔ تو من ءَ کند اِتگ ءُ گُشتگ بلے چوشیں گپاں چُوشیں گپ مارا زیب نہ دنت۔

تو یک بالیں مُرگے اَت ئے کُجام نیمگ ءَ بال کُت ءُ کجام نیمگ ءَ شُت ئے؟:کس ءَ ھچ سما نہ بوت بلے تئی روگ ءَ مارا یک بلاھیں دردے ءِ تہ ءَ اِیر کُت۔

ھما وھد تو وانگ ءَ اَت ئے ھما وھد ءَ ترا گوں وتی زمین ءَ مھر اَت، تو مُدام ھمے گُشت مَرگ انسان ءِ سر ءَ اَلّم کیت گُڑا شری ھمیش اِنت انسان پہ وت ءَ شری بکنت ءُ وتی واست ءَ ￴نامے  ایر بکنت ءُ بہ روت۔ گِند چہ تئی روگ ءَ پد من نہ زان آں من ءَ چے اِنت منی دل گُش اِیت ھچ مکن۔ وھدے من ھر کُجا رو آں گُڑا بس تئی ترانگ ءُ گپانی تہ ءَ کپ  آں۔ من ترا سک یات کار آں۔ تو شُت ئے تو پہ وت ءَ نامے اِیر کُت تئی روگ ءَ پد باید اِنت  لجوزیں بلوچ کمّو شرمندگ بہ بہِ اَنت کہ مئے راج ءِ تہ ءَ اِے وڑیں کسانیں زھگ شُتگ نُو آ وتی آجوئی ءَ گَر اَنت۔۔