نبشہ کار: بْرمش بلوچ
پہ بنی آدم ءَ زُبان بک هژدری ئیں چیزے پرچاکہ زبان ءَ اَبید انسان چو گنگدام ءَ بیت۔ گِند ئے زبان مردم ء دْرشانی ءِ وسیلہ اِنت کہ همیشی ءِ وسیلہ ءَ آ وتی زِند ءِ مُراد، واهگ، لوٹ ءُ گزراں دْرشان ءُ پدّر کنت۔ آ گوں لوگ ءِ مردم:- بْرات، گْوھار ءُ وتی زھگاں گپ ءُ مھر کنت۔ بلے پہ یک راجے ءَ زبان مزنیں ارزشتے دار ایت۔ جھان ءُ میان اُستمانی مُچیانی تہ ءَ آ چہ یک زبانے ءَ پجارگ بیت کہ اِے کَے اِنت ءُ چونیں راجے ءِ مردمے؟ زاناں اربی یے، روسی یے، ترکی یے یا چاپانی یے؟ بزانکہ زبان آئی ءِ مستریں پجّار اِنت۔ زبان راجاں یکجاہ ءُ یکمُشت کنت۔ یک بھر ءُ بانگیں راجے ءِ تہ ءَ زبان دوستی راجدوستی ودی کنت پمیشکا مرچاں بلوچ راج ءَ وتی راجی زبان وانگ، دربرگ ءَ ھوار وانینگ ھم لوٹ ایت۔
اگاں مرچی ما زُبان ءَ مہ وان ایں یاکہ زبان ءِ دربرگ ءِ جهد ءَ مہ کن ایں گڑا بزانکہ ما چہ دنیا ءِ یک مزنیں بهرے ءَ پشت کپ ایں پرچا کہ زبان یک اَنچیں هستی یے زبان ءَ مردم وت ءَ بے پجّار، ناسرپد ءُ نازانت لیکھ ایت ءُ دُنیا ھم ترا ھچ دلگوش نہ کنت۔ گوں شما راج ءَ دزبندی اِنت کہ یکرندے زبان ءِ سر ءَ دلگوش بہ دے اِت۔ گِند ئے سرپدی چہ وانگ ءَ رس ایت، دنیا ءِ نودربر وانان ءَ ھیل کن اَنت پمیشکا اگاں شُما وتی زبان ءِ دَرونتاں وانان کن اِت گُڑا چی ءَ وتی راجی زبان ءِ راست نبیسّگ زبر نہ بَہ اِت؟ زاناں ما بلوچ کَردماگ ایں کہ وتی جِند ءِ زبان ءَ دربُرت نہ کن ایں؟
اِنا، وتی زبان ءِ وانگ آسان اِنت۔ گڑا باید ایش اِنت کہ ما وتی موبائلاں بلوچی کتاب ءِ وڑ ءَ بچار ایں، ما چہ وٹس ایپی ءُ پیسبکی وانگجاھاں بلوچی وانگ ءُ دربرگ ءِ جُھد بہ کن ایں۔ بلوچی ھال ءُ اھوال بہ وان ایں۔ ھچبر بلوچی وانگ ءَ ما وت ءَ هچ اڑ ءُ جنجال مہ کن ایں بلکیں پہ ناز ءُ پھر ءَ وتی راجی زبان ءَ بہ وان ایں ءُ سرپد بوگ ءِ جهد ءَ بہ کن ایں گڑا ما وتی راستیں ءُ تچکیں راه ءَ وت هم گِچین کُت کن ایں۔
مرچی مئے هما ناسرپدیں نودربر هست اَنت آ مدام همے جیڑ اَنت کہ بلوچی وانگ گران اِنت، من هچبر بلوچی نہ ونتگ پمیشکا من بلوچی وانگ ءَ نزور آں۔ گڑا باید ایش اِنت کہ اِے انٹرنیٹ ءِ زمانگ ءَ ما دُرست پہ زبان ءَ کار کت کن ایں بلے تو بلوچی نہ ونتگ ءُ نزان ئے بلے ترا جهد کنگ اَلّم لوٹ اِیت اگاں دگہ هچ کُت نہ کن ئے بلے روچے یک دَرونت ءُ پد ءَ راجدوستی نبشتانکاں ونت کن ئے ماه ءِ تہ ءَ وت دربر ئے گڑا بچار تو چنچو بلوچی نبشتہ زبر بَہ ئے هر روچ وتی هما زانتکار ءُ زبان دوستانی نبشتانک ءِ وانان ءُ وتی جهد ءَ همے وڑ ءَ برجا بہ دار ایں گڑا ما وت کم کم ءَ هیل کن ایں۔
وانگ ءِ پڑ ءَ مارا کدی هم پروش ورگی نہ اِنت اشتاپ کنگی هم نہ اِنت پرچا کہ وانگ اشتاپی چیزے وَ نہ اِنت۔ هرچ کارے بہ بیت زبان ءِ وانگ بہ بیت یا توری دگہ کارے بہ بیت بلے مارا جهد کنگ لازم اِنت۔ اگاں ما جُھد کن ایں گُڑا لازم سوبمند بہ ایں۔
گُڈسر ءَ من وتی نبشتانک ءَ رپتگیں رهشون شھید بانُک کریما بلوچ ءِ گپ ءَ آسر کن آں “بلوچ ءَ بلوچی زبان جوڑ کنت انچوشکہ ما سرپد ایں کہ بازیں بلوچاں وتی زبان یل ءَ کُتگ ءُ آ دگہ زبان ءَ هبر کن اَنت بلے اَگاں ما بلوچی ءَ گار بہ کن ایں ما چہ وتی ربیدگی ءُ هپت پُشتی رودگاں سِد ایں۔ ابید چہ وتی زبان ءَ راج چو بے هُنڈالیں درچک ءَ گیمُر اِیت ءُ گار بیت راج ءِ زندگ دارگ واست ءَ زبان ءَ زندگ بہ دار اِت“
شالا بلوچ راج وت ماں وت تپاک، ھمکوپگ ءُ ھمدست بات، شالا راج زبان دوست ءُ راجدوست بات۔ بلوچی ءُ بلوچستان شالا دیمروی بہ کنات۔
