ندکار: جمائتی بلوچ ءُ شازیہ بلوچ
گِند ئے ما بلوچ راج وتی راجی زبان ءَ سک ڈالچار کنگ ءَ ایں۔ یک نیمگے ءَ ما وتی راجی زبان ءَ نہ وانگ ءَ ایں ءُ دومی نیمگ ءَ ما بلوچی گپ ءُ تران ءِ وھد ءَ بے کساس دری زبانانی گالاں کارمرز کنان ءَ وتی راجی زبان ءِ زگریں گالاں گار کنگ ءَ ایں۔ چوناھا ما بلوچ وانِندہ وت ءَ زبان دوست گْوش ایں۔ ھر روچ مئے دپ ءَ تھنا یکیں گپ اِنت “بلوچی مئے وتی شھدیں زبان اِنت، بلوچی مئے راجی پجّار اِنت” بلے ما یک روچے ءَ ھم وتی راجی زبان ءِ وانگ ءُ دربرگ ءِ جُھد ءُ توکل نہ کُتگ۔
چہ ایشی ءَ ابید ما تُرس ءُ جنجال ءِ ھم آماچ ایں کہ بلوچی وانگ ءُ نبیسگ گِران اِنت۔ سُھب ءَ بہ گِر داں شپ ءِ گڈی بیل ءَ ما وتی موبائلاں بے سیتی ءَ کارمرز کنگ ءَ ایں۔ ما یکشل ءَ دری زبانانی نبشتھاں وان ایں ءُ دری زبان ءَ پوسٹ کن ایں بلے ھچ سُد نیست کہ مارا وتی جِند ءَ ھم براھوئی ءُ بلوچی ءِ وڑیں زبان ھم ھست اَنت۔ ما نہ زان ایں کہ ایشی ءَ ما راج ءِ بےسمائی بہ گْوش ایں یا کہ بدبھتی؟
ما ھشت یا دہ سال پہ دری زبانانی وانگ ءُ دربرگ ءَ دے ایں بلے ما وتی جِند ءِ زبان ءَ یک ھپتگے نہ دے ایں۔ یک روچے ھم بلوچی دَرونت(سبق) ءُ زبان دوستی ءِ نبشتانکاں نہ وان ایں۔ مارا اِے سرپدی ھم نیست کہ وانگ، زانگ ءُ نبشتہ چے ءَ گْوش اَنت؟ پہ وانگ ءَ چے لازُمی اِنت؟ نبشتہ ءِ چنکس بھر اَنت؟ ءُ ناں کہ اِے وڑیں چیزانی وانگ ءُ زانگ ءِ جُھد کُت۔ بلوچ راج ءِ یونیورسٹی ءُ کالج ءِ نودربراں بچار اِت کہ آیاں اِے سرپدی ھم نیست کہ نودربر ءِ زمہ واری ءُ آئی ءِ ھک چے اَنت؟ یا ما پہ وتی زبان ءِ واست ءَ چے کار کُت کن ایں؟
گِند ئے مئے بلوچ راج ءِ وانِندھاں اِے سرپدی وَ ھست کہ انگریزی، اربی، پارسی ءُ ھِندی ءِ وڑ ءَ دُنیا ءِ ھر زبان ءَ دربری(کورس) ھست اَنت کہ دُنیا ءِ ھر کُنڈے ءَ نودربر ھمے زباناں چہ شر اڈ ءُ ساز داتگیں دربری ءِ دَرونت ءُ بُنرھبند(گرائمر) ءِ وانگ ءَ ھیل کن اَنت۔ بلے ما اِے چیز ءَ بے سما ءُ ناسرپد ایں یا گْوش ئے کہ کدی جُست کنگ ءُ زانگ ءِ جُھد نہ کُتگ بلوچ راجی زبان ءَ ھم سرجمیں دربری گوں بُنرھبند ءُ دَرونت ھست اَنت کہ آئی ءِ تہ ءَ ھر چیزے شر ءُ تچکیں دابے ءَ گیشینگ بوتگ اَنت کہ آ توری کُمکارگال ءُ تپورگال بہ بنت یا توری رنگ گال ءُ زمانگ بہ بنت۔ بزانکہ نودربراں پہ بلوچی وانگ ءُ دربرگ ءَ ھچ تکانسری ءُ اڑاند نیست۔
ما باوری ءَ گْوش ایں کہ اگاں یک بلوچے ءَ ھشت یا دہ تبک(کلاس) ونتگ ءُ مرچی موبائل ئِے گون اِنت گُڑا مرچی ھمے بلوچ سَے روچ ءِ تہ ءَ وتی راجی زبان ءِ وانگ ءُ راست نبیسگ ءَ زبر بیت بلے بَے(شرت) ایش اِنت کہ آئی ءِ تہ ءَ زبان دوستی ءُ راجدوستی بہ بیت، آ اِے پوہ بیت کہ منی گْوانکو(موبائل) پہ من بلوچی زبان ءِ کتابے، من وت ءَ بلوچی وٹس ایپی وانگجاھاں ھوار بہ کن آن ءُ بلوچی دَرونتاں وانان ءَ وتی راجی زبان ءِ راست نبیسّگ ءَ ھیل بہ کن آں۔ بزانکہ آ دلپروش مہ بیت کہ من بلوچی وانگ ءَ سُست آں بلکیں آئی ءِ تہ ءَ زبان ءِ وانگ ءُ دربرگ ءِ واھشت ءُ جُھد کنگ ءِ توکل لازم بہ بیت۔ آ ھمے بِہ جیڑ ایت ءُ بہ لوٹ ایت کہ من ءَ تھنا بلوچی وت وانگ ءُ دربرگی نہ اِنت بلکیں راج ھم وانینگی اِنت۔ اگاں ما بلوچی وانینگ ءِ کار ءَ گلائیش بَہ ایں گُڑا ما زوت بلوچی راست نبیسّگ ءَ زبر بَہ ایں، دِگرانی رَدی ءُ نبشتانکاں راست کنان ءَ مارا وتی تہ ءَ بیسہ(ھمت) ودی کنگی اِنت کہ من ھم راجی زبان ءِ اُستادے آں۔ من ھم وانینگ ءِ جُھد ءَ ھوار آں۔
باید اِنت بلوچ راج ءِ برات ءُ گْوھار مرچیگیں انٹرنٹ ءُ موبائل ءِ زمانگ ءَ وتی راجی زبان ءِ وانگ ءُ دربرگ ءَ ھوار وانینگ ءَ ھم وھد بدے اَنت، بلوچی درونت، بُنرھبند(گرائمر) ءُ راجدوستی نبشتانکاں وانان ءَ وتی جُھد ءَ مُھکم بدار اَنت کہ دیم ءَ مارا ھر یکے ءَ وتی راجی زبان ءِ سرمچار ءُ جُھدکار بوگی اِنت۔
شالا راجدوست ءُ زبان دوستیں بلوچ بات اِت۔ راج ءِ تہ ءَ بلوچی وانگ ءُ وانینگ ءِ جُھد البار ءُ بلوچی شالا دیمروی بکنات۔
