نبشتہ کار: آسیہ بلوچ
سیمی بھر:
اے بھر ءِ ھیال ءُ درشان چہ سُھل ءُ تْران ءَ پیسریگیں زھرشانی ءَ ھمگْرنچ اِنت، چوس کہ مئے زھرشانی سَے ءُ چار جاہ ءَ برجاہ بوتگ۔ یک روچے من دومی زھرشانی ءِ جاہ ءَ شُتاں گُڑا یک زالے ءَ را دیست کہ ارس ماں چمّاں ھُولمب ءُ جیگبند ءَ سر اَنت۔ اکس ءَ برے چُکّ اِیت برے سینگ ءُ چمّاں دار اِیت، اے دردناکیں نِدارگ پمّن نوک نہ اَت، بلے سکا تورناک اَت۔
من کمیں مھتلی ءَ پد چر اے زال ءَ جُست کُت کہ اے اکس ترا گون اِنت کئی اِنت؟
زال ءَ چہ گیمُرتگیں دل ءَ آھے کشّ اِت ءُ گْوشت: ” اے بلوچ ھان (بلوچ خان) منی زھگ نہ، پِس اِنت۔ شش (6) جون 2023 ءَ ریاست ءِ لشکر آئرا گوں آئی کسانیں زھگ ءَ ماں کیمپ ءَ پیشی ءَ لوٹ اِیت، سَے ءُ چار روچ ءَ پد زھگ ءَ یلہ دنت بلے بلوچ ھان (بلوچ خان) انگت گار ءُ بیگواہ اِنت“۔
اے ھبرانی اِش کنگ ءَ پد من ءَ انچو سما بوت کہ بلوچ ھان (بلوچ خان) ءِ اکس گوں من ءَ وتی زندان ءِ کسّہ ءَ آرگ لوٹ اِیت، بلے منی وس ءُ واک آ کچ ءَ نہ اَت کہ من بلوچ ھان (بلوچ خان) ءِ کسّہ ءَ گُوش بدار آں۔ پرچا کہ ما تھنا زندان ءِ بارو ءَ ونتگ، بلے آپرین ھمایاں کہ آ گوں زندان ءِ تھاری ءَ مدام مِڑگ ءَ اَنت۔ پمیشکا من پہ جزم گْوش آں کہ سوب مِڑوکانی بیت کہ آ گوں زندان ءِ تھاری ءَ مِڑگ ءَ اَنت، زندان ءَ کدی سوب نہ کُتگ ءُ نہ کنت۔
ھمے گپّ گپّ ءِ تہ ءَ بلوچ ھان (بلوچ خان) ءِ لوگبانُک زرینہ گْوشت: ” منی زھگ کسان ءُ کار کُرت نہ کن اَنت، منی لوگ ءَ دو وھد ءِ ورگ نیست۔ وتی نزّیکیں مردمانی گْور ءَ رواں، برے یکّے ءِ کِرّ ءَ پہ وتی زھگانی لاپ ءِ ھاتِر ءَ شکر ءُ آرت پچگِراں ، منی زھگاں اسکول ءِ وانگ ھم یل کُرتگ۔ وھدے بلوچ ھان (بلوچ خان) ھمد ءَ ساڑی بوتگ، من کدی کسی گِس ءِ دپ ءَ پہ چیزّ ءِ پچگِرگ ءَ نہ شُتگاں، بلے مرچی من ءَ اے زھگاں لاچار کُرتگ کہ پہ شپ ءِ شام ءُ روچ ءِ سُبارگ ءَ برے یکّے ءِ گِس ءِ دپ ءَ پانگ آں“۔
چہ زرینہ ءِ اے درد سرّیچیں گپّاں من سما کُت کہ اے زھگاں ترا لاچار نہ کُرتگ کہ تو گِس پہ گِس شام ءُ سُبارگ پانگ ئے، بلکیں ترا ھما زوراک ءَ مجبور کُرتگ کہ تئی سارتیں ساھگ بلوچ ھان (بلوچ خان) آوار جتگ ءُ زندانی کُرتگ کہ کس نہ زانت کُج ءَ کُجام رنگ ءَ اِنت، ءُ دومی تو کہ اے گِس پہ گِس روئے راستے کہ تئی مجبوری اِنت، بلے اے بلوچ ءِ گِس اَنت۔ من گوں بلوچ راج ءَ اے دزبندی ءَ کناں کہ ترا چو وتی زھگ ءِ وڑ ءَ دلگوش بہ دے اَنت ءُ بہ پلگار اَنت، پرچا کہ ھرکس وتی ءَ وت نزّ کار اِیت، درآمد ءِ کارپد ھمیش اَنت کہ مئے دیم ءَ پدّر اَنت۔
