جنگ کنگ ءَ پیسر پھمگ لوٹ اِیت

نبشتہ کار: میرک بلوچ

جنگ یک زالم ءُ ھترناکیں چیزّے، وھدیکہ مردُم ءِ کرّ ءَ دگہ ھچ راہ پشت نہ کپ اِیت ءُ دْرائیں راہ بند بہ اَنت، گُڑا گُڈّی جنگ پشت کپ اِیت پہ زور وتی ھکّ ءِ پچ گِرگ ءَ۔
چوش کہ جنگ یک انچیں چیزّے کہ آئی ءِ پھمگ ءَ پیسر اگاں تو بھر بہ زُور ئے ءُ جنگ کنگ ءِ جھد بہ کن ئے گُڑا تو پروش ورئے ءُ ھرچ رنگ ءَ پْعشت ءُ پروش ءِ آماچ بہ ئے، پمیشکا جنگ کنگ ءَ پیسر ترا جنگ سرجمی ءَ پھمگ لوٹ اِیت کہ جنگ ءِ جند چی یے؟ اے جنگ کُجام سبب ءَ کنگ بوَگ ءَ اِنت؟، من پرچا ایشی ءِ بھر بُوھگ ءَ اُوں؟ آیا اے جنگ ءَ من پہ وتی زات ءَ کنگ ءَ اُوں؟ یا پہ وتی ھاندان ءَ کنگ ءَ اُوں؟ یا پہ ھلک ءَ کنگ ءَ اُوں؟ ءُ ترا اے ھم پھمگ لوٹ اِیت کہ وھدے تو اے جنگ ءَ بھر زورے ترا وتی ھاندان ءَ ھوار وتی زات ءَ بندوکیں ھمُک شے پہ جنگ ءَ ببا دَیگی اِنت، ترا لبز زات چہ وت ءَ کشّگی اِنت ءُ اے ھبر مجگ ءَ جاگہ دَیگی اِنت کہ اے جنگ ءَ گوں تئی زات ءَ ھِچ نزّیکی نیست ءُ اے ھبر ءَ ھم چہ دل ءَ بہ کش کہ من اے جنگ ءِ مُزّ ءَ وتی چمّاں گوں بہ گِنداں، بس ھمے بہ جیڑ کہ جنگ بس دیم ءَ برگی ءُ منزل ءَ سر کنگی اِنت ءُ من ءَ پہ اے جنگ ءَ ندْر ءُ کُربان بوَگی اِنت۔ اگاں ما جنگ ءَ گوں ھمے رنگ ءَ اِیماندار بہ باں، گُڑا مئے پْروش دَیگ دُژمن ءِ واستا نبوتگیں ھبرے بیت، ءُ دُژمن ھر پِڑ ءَ بس پْروش وارت ءُ ما سوبمند بہ اِیں۔
بلے! ھمُک سنگت ( مرد یا زالبول ) کہ جنگ ءَ ھوار بوَگ ءَ بیت گُڑا آئی ءِ واستا اے ھبر الّمی اِنت کہ آئرا جنگ سرجم ءَ پھمگ لوٹ اِیت، جنگ ءِ دْرائیں تک ءُ پھناتاں آشنا بہ بیت پرچا کہ جنگ ءِ توکا ھرچی بوت کنت۔ اگاں باندا جنگ ءِ توکا جاھے ءَ ردی یے بیت گُڑا دلپروش بوَگی نہ اِنت، بلکیں وت ءَ ھوار سنگتاں دلبڈّی بہ دے اِت ءُ گیشتر مھکم بہ بہ اِت۔ جنگ ءَ دور کنگ ءَ پیسر اگاں تو سرجم ءَ بہ پھم ئے￷ گُڑا اے ھبر ءَ من ترا نبشتہ کناں دیاں کہ تو ھچ رنگ ءَ دلپروش نہ بہ ئے، بلکیں ھرچ وڑیں جاوراں گوں شوکیں وڑے ءَ گیش ءُ گیوار کُت کن ئے ءُ سوبمندی تئی پاداں چُکّ اِیت۔