ڈیھ ءِ مُریدیں میرل

نبشتہ: ھلیل بلوچ
نھمی بھر

مئے و آزاتی ءِ مُزّ ھمیش اِنت سباہ
داں کہ ھوناں گوں ماتیں زمین تر نہ بیت

آ وھدے لوگ ءَ رَوت گُڑا دْراھیں سْیاد سَباہ ءِ گِندگ ءَ کاینت۔ آئی ءِ پِت واجہ ابدالواھد جُست ئِے کَنت “ھان اُڈے چوری تہ کجا گار بوتگ ئے؟ تئی موبائل ھم بند بوتگ؟” سَباہ سکّ ناگیگ بیت کہ چے دْروگے بہ بنداں کہ بازیں مردُمے نِشتگ، ایران ءِ نام ءَ گِپت نہ کَنت کہ چہ سْیادانی ھر گِس ءَ الّم یک یا دو کسے ایران ءَ پہ روزگارا رَوت ءُ کئیت۔ گُڑا ھمے گُش ایت کہ من کراچی ءَ سنگتے ءِ آروس ءَ شُتگ آں۔ دْرست ھیران بَنت کہ کراچی ءَ چون نیٹورک ءَ کار نہ کُرتگ کہ تئی موبائل بند بوتگ۔ گُڑا پسّو دَنت کہ من کڈّیں جاگھے ءَ بوتگ آں۔ دِل ءِ تہ ءَ مُلّا متلب ءَ سکّ زاہ ءُ بَد کنت کہ چہ ھمائی سوب ءَ راز ئِے پاشک بوتگ اَت۔
چہ ھمدا پیسلہ کَنت کہ کوہ ءِ وھد آھتگ نوں شھر ءَ نندگ ءُ کار کنگ نہ بیت۔
دہ روچ ءَ پَد چہ گِس ءَ درکپ ایت کہ اوتھل ءَ رواں، کھول ءِ مردُم سکّ باز گوش اَنت کہ نوں وانگ ءَ مہ رَو، بلے آئی ءَ وانگ ءِ نام ءَ پند ءُ ژند، واری بزّگی، تُنّ ءُ گُژن ءِ راہ ءَ روگ ءِ پیسلہ کُرتگ اَت۔ چہ گِس ءَ درکپ ایت اوتھل ءَ زاھِر نہ بیت۔ اے بری من ءَ ھم ھال ئِے نہ داتگ اَت کہ آئی ءَ پہ مُدامی بلوچ ءِ کوہ وتی کلات ءُ ھنکین جوڑ کُرتگ اَنت۔

من آئی ءِ ودار ءَ اِت آں، من ھمے پھم اِتگ اَت کہ وتی وانگ ءَ نیم بُندگ نہ کنت۔ بلے آ نہ یتہ آئی ءِ ھال رس اِت کہ کوہ ءَ ￴اِنت۔
سَباہ ءِ کوہ ءِ روگ ءِ ھال اَت کہ منی دِل چہ وانگ ءَ سِست اوتھل پہ ورگ ءَ آیگ ءَ اَت۔ پرچاکہ سَباہ ءِ وڑیں ھم ھیالیں سنگت دست کپگ ءَ نہ اَت۔ من زانتگ اَت کہ اگاں نیٹورکے ءَ بیت الّم گوں من ھال ءُ ￶ھوال کَنت، گُڑا من ھم وتی بُنڈکاں بنداں درکپ آں پہ بے نامیں دیاراں۔
مزنیں وھدے ءَ پَد پیسبُک ءَ پمّن کلوھے آھت۔ پروپائل نام “بلال بلوچ” اَت ءُ شھید کمبر چاکر ءِ اَکس جنوک اَت۔ یکّ ءُ دو میسج ھال ھوال دات ئِے ءُ گُشت ئِے من باندا گوں تو ھال ھوال کن آں۔ تنا وھدی کہ منی میسج “وتی پجّار ءَ پکن” آچہ نیٹورک ءَ ڈنّ اَت۔ من تیوگیں روچ ھمے جیڑگ ءَ اِت آں کہ آیا اے سَباہ اِنت یا دگہ یکّے۔ منی ششمی مارشت ھمے گُشگ ءَ اَت کہ بہ بیت اے سَباہ بیت دگہ کسّے نہ اِنت۔
دومی روچ ءَ من وانگ ءَ نہ شُت آں وتی کوٹی ءَ لیپ ٹاپ دیم ءَ ایر کُرت ءُ پیسبک پچ کُرت ودار کُرت۔ اے تیوگیں روچ گْوست بلے آئی ءِ تُکّ ءُ توار نیست اَت۔ داں ماھے ھمے وڑا من ودار ءَ اِت آں۔ ھر نیمگ ءَ سنگتے ءِ ھال بوتیں من آئی ءِ جُست الّم ءَ کُرتگ اَت۔ پدا یکّے ءَ من ءَ گُشت کہ آ شورّ ءِ نیمگ ءَ اِنت۔ اے وھد ءَ شورّ ءَ بی ایل ایپ ءِ اوتاگ نیست اَت۔ من ھیران اِت آں کہ سَباہ شورّ ءَ چے کنگ ءَ اِنت۔۔۔
پروری 2013 ءَ شورّ ءِ نیمگ ءِ سنگتے ءَ گوں رھوت بوت گُڑا ھمائی من ءَ ھال دات کہ سَباہ ھمد ءَ ￴ اِنت۔۔ من ھمے سنگت ءَ را گُشت کہ سَباہ را بُگُش گومن ھال بہ کن۔ سنگت ءَ گُشت دو سئے روچ ءَ پَد من ھما نیمگ ءَ رواں تئی کلوھاں سر کناں۔ بلے دومی روچ ءَ ھمے سنگت نیٹورک ءَ آھتگ اَت ھال ئِے دات کہ شورّ ءِ اوتاگ ءِ سرا کُشندہ ٹولی ءِ مردُماں اُرش کُرتگ اُرش ءِ آسر ءَ سنگت ھکّ نواز شھید بوتگ ءُ سَباہ گار اِنت۔ سَباہ انگیر ءِ نْیام ءَ بوتگ انچوش گمان بیت شھید بوتگ۔

روان اِنت