نبشتہ کار: ڈاکٹر بلوچ
چہ درستاں پیسر من زرمبش ءِ پولکار ءُ زانتکاراں مراد بات گْوشاں کہ زرمبش ءِ یک لک رندگیر بزاں سبسکرائیبرز سرجم بوتگ ءُ بلوچی زبان ءِ اولی ءُ مستریں چینل جوڑ بوتگ۔ چوناھیا اے دگنیا ءِ توکا لکّانی ھساب چینل ھست آیاں وڑ وڑیں آسراتیانی توکا لکانی ھساب ءَ رندگیری گپتگ ءُ من ھم چہ آیاں بازیں چینلے ءِ رندگیری کرتگ، بلے زرمبش چہ آ دگہ دراھیں چینلاں من ءَ دوست تر بیت۔
من زرمبش ءَ اے چیز ءَ دوست نہ داراں کہ آئی ءِ یک لک رندگیر کنوک اَنت، من چہ زرمبش ءَ باز چیز دربرتگ۔ زرمبش ءِ رندگیری ءَ من ءَ پائدگ رس اِتگ۔ اِنچو چیز من چہ زرمبش ءَ دربرتگ، چہ آ دگہ چینلاں در نہ بُرتگ۔
زرمبش ءِ رندگیر ءِ پائدگاں چہ لھتیں پائدگ ایش اَنت:
اولی پائدگ من ءَ ھمے رس اِتگ کہ من ءَ وتی جند ءِ زمین ءِ بارہ ءَ سرپدی رس اِتگ، من پیسر ءَ بلوچستان ءِ ھنکین ءُ جاھانی نام باز کم زانتگ ءُ اُود ءِ مردمانی بارہ ءَ ھم نہ زانتگ کہ آ چونیں جاورے ءَ زند گْوازینگ ءَ اَنت، چونین زلم ءُ زوراکی ءِ آماچ اَنت۔
دومی پائدگ ھمے رس اِتگ وھدیکہ زرمبش ءِ نبشتانکے ءُ کلوھے من ونتگ، من درونت دوبر ءَ یات گپتگ اَنت۔ من بلوچی درونت ونتگ اَنت، پد ءَ نبشتانک چار اِتگ، کجام درونت کجام جاہ ءَ کارمرز بوگ ءَ اِنت۔
سیمی من بلوچی ھما گال یات گپتگ اَنت کہ ھمایان ءَ نوکیں نام ءَ آرگ ءُ رواج دیگی بوتگ، بزاں آئی جاہ ءَ دگہ نوکیں گال آرگ بوتگ۔ وھدیکہ نوکیں چیز کئیت آئی ءَ بلوچی نام پِر کنگ ءُ دیگ، من آیانی نام چہ ھمد ءَ ھیل گپتگ۔
زرمبش ءِ زانوگِراں من ءَ ھما چیریں ھال آؤرتگ ءُ رسینتگ کہ ھمائی بارہ ءَ من کدی نہ اِش کتگ ءُ ناان کہ دیستگ، یا دگہ چینلے ءَ دیم ءَ آؤرتگ۔
یک رندے من چہ بلوچی وانگ ءَ دلپروش بوتگ اِت آں، وھدیکہ من ھنیپ شریپ ءِ تواربند ءُ ناگمان ءِ چینل ءِ توک ءَ تامرے دیستگ، آ سید ءِ رھبند ءَ گوں رومن آباں نبیسّگ ءَ ھیل دیگ ءَ اِت اَنت۔ من ھمے پھم اِت منی وانگ بے بزانت اِنت، من باز وھد ءَ بلوچی وانگ ءِ جند یلہ داتگ اَت۔ رند ءَ من اچانگ ءَ ھمے زرمبش ءِ بارہ ءَ جیڑ اِت، اگاں رومن جْوانتر ءُ ارزان بوتیں زرمبش ءِ زانوگراں وتی کلوہ گوں بلوچی ءِ زگریں آباں دیم نہ داتگ اِت اَنت.
زرمبش ءَ تھنا بلوچی ءِ دیمروئی ءِ واستا وتی کِرد پیلو نہ کرتگ، بلکیں بلوچستان ءِ آجوئی ءِ گپّ دیم ءَ آؤرتگ ءُ سرپدی داتگ پہ نودربراں یک درسگاھے۔
یک رندے پد ءَ من زرمبش ءِ براس ءُ گوھاراں مراد بات گْوشاں، چہ ھاوند ءِ درگاہ ءَ دُوا لوٹاں کہ شاھیں کادِر آیان ءَ گیشتر سوبین بہ کنت۔ جنزان بات اِت، ھمے وڑ ءَ دیمروئی کنات اِت.
