نبشتہ کار: گیابان بلوچ
مُدتے ءَ رند من گوں آئی ءَ دُچار کپت آں، منی دستے گپت ءُ منی دیم پہ دیم ءَ نشت۔ منی دست اِش زُرت اَنت گوں وتی دستاں ءَ کُت اَنت ءُ گوں وتی نگاھاں منی باتن ءَ اِیر کپان بوت۔ آئی ءَ گوں وتی نگاھاں منی اندر ءِ پولگ بنا کُت، باریں آ منی تہ ءَ چے شوھاز کنگ اَت، بلے ما ھر دو بے توار اِت اِیں۔ من کہ آئی ءِ چم چار اِت اَنت، آئی ءِ ابیتکیں نگاھاں سک باز کسّہ مان اَت۔ دُرستیں کسّہ چہ درداں سرّیچ اِت اَنت۔
مھر ءِ کسّہ ، درد ءِ کسّہ ، جتائی ءِ کسّہ ، پہ کسے ءِ دوراں گریوگ ءِ کسّہ ، شپ ءِ تھنا نندگ ءُ گوں وت ءَ ھبر کنگ ءِ کسّہ ، ھمے رنگ ءَ آئی چمّانی تہ ءَ سک باز دردناکیں کسّہ ءُ جُست ھست اَت۔ آئی چمّانی تہ ءَ من اے ھم دیست کہ اے چمّاں پہ من ءَ باز گریتگ۔ من اے ھم دیست کہ اے چم پہ من ءَ باز شپ ءَ بے واب بوتگ اَنت۔ آئی چمّانی تہ ءَ منی مات ءِ درد ھم پدّر اِت اَنت کہ آ پہ من گریوگ ءَ اَت۔ آ پہ من گمیگ اَت ، آ پہ من بے واب اَت۔ آ شپ ءُ روچ بس منی واستا جیڑگ ءَ اَت۔
آئی چم اَچ من ءَ سک باز جُست کنگ ءَ اِت اَنت۔ آئی چم اَچ من ءَ سک باز پسّہ ءِ تلبگار اِت اَنت۔ آئی چم من ءَ جُست ءَ اِت اَنت کہ من پرچا آ یل کُتگ؟ من پرچا آئی ءِ مھر دْروہ اِتگ؟ من پرچا بے ھیال کُتگ کہ من ءَ چو ساہ ءِ وڑ ءَ دوست بوتگ اَت؟ من پرچا یک رندے ھم آئی ءِ ھال نہ پرس اِت؟ آ کے بوتگ اَت کہ من ءَ چہ آئی ءَ دوست تِر بوتگ اَت؟ آ کے بوتگ اَت کہ من ءَ چہ وتی مات دوست تِر بوتگ اَت؟ آ کے بوتگ کہ پہ آئی ءَ من وتی دُرستیں دوست ءُ ھمبل شموشتگ اَنت ءُ بس پہ ھمائی ءَ رپتگ اِت آں؟ من آئی ءِ چمّاں وانان ءُ آئی ءِ دُرستیں درداں ماران اِت آں۔ من آئی ئے ءُ آ منی اندر ءَ انچوش گار اَت کہ ما ھِچ ءِ سما ءَ نہ اِت اِیں۔
ھمے ساھت ءَ آئی ءَ را کسے ءَ توار کُت، من ءُ آ ھردو چہ ھیالانی جنگلاں واتر بوت اِیں۔ من دیست آئی ءِ چمّ ارس اِت اَنت، بلے آ وتی ارساں چیر دیگ ءَ اَت۔
باریں چی ءَ آئی ءَ من ءَ ھچ جُست نہ کُت۔ باریں چی ءَ آئی ءِ چمّاں سک باز جُست مان اَت، بلے آئی ءَ یک ھبرے ھم نہ کُت۔ باریں پرچا آئی ءَ زبان ءَ یک ھبرے ھم در نیاتک۔ بس روگ ءِ وھد ءَ منی دست ءَ یک سَے رنگیں بندیکے بستگ اَت ءُ آئی ءَ منی دست چُک اِت ءُ گْوشت ئِے ”وتی ھیال ءَ بدار منی اروہ “۔
آئی ءِ روگ ءَ چہ پد من سک باز جیڑ اِت ءُ سک باز تکانسر اُوں بوت آں کہ پرچا آئی ءَ من ءَ ھچ جُست نہ کُت۔ بلکیں منی گندگ ءَ گوں آ سرپد بوتگ اِت کہ من پہ کَے ءَ آئی ءَ را یل کُت؟، آ سرپد بوتگ اَت کہ من پہ کَے ءَ وتی مات یل داتگ، ءُ من پہ کَے ءَ آئی ءَ وتی دُرستیں ھمبل شموشت اَنت، بلکیں منی گندگ ءَ گوں آئی ءَ را آئی ءِ دُرستیں جُستانی پسویے رستگ اَت۔
