نِبشتہ کار: ھمّل نورا
پروپیگنڈہ چونائی ءَ ردیں گالے یا کارے نہ اِنت، بلکیں یک بیانیہ ءِ دیم ءَ برگ ءِ ھاتر ءَ کارمرز کنگ ءُ مھلوک ءَ سر کنگ ءِ اَمل ءِ نام اِنت۔ ما بہ چاریں کہ دنیا ءِ تہ ءَ کجام ھم راجے توری آ اِیردست، وتواک یا کہ سامراج ءِ دْروشم ءَ بیتگ ، گُڑا آئی ءَ وتی ھاکمی برجاہ دارگ ءِ ھاتر ءَ یا مھلوک ءِ موبلائز کنگ ءِ ھاتر ءَ پروپیگنڈہ کُتگ ءُ پروپیگنڈہ یک مزنیں سِلاھے بیتگ ءُ ھست اِنت۔
مروچی بلوچ پنچمی INSURGENCY ءَ گوں مھکمی ءَ جنزگ ءَ اِنت ءُ ایشی ءِ تہ ءَ پروپیگنڈہ باز کم گندگ ءَ کئیت ، البت ءَ رسانکدر ءِ مزنیں کردے ھست۔ ما اگاں گْوستانک ءَ بہ چاریں گُڑا مارا سک باز کم زْرمبشت دست کپ اِیت کہ آیاں بید ء پروپیگنڈہ ءَ وتی وتواجھی دوبر گپتگ ءُ دومی نیمگ ءَ مارا باز کم اے وڑیں سامراج گندگ ءَ کئیت کہ بید ء پروپیگنڈہ ءَ آئی دومی راج ءِ لُٹّ ءُ پُل کُتگ۔
وھدے کہ سامراج ءَ گوں گوریلا جنگولاں دیم پہ دیمی جنگ کُت نہ کُتگ گُڑا آئی ءَ دُروگیں پروپیگنڈہ کُتگ۔ پہ درور امریکہ ءُ پرانس ءَ بہ گر داں انوں ما پاکستان ءَ بہ چاریں یک لبزے سک باز کارمرز بوت دھشتگرد اَت، بزاں ناشرکار۔ اے لبز ءَ تو گْوشت کن ئے کہ ھر زْرمبشت ءِ بگیری ءَ سامراجاں کارمرز کُتگ، چوناھیا سامراج وتی ھاکمی ءِ برجاہ دارگ ءِ ھاتر ءَ پروپیگنڈہ کنت ءُ ھمے وڑ ءَ ما بہ چاریں ایردستیں راج ھم وتی وتواجھی ءِ دوبر گِرگ ءِ ھاتر ءَ دُرستاں چہ پیش وتی مھلوک باسما کنگ ءِ جھد ءَ کنت ءُ اے باسمائی ءِ کار ءَ پروپیگنڈہ کنت۔
ما اگاں گوستانک ءَ چمشانک ءِ بہ دے اِیں گُڑا مارا اے وڑیں بازیں راجے دست کپ اِیت کہ آیاں چہ پروپگنڈہ ءَ وتی وتواجھی دوبر گپتگ، بلے آ ھما پروپیگنڈہ کنوک ءِ سر ءَ اِنت کہ آ چوں وتی مردُماں PROPAGATE کنت، بزاں آ چوں وتی مردمانی دلگوش ءَ وتی نیمگ ءَ کار اِیت یا کہ وتی بیانیہ ءَ کُجام وڑ ءَ مردمانی دیم ءَ اِیر کنت کہ چہ آئی ءَ مردُم کنوینس بہ بہ اَنت۔ پروپیگنڈہ باز رنگ ءَ کنگ بیت، بلے مروچی fifth generation warfare توکا گیشتر رسانکدر ءِ سر ءَ کنگ بیت اِنت۔ مرچی باندا بلوچ ءِ جھد ءَ پروپیگنڈہ سک باز المی اِنت، بلے پد ءَ گپ کئیت چونیں پروپیگنڈہ؟ ھما وڑیں پروپیگنڈہ کہ بلوچ ءِ جھد ءَ پائدگ بہ دنت۔
نوں گپ کئیت رسانکدر ءِ بزاں میڈیا ءِ کہ چہ اِشی ءَ ما یک دومی ءَ اھوالکاری یا وت ماں وت نزیک بیت کن اِیں۔ پرے واستا رسانکدر راجمان ءِ تہ ءَ یک مزنیں تاکتے زانگ بیت۔
چوش کہ پروپیگنڈہ ءِ دیم ءَ برگ ءِ ھاتر ءَ رسانکدر المی اِنت ، تو گْوشت کن ئے کہ رسانکدر ءِ کارمرز کنگ ھما اَمل ءُ کار اِنت کہ ابید رسانکدر ءَ مروچیگیں دور ءَ پروپیگنڈہ کنگ یا آئی ءَ دیم ءَ برگ ناسرجم اِنت۔ اگاں ما گْوستانک ءَ بہ چاریں کہ پیسرگیںINSURGENCY بہ بہ اَنت یا کہ سیاسی گل آیانی بے سوبی ءِ یک سببے ءِ رسانکدر ءِ نہ بَگ بیتگ ، پہ درور ما بہ چاریں 1971 ءَ چمالنگ ءَ ھزاراں بلوچ کُشگ بیت ءُ برگ بیت، بلے ھمے رسانکدر ءِ نہ بوَگ ءِ سبب ءَ مروچی گیشتریں بلوچ راج اے گپّ ءَ بے سما اِنت۔ ھستیں وھد ءَ بلوچ ءِ رسانکدر گوں کمیں وسائل ءَ سک باز شر اِنت۔
ما بہ چاریں بلوچستان ءَ انٹرنیٹ ءِ سر ءَ بندش اِنت، نیٹ نیستی ھساب اِنت باز ھند ءُ دمگاں نیٹ ءِ نام نشانے نیست، بلے بلوچ انگت وتی توار ءَ سر کنگ ءَ اِنت۔ چہ رسانکدر ءَ آشوب آرگ بوتگ کہ درور ارب اسپرنگ اِنت، بلے بلوچ رسانکدر ھم انوگیں وھد ءَ ھر گِس ءَ سر اِنت، ھر گِس ءَ زرمبش گوشدارگ بیت۔ بلوچستان ءَ گیشتر مردم ھمک روچی اھوالاں سرپد اَنت کہ مروچی چی بوتگ ءُ رسانکدر ءَ تو وتی ھالاں ھوار وتی لٹریچر ءَ دیم ءَ بُرت کن ئے، پہ درور ما بلوچ ءِ رسانکدر ءِ گپّ ءَ بہ کن اِیں گُڑا مارا زرمبش ءَ ھوار دگہ بلوچ رسانکدری ادارھے ھست اِنت کہ آ ھالانی ھواری ءَ لٹریچر مھلوک ءَ سر کنگ ءَ اِنت؟۔
دلگوش: منی اے نبشتانک ءِ مول ءُ مراد تھنا اے ھم نہ اِنت کہ ایوک ءَ رسانکدر یا کہ پروپیگنڈہ جیڑہ ءِ گیش ءُ گیوار اِنت، بلکیں مستریں چیز اَمَل اِنت۔ ابیدے اَمل ءَ (کار ءِ کنگ ءَ) پروپیگنڈہ یا کہ رسانکدر ھچ درد نہ ور اَنت، پرے واستا اے منّگی اِنت کہ بیدے امل ءَ ھچ نہ بیت۔
