ڈیھ ءِ مُریدیں میرل

نبشتہ; ھلیل بلوچ
ھشتمی بھر

ما جزماں ھَو نسار الّم کہ روچے بیت وتن آجو
ھمے مستاگ منا رستہ اے دنیا متلب ءِ یارے

نوکیں نودربرانی ھاترا دول ءُ چاپ ءِ دیوان اَت۔ ھمے تُربت ءِ سنگت ءَ سَباہ را دیست ھبکّہ ءُ ھیران بوت کہ اے مردُم آ وھد ءَ چو دیم تھار اَت کہ منی سیٹ نہ بیت مرچی نودربرانی رھشونی ءَ کنگ ءَ اِنت۔ مئے کِرّا آھت چو کوچرا کوچرا اَت گوشت ئِے اڑے ھاران ءِ لُچّاں شُما من ءَ ریپینتگ۔ ما دْرستاں کند اِت۔
سَباہ جُنزان اَت۔ آئی ءَ زانتگ اَت کہ باندات ءِ رژنائیں روچ ءِ ھاترا مارا جنگ کنگی اِنت۔ سال ھمے 2012 اَت یک شَپے سباہ ءَ من ءَ میسجے دات کہ کوھنیں ھاسٹل ءِ ڈابہ ءَ بیا، بلے ایوک ءُ تھنا۔

من ھمے پہم اِت کہ زانا کتاب بھر کَنت یا چاکنگ ءِ پروگرامے کُرتگ ئِے۔ من شُت آں چاراں سَباہ ءَ دگہ سنگتے گون اِنت کہ اوتھل شھدربرجاہ ءِ نودربرے نہ اِنت۔
سلام ءُ دْرھبات ءَ رَند سَباہ ءَ گْوشت “من روگ ءَ آں کوہ ءَ پہ جنگی ھُنرانی ھیلکاری ءَ بلے من شیرو ءُ ڈی ایس پی ءِ زیان ءَ گُشتگ کہ من ایران ءَ روگ ءَ آں پہ کار ءُ روزگار ءَ۔”
من یکّے اے چیز ءَ ھیران اِت آں کہ اے من ءَ پرچا ھال دیگ ءَ اِنت دومی ایشی وانگ چون بیت۔
منی سوج ءَ چہ پیسر آئی ءَ گْوشت “من وتی سوچ جتگ۔ کسّے ءَ منی سوج کُرت تو بُگُش کہ ایران ءَ شُتگ۔ من ءَ موہ رس اِت من وت ترا ھال کناں۔”
دومی روچ ءَ سَباہ ءُ سنگتے پہ مھرانی دَیار ءَ درکپت اَنت۔ سَباہ یک انچیں کارستے اَت کہ زِند ءِ ھر پِڑ ءَ آئی ءَ وتی جاگہ انچو جوڑ کُرتگ اَت کہ آ ساڑی مہ بوتیں آئی ءِ جاگہ ھالیگ اَت۔ ھرکسے ءَ گوں ڈیکّ بہ وارتیں آئی ءِ جُست ھمیش اَت کہ سَباہ کُجا اِنت۔ منی کوشست ھمیش اَت کہ آئی ءِ کھول ءِ مردُماں ھال مہ رس ایت۔
من مُدام ودارا اِت آں کہ بلکیں اناگہ آئی ءِ میسجے بیت، بلے ھِچ پہ ھِچ۔ اندازگ چِلّ روچ ءَ پد ما لھتیں سنگت یوسپ ازیز مگسی ھاسٹل ءِ دیم ءَ ناکو دلسرد ءِ ڈابہ ءَ نشتگ اِت ایں کہ سَباہ چہ دُور ءَ زاھِر بوت پند ءَ آیگ ءَ اَت۔ سَباہ ءِ گندگ ءَ گوں تارک ءُ گُپران شاہ کُوکار ءَ لگّ اِت اَنت کہ گاریں مردُمے پیداگ اِنت۔
سَباہ ءِ مُود بوژّ اِت اَنت اندازگ موٹر سائیکل ءِ سرا مزنیں سپرے جتگ اِت ئِے۔ ما زور پہ نندارینت چاھے وارینت۔ آدگہ سنگت نشتگ اِت اَنت سَباہ ءِ گوما من ھم پاد آھت آں شُت ایں کوٹی ءَ۔ اودا مُلّا متلب وپتگ اَت تنکّیں لُنگے پِر ئِے داتگ اَت۔ سَباہ سکّ زھرا اَت ھمیشرا سکّ بد ءُ ردئِے کُرت، بلے آئی ءَ وتارا واب کُرتگ اَت ھِچ تُکّ ءُ نُکّ ئِے نہ کُرت۔ سَباہ کہ جان ءِ شودگ ءَ شُت مُلّا پاد آھت گوشت ئِے من دْراھیں گَپّ اِشکُت اَنت۔
بیگاہ ءَ من ءُ سَباہ کوھنین ھاسٹل ءَ روگ ءَ اِت ایں کہ اودا شھید امتیاز پنّام دلوش مئے ودارا نشتگ اَت۔ من سَباہ را جُست کُت “ھیر اِنت مُلّا ءِ سرا زھر گِپتگ ئے؟”
آئی ءَ درّائینت “یار! ایشی دَپ ءَ گَپ نہ اوشت ایت، ایشی وتی پِسّ ءَ را گُشتگ کہ سَباہ گار اِنت، پدا ایشی پِسّ ءَ منی پِسّ ءَ را گُشتگ کہ تئی زھگ گار اِنت۔ دْراھیں جاگہ ءَ من ءَ پٹّ اِتگ اِش، نوں پمّن شھر ءِ تہ ءَ ￴ نندگ سکّ گْران اِنت۔”
امتیاز ءِ گون ءَ ما نِشت چاہ وارت پدا من وتی کوٹی ءِ نیمگ ءَ شُت ایں۔
لھتیں روچ ءَ پَد سمسٹر ءِ نْیامجین ءِ چکّاس بوت اَنت۔ چکّاساں پَد دہ روچ ءِ چُھٹّی ءَ ھر کَس وتی دمگاں شُت ما ھم شُت ایں سَباہ گوما ھمراہ اَت۔ بلے واتری ءَ نا سَباہ ءِ ڈسّ ءُ نشان اَست اَت نئیکہ امتیاز دلوشّ ئے۔

روان اِنت