نبشتہ کار: کیّا بلوچ
زرمبش بلوچی ءِ ھما رسانکی اِدارہ اِنت کہ مروچی سرجمیں بلوچستان ءَ (روکپتی ءُ رودراتکی) بگر داں مزن ھور ءُ یورپءَ وانگ ءُ گوشدارگ بیت۔زْرمبش ءِ کِر ءَ گالانی یک ٹوھیں ھمبارے ھست۔ زرمبش ءَ پہ بلوچی ءِ گوگل ءِ تہ ءَ آرگ ءَ وتی گالانی ھمبار یکجاہ کتگ ءُ داتگ۔
ھمے سال ءَ زرمبش ءَ نوہ سال سرجم بوتگ کہ یکشل ءَ کار کنگ ءَ اِنت۔من پہ پھر گْوش آں کہ اے ھما ادارہ اِنت کہ پہ بلوچی زبان ءَ یکشل ءَ وتی کارئِے برجم داشتگ ءُ دیم ءَ روان اِنت۔
زرمبش ءَ بازیں جنجالاں پد ھم وتی کار نہ داشتگ اَنت۔ یک دیمے وتی مردمانی شِگان ءُ شاپگ ءُ دومی نیمگ ءَ دژمن ءِ چم ھم ھمے زرمبش ءِ ھر روچیگیں کارانی سر ءَ سک اِنت۔ پیس بک ءُ ٹیوٹر (ایکس ) ءِ بند کنگ ءَ بگر داں یوٹیوب ءِ ھر دومی ویڈیو ءِ رپورٹ کنگ ءِ چینل ءِ بند کنگ ءِ بیھار ءُ ایڈانی بند کنگ انگت برجاہ اِنت۔بلے ادارہ ءِ سنگتاں گوں دُرسیں جیڑہ ءُ جنجالاں ابید وتی کار برجاہ داشتگ اَنت۔
من نہ لوٹ اِت کہ اے چاریں لبزاں نبشتہ بہ کناں بلے دوستانی شگاناں مجبور کُت کہ لھتیں گپ ءُ ھالانی بابت ءَ وتی وانوکاں سرپد بہ کناں۔
من نزاناں شما سرپد اِت اگاں نہ بلے گْوستگیں دو سال بیت کہ کازی ریھان زرمبش ءِ ھچ گروپ ءُ نیوز ڈیسک ءَ ھوار نہ اِنت۔ ھما اِنت کہ زرمبش ءِ کارمستری ءِ زمہ واری من ءَ دیگ بوتگ گڑا ھما اولی روچ ءَ من منزور بسمل ءُ گوں ڈاکٹر ناگمان ءَ ھال ءُ اھوال کتگ کہ بیا اِت زرمبش ءِ ھما لبزانی سرا کہ شمارا اتراز اِنت شما گْوش اِت کہ جِنّی زبانے کازی ءَ جوڑ کتگ ۔ آیاں بدل کنیں ءُ پہ زرمبش ءَ انچیں زبانے رواج دئیں کہ ھام مھلوک ءِ پھم ءِ زبان بہ بیت۔ کارمستر مناں ءُ شمے دیم ءَ کس مان نہ تر ایت۔
بندات ءَ بازیں لبز ءُ گالردانی بابت ءَ منزور ءُ ڈاکٹر ناگمان ءِ گْوشگ ئے پد ءَ رد ءُ بدل کُت اَنت۔ وھد پہ وھد منزور ءُ ناگمان ءَ لبزانی رجانک کنگ ءَ زرمبش ءِ کمک ھم کتگ۔ ما انگت ھمے امیت ءَ داریں کہ اے سنگت زرمبش ءَ دیم ءَ ھم ھمے رنگ ءَ وتی کمکی کاراں برجاہ دار اَنت۔
ھمے 13 نومبر ءِ شھیدانی روچ ءِ درگت ءَ ھما پارٹی اسیٹمنٹ کہ مارا دیگ بوتگ انت ما ھمایانی وڑا شنگ کتگ اَنت۔ ماں شھمیر ءِ لبز بدل نہ کتگ ءُ چہ وت شھید نبشتہ نہ کتگ۔ ھمے روچ ءَ بی ایل ایپ ءَ ھم یک بیانے دیم داتگ بوتگ کہ آئی ءِ سر ءَ شھید نبشتہ اِنت۔ زرمبش ءَ ھم شھید نبشتہ کتگ۔ (پہ درور شما وت شت ءُ چار اِت کن اِت)
ھمے شھمیر ءُ شھید ءِ لبز ءِ سرا مئے وت ماں وتی دیوانے ءَ ڈاکٹر ھنیپ ءُ ڈاکٹر ناگمان ءَ باوست کتگ ات کہ بائد شمھیر ءُ شھید ءِ لبز زورگ بہ بنت یا نمیران زورگ بہ بیت؟ گڑا ڈاکٹر ناگمان ءُ منزور ھمے گپ ءَ ات کہ شھید رواج گپتگیں لبزے ءُ بائد ھمے زورگ بہ بیت ءُ ڈاکٹر ھنیپ ھمے گشگ ءَ ات کہ بائد نمیران زورگ بہ بیت۔ نوں گپ ھمدا بندات بوت ءُ زرمبش ءِ گٹ ءَ کپت کہ زرمبش وتگڑیں لبز رواج دئیگ ءَ اِنت۔
شمھیر ءُ شھید ءِ لبز بہ بیت یا کہ دگہ لبز ءُ گالرد بہ بنت۔ زرمبش ءَ کدی ھم نہ گشتگ کہ منی لبز ءُ گپ گُڈی انت۔ ھرچی کہ زرمبش ءَ شنگ بیت آ لبز یا گالرد راست انت۔ ما بلوچی ءِ نودربریں۔ ماں مدام جار جتگ ءُ گشتگ کہ کسے پہ زرمبش ءَ کار کنگ لوٹیت آئی ءَ ماں وش اتک کنیں۔
لھتیں روچ اِنت کہ سوشل میڈیا ءَ زرمبش ءِ بگیری ءَ ھرکس ھرچی پہ کَست ءُ یا پہ زبان دوستی نبشتہ کنگ ءَ اِنت۔ مارا درست پہ سر ءُ چم، ما آیاں وانگ ءُ وتی کارانی گھتر کنگ ءِ جُھد ءَ کنگ ءَ ایں۔ زرمبش ءِ جھد ھم ھمیش اِنت کہ آ گیشاں چہ گیش وتی مھلوک ءِ تب ءَ بدار ایت۔
ما ھم زانیں کہ بازیں ردی ھست، ادارھانی تہ ءَ مردم کار کن اَنت، آیانی دست ءَ ردی بیت ءُ نزوری ءِ گنجائش ھم مدام ھست اِنت۔ بلے مئے جُھد مدام ھمیش اِنت کہ مردمانی سلاہ ءُ شورانی پد ءَ وتی ردی ءُ نزوریاں بگر ایں۔ پہ اے کار ءَ مارا مدام وتی وانوک ءُ گوشداروکاں ھوار بلوچی زبان ءِ لبزانکار، زانوگر ءُ سوھویں مردمانی کمک پکار بیت۔
