نبشتہ کار: مومن کازی
من ءَ کمو یاد بیت کہ من شھید انور بلوچ پنام ء پِدا جان ءَ 2011 یا 12 ءَ دیستگ اَت، بلے من نہ زانتگ کہ اے پِدا یک انچوکیں مزنیں کردے ءِ واھند اِنت۔ بلے من ھمے سرپد باں کہ منی یک وش بھتیں مردمے ءَ آں کہ من پِدا جان گونگیں کردے ءِ اھد ءَ زندگ بوتگ آں۔ من پمیشکا وت ءَ نزور ھم گوشت کن آں کہ من پدا جان ءَ آئی زند ءَ انچو نہ پھم اِتگ۔ بس من آ تھنا چہ نام ءَ زانتگ، اے سما نہ بوتگ کہ ھمے لاگریں مرد گوں وتی پَٹَکِیں بالاد ءَ یک کوھیں کردے ءِ واھند اِنت۔
مرچی ھما شھید پدا جان ءِ کوھیں کرد ءِ برورد اِنت کہ من ءَ مرچی پہ آئی کرد ءِ زانگ ءُ وانگ ءَ لاچار ئے کرتگ۔ اگاں مردم اے کسان بالاد ءِ کوھیں کرد ءِ سر ءَ چینچو کتاب نبشتہ بہ کنت ھم کم اِنت۔ آئی شھیدی ءِ ھال گوں من ءَ ھوار پہ سرجمیں بلوچ راج ءَ یک گرانیں ساھتے اَت۔ وھدے کہ اے گپ منی گوشاں کپت، من سکا جیڑ اِت کہ من چی ءَ گوں آئی زند ءَ نزیک ءُ انچو درستی نہ بوتگ آں۔
وھدے کہ چہ سبا پبلیشر ءِ نیمگ ءَ یک کتابے ءِ اکس منی دیم ءَ گوست، من چار اِت کہ اے ھما مزن کرد ءُ پَٹَک بالدیں مرد ءِ اکس جنوک اِنت۔ گڑا من چار اِت کہ اِشی نبشتہ کار منی اُستاد ءُ رھشون سرباز وپا اِنت۔ گڑا من گیشتر ءَ وش بوت آں، چی ءَ کہ شھید پدا جان ءِ بابت ءَ من ءَ سرپد بوگی اَت ءُ سرباز وپا مئے نزیکیں سنگت ئے۔ اے درگت ءَ بس یک ودارے منی ھمراہ اَت ءُ ھمے چیز ءَ بے چاڑ اِت آں کہ من ءَ اے کتاب چون ءُ چہ کج ءَ دست کپ اِیت۔
چہ ھما روچ ءَ من اے کتاب ءِ پٹ ءُ پول بندات کرت، اے سنگت ءُ آ سنگت ءَ را ھال کرت باریں اے کتاب کج ءَ دست کپ اِیت؟ گڑا من ءَ سنگتے ءَ ھال کرت کہ اے کتاب شال ءَ ھست پہ تو گران ءُ دیمے دیاں۔ چہ سنگت ءِ کمال ءُ مھروانی ءَ من ءَ اے کتاب زوت دست کپت داں دو روچ ءَ من ءَ سر بوت۔
اے کتاب ءِ دست کپگ ءَ من سک گل ءَ بال بوت آں ءُ کتاب ءِ وانگ بندات۔ بندات ءَ من دیست کہ اے کتاب ءِ پیشگال بلوچ راجی رھشون واجہ بشیر زیب ءَ نبشتگ۔ اے پیشگال ءَ من ءَ دگہ یک وشی یے بکشات، چی ءَ کہ یک بی ایل ایپ ءِ جنگولے ءِ کرد ءِ سر ءَ بی این ایم ءِ سنگتے ءَ نبشتہ کرتگ ءُ پد ءَ بی ایل اے ءِ سروک واجہ بشیر زیب ءَ اے کتاب ءِ پیشگال نبشتہ کرتگ، گڑا منی ھیال ءَ اے مئے راجی تپاکی ءِ چیدگ اِنت۔
گڑا پیشگال ءِ تہ ءَ واجہ بشیر زیب ءَ سلاہ بندیں جنگ ءِ جند گیشینتگ کہ جنگ چی یے؟ چہ اِشی ءَ پد سرباز جان ءَ گوں ایمانداری ءَ شھید پدا جان ءِ جنگ، جنگی رپک ءُ بھادری نبشتگ اَنت۔ چہ اے کتاب ءِ وانگ ءَ مردم ھمے سما کنت کہ من جنگانی ساھتاں شھید پدا جان ءِ ھمراھان ءُ آئی ءَ جنگ کنگ ءَ گوں وتی چماں گندگ ءَ آں۔ چہ اے کتاب ءِ وانگ ءَ پد من ھمے مار ات کہ گیشتر ھما ورنا گوں جنگی گلاں بندوک اَنت آیان ءَ اے کتاب الّم وانگ لوٹ ایت۔ گڑا آ ھمے گند اَنت کہ شھید پدا جان گوں جنگی ھنر ءُ بھادری ءَ دژمن چون سسائی پروش داتگ ءُ پہ تچگ ءَ لاچار کرتگ۔
چہ سرباز وپا ءِ نبشتہ کرتگیں کتاب جنگولیں پدا ءِ وانگ ءَ پد من ھمے سرپد بوت آں کہ بلوچ ءِ آیوکیں پدریچ ءُ انوگیں ورنایاں پہ جنگی ھنرانی دربرگ ءَ ( چی گویرا کی ڈائری ) ءَ گیش جنگولیں پدا وانگ لوٹ ایت چی ءَ کہ پدا جان وت پہ بلوچاں یک چی گویرا یے بوتگ۔
اگاں ما بلوچ بلوچ جھدکاراں بہ وان ایں ءُ آیانی سر ءَ نبشتہ بہ کن ایں گڑا مارا ھمے سرڈگار ءِ سر ءَ چی، لینن۔ لیلا ھالد۔ کاسترو ءُ ماوزے تنگ ءِ وڑیں کردار دست کپ اَنت۔ ھنچوش بابا مری، نواب اکبر ھان بگٹی، استاد اسلم ءُ پدا جان، ڈاکٹرمنان جان، چئیرمین گلام مھمد، لمہ کریمہ، بانک شاری ءِ رنگ ءَ بازیں کرد دست کپ اَنت۔
انگت ءَ چو بلوچ راجی رھشون واجہ ڈاکٹر اللہ نزر، واجہ بشیر زیب، یا گودی ماہ رنگ ءُ سمی دین ءِ وڑ ءَ مئے نیام ءَ ساڑی اَنت۔ اے وڑیں دگہ ھزاراں سر ھست کہ وتی راج ءِ رھشونی ءَ کن اَنت۔
گڈسر ءَ من ھمے گوش آں کہ سرباز وپا جان تئی ساہ ءَ پرواہ مبات، مدام ھمے رنگ ءَ ءُ چد ءُ گیش نبشتہ کنان ءُ جنزان بات ئِے۔
