نبشتہ کار: نادل شوھاز
شھید مراد جان ءُ شھید میرل جان ءِ یات:
یار من ءَ پھل بہ کن اِت کہ من پہ شُما ھچ کُت نہ کُت، ءُ من گیشیں وانگ ءُ زانگ ھم نہ زاناں کہ پہ شُما چیزّے نبشتہ بہ کن آں۔
بلے ھیر چے کن ئِے یار! من دو ھزار ھژدہ (2018) اتکاں اوتاک ءَ سنگتانی دیوان ءَ، گُڑا من گوں سنگتاں دُرستی نہ اِت آں۔ تنھا مراد ءُ میرل جان ءَ آشنا اتاں کہ من دو ھزار شانزده (2016) ءَ دیستگ اِت اَنت۔
وھد جُنزان اَت، سنگتانی یک یک ءَ سپر ءَ روگ ءُ آیگ اَت۔ سال دو ھزار نوزدہ (2019) اِنت، بلے رمس من ءَ یات نہ اِنت کہ سنگت سپر ءَ شُت اَنت۔ روچ بیگاہ اِنت کہ سنگتاں من ءَ بُرز ءِ کوہ ءِ سر ءَ دیم دات کہ تو برو سنگتانی ھالاں بہ گر، من گُشاد گُشاد ءَ شُتاں ءُ کوہ ءِ سر ءَ لگ اِتاں ءُ واکی ٹاکی کلچ دات کہ گوں سنگتاں ھال کناں، بلے ھال نہ بوت۔
گُڑا من اوتاک ءَ ھال کُت کہ سنگتاں گوں ھال بوگ ءَ نہ اِنت، سنگتے ءَ توار جت کہ موبائل ءِ لین ءَ برو۔
چہ سنگتانی گْوشگ ءَ پد من شُتاں موبائل ءِ لین گپت داں انچو کلوھے اَتک کہ بالگتر ءَ سنگتانی سر ءَ اُرشے بوتگ؟
من ھال اھوال گران اِتاں دگہ کلوھے اَتک کہ مراد ءُ میرل جان شھید بوتگ اَنت، منی موبائل چہ دست ءَ کپت ءُ ھیالاں وڑ وڑ ترانگ اتک۔ من جیڑگ ءَ اِتاں کہ سنگت چون شھید بوتگ اَنت؟ من گوں ھمے ناوشیں اھوال ءَ واتر اوتاک ءَ اَتکا آں۔ سنگتاں من ءَ آپ ءُ چاہ دات اِش ، من دل ءَ ھچ نہ گْوشت۔
ساھتے ءَ پد سنگتاں من ءَ جُست کُت کہ ھالاں بہ دئے چِے ھال اِھوال اِنت؟ ، من چہ تہ ءَ ژند ءُ ھچ پسّو نہ دات۔ سنگتاں پد ءَ من ءَ جُست گپت ءُ من پسّو دات کہ یار مھروان شُتگ سنگتاں!
گوں اے گپّاں ھور گْوشت اِش کہ کَے شُتگ زان ءَ؟ من پسّو دات یار مراد ءُ میرل ءَ مارا یل داتگ، گُڑا سنگتاں گْوشت اڑے یار جنگے چے کن ئے یار!
گُڑا من گْوشت ھو یار!
جنگ بس جنگے، دگہ ھچ گپّ منی زُبان ءَ نیاتک، گُڑا دل ءِ دمک ءُ در ملور اِت اَنت۔ درچک ءُ دار، کوہ ءُ اگار دُرست پُرسیگ اِت اَنت۔ آزمان ءِ ھلک ءَ ماہ ماں مجاں اندیم ءُ ھرکس گوں وت ءَ جیڑگ ءَ اَت۔ کسانیں ساھتے ءَ رند ءَ شھید نسیب جان گوں ارسیگیں چمّاں اتکگ ءُ دردیگیں دلے گْوشت کہ: ” یار! اُوتاک ءِ بچنگدک شُت اَنت، یار! بس چے کن ئے جنگ ھمیش اِنت۔
من ھم دل ءَ جیڑ اِت کہ ھو جنگ ھمیش اِنت، مارا پہ وتی آیوکیں پدریچ ءَ دیمقنی دیگی اِنت داں باندا آ چو مئے وڑ ءَ بدھالیں زند ءِ واھُند مہ بہ اَنت، ءُ شھیدی مھرواناں مُراد بات۔
