نبشتہ کار: دُرّا شاشانی
منی سنگت من چہ تو ھِچّ دِلگْران نیاں، پرچا کہ تو اِد ءَ چہ رپتگ ئِے۔ بائِد ھمیش اَت تو مارا ھال اِھوال بہ کُت اِیں، چی ءَ کہ تئی سنگت پہ تو بے کساس پریشان بوتگ اَنت۔ تئی نمبر اِش ھمروچ جتگ ، چی ءَ کہ تئی مات ءُ پِت، بْرات ءُ گْوھاراں ھمروچ تئی جُست اَچ من ءَ کُرتگ۔ تئی بزّگیں مات ءَ ھمروچ من ءَ جُست کتگ کہ منی زھگ ءَ گوں تو پَون ءُ ھال نہ کُتگ؟، ترا الم پون ءَ ھال کنت کہ تئی دوستیں سنگت ئِے، تو پرچا مارا ھال نہ دئے؟
ھما اِنت کہ تو رپتگ ئِے، بے تئیگ ءَ میتگ ھم ھِچ وش نہ اِنت۔ تو گْوشت بیا اِت وانگجاھے بند اِیں، تو وانگجاہ ءِ بُلاک ھم جتگ اِت اَنت۔ ھما اِنت بلاک کسے ءَ نہ بستگ اَنت ، ھرچ وھد ءَ اَتکگ ئِے شام ءَ مئے لوگ ءَ، تو مُدام گْوشت پُل نان بہ ور ءُ بیا نندیں ءُ دیوان کن اِیں ، ءُ اے شپ پہ وپسّگ ءَ سک مزن اِنت۔
برے برے کہ من گوں وت ءَ مانگیشّ آں گُڑا تو من ءَ سک یات کا ئِے، بلے من زاناں کہ تو واتر نہ بہ ئِے۔ ترا یکّے ءِ مھراں گنوک کُتگ، ءُ تئی مھر گوں ماتیں زمین ءَ اِنت۔ تئی مھر یک وھدے الم آسرے سر بہ اَنت، چی ءَکہ زمین ءِ مھر چہ دُرساں ساپ ءُ پلگار اِنت۔
اے بارو ءَ من ءَ ھبر بوتگ کہ تو گوں وتی زمین ءَ کہ انچو مھر کُتگ، گوں وتی سنگتاں ھم انچوش مھر کن ئِے۔ سنگت من دُوا کناں کہ تو ھرجاہ ئِے وش ءُ سلامت بات ئِے گوں وتی وشیں زند ءَ۔
