نبشتہ کار: زدگ بلوچ
میرل جان پہ زمین دیوانگ اَت، گوں زمین ءَ بے کساس مھر اَت ئِے۔ نچو شے ءَ گوں ھانی ءَ بے کساس مھر بیتگ، ھمے وڑ ءَ میرل ءَ گوں زمین ءَ۔ چوناھیا من میرل جان ءَ گوں بھ دُچار نہ کپتگ آں، بلکیں میرل جان ءِ گوم ءَ گیشتر ھال اھوال سوشل میڈیا ءَ بیتگ۔
من ءَ یات اِنت میرل جان انستگرام آی ڈی یے ھمل دشتی ءِ نام ءَ اڈّ داتگ ءُ شھیدانی اکس ءُ تامُر دات اَنت۔ سنگتانی بزگی ، بیوسی ، در پہ دری ، درُست ماں تھنا یک اکس ءُ تامُرے ءَ داتگ اَنت۔ بلوچ راج ءِ بزگی یا کہ بلوچ گار ءُ بیگواہ کُتگ اَنت، برات ءُ کماش بہ بنت دُرسیں درد ماں سوشل میڈیا ءَ مارا پیش داشتگ اَنت۔
میرل بلوچ یک راج ءُ وتن دوستے اَت، ھر وھد ءَ میرل ما دیستگ پہ بلوچ ءَ کار کنگ ءَ بوتگ۔ ھر وھد ءَ دیستگ کہ جُھد کنگ ءَ اِنت۔ باز رند ءَ سینزدہ نومبر ءَ شھمیریں شھیدانی روچ ءَ وتی راج ءِ کُربان بوتگیں شھیدانی اکس ءُ تامُر گپتگ اَنت ءُ چراگ بال اِتگ۔ ھمیشانی اکس ءُ تامُر ماں سوشل میڈیا ءَ شِنگ ءُ تالان کُرتگ اَنت۔ میرل جان گوں وتی مھروانی ءَ سنتگانی واستا گنوک بیتگ۔ میرل جان چہ کسانی ءَ ھمے رنگ ءَ جُھد کُتگ پہ زمین ءَ ، ھما وھد ءَ پاکستان ءِ پوج ءَ دیوال نبشتہ کُتگ ءُ بیرک مِکّ کُرتگ، میرل جان ءَ دیوال ساپ ءُ آئی بیرک دُور کُرتگ۔ پمیشکا اے ھنر مرچی تچک اِنت کہ میرل جان یک نتُرسوکیں بامردے اَت۔
وھد گْوزان اَت، میرل بازار ءَ پاشک بوت ءُ اُمر ءَ ھم کسان اَت، بلے انگت پہ زمین ءَ جُھد کنگ ءَ اَت ھمے وڑ ءَ دوھزار بیست سَے ءَ دومی ماہ ءِ رمس بیست ءُ چار ءَ ماں ھالاں پیداک اَت کہ مزنبند ءَ یک جنگے بیتگ ءُ ھشت سنگت پہ وتن ءِ پھازگ ءَ ندْر ءُ کُربان بیتگ۔
ھمے جیڑگانی تہ ءَ گمسار اِتاں کہ سنگتانی اکس اتک اَنت، چاراں چریشاں یکّے گْونڈلیں میرل جان اِنت کہ آئی ڈگار ءِ آجوئی ءَ دُژمنیں لشکر ءِ تیر ماں سینگ ءَ جاہ داتگ اَنت۔ اے اکسانی گندگ ءَ پد من وت ءَ شموشت ءُ ھیالاں وڑ وڑیں جیڑگاں سرکش اِت، انچو سما بوت کہ آزمان ماں زمین ایر اتکگ ءُ کیامت اِنت۔
من کہ وتی دلگوش گْور کُت گُڑا میرل جان دیم ءَ زائر اَت، پرچا کہ منی دل ءَ باز لوٹ اِتگ کہ من گوں میرل جان ءَ دُچار بہ کپان ءُ دیوان بہ کناں، بلے بے ریائیں وھد ءَ موہ نہ دات۔
میرل جان تو زان ئِے مرچی ءَ سینزدہ نومبر اِنت، بزاں شھمیریں شھیدانی روچ اِنت۔ من ھمے انتزار ءَ کہ تو پہ مئے واستا شوکیں تامُرے جوڑ کن ئِے ءُ ماں سوشل میڈیا ءَ شِنگ کن ئِے، بلے میرل جان اے بری تئی جند تامُر ءُ اکسے ءِ تہ ءَ دم کشّگ ءَ اِنت۔ مرچی تو ھم گوں اے شھمیریں شھیدانی گوم ءَ ھوار ءُ ترا سُھریں دْروت ندْر کنگ ءَ اَنت۔
