گپ ءُ ھبر: سمّی دین جان
نبشتہ کار: منزور آدل
دوُمی: بھر
دین جان وتی سوچ ءُ پگر ءَ گوں یک مھکُمیں انسانے یک کمٹڈیں سیاسی رھبرے کہ آ ھر وھد ءَ ھر وڑیں جنجالانی دیم ءَ ساڑی ات ءُ پُرّ امیت ات، دین جان وتی چاگرد ءِ کمک کنوکیں مردماں چہ یکے ات، یک ڈاکٹرے ءِ بستار ءَ کُجا کہ آئی ءِ کارجاہ(پوسٹنگ) بوتگ آئی ءَ وتی کُلیں زمہ داری پیلو کُرتگ انت،
دین جان تب ءَ باز وشّ تب ءُ پُرّ مھر ءُ کندوکیں مردمے ات بلے دُرستیں جوانیاں گوں ھوار آئی ءِ تہ ءَ دگہ یک مزنیں جوانی یے ھست ات کہ آ باز رھبند دوست ءُ رھبند ءِ پابندیں مردمے ات ءُ آ وتی کارانی تہ ءَ باز ایماندار ءُ رھبندانی ءُ آ دگہ سنگتاں چہ وھد ءِ پابندی لوٹوکیں مردمے ات، بگندئے باز مردمانی کِرّ ءَ دین جان جزباتی ءُ تُرندیں مردمے زانگ بوتگ بلے آئی ءِ سبب ھم ھمے بوتگ کہ آئی ءِ کِرّ ءَ کانود ءُ رھبند ءِ لگتمال کنگ ناکابلء برداش بوتگ۔۔۔
دین جان ھما انسانانی لَڑ ءَ گوں ھساب کنگ بیت کہ آ ایوک ءَ پہ وت ءَ واب نہ گند اَنت پہ وتی زھگ ءُ کھول ءَ واب نہ گند اَنت، بلکیں آ پہ وتی سرجمیں راج ءَ واب گند اَنت، ھما وابانی سرجم کنگ ءَ پہ وتی زھگ وتی کھول وتی زند ءُ وتی زند ءِ ھر تَک ءُ پھنات ءُ وتی زند ءِ ھر اِیش ءُ وشّی ءُ وتی ھر سیالاں پہ راج ءَ ندر کن اَنت،
بھادُر ءُ ایمانداری ھم دین جان ءِ ھستی ءِ دو مزنیں بھر بوتگ انت، ایشی ءِ یک درورے ایش انِت کہ ھما وھد ءَ دین جان مشکے ءِ ھسپیتال ءَ ڈاکٹر بیتگ اَت،اے ھما وھد اِنت کہ سردار اسلم گیچکی ءِ سر ءَ بیڑ برگ بیت ءُ اسلم ٹپی ئیں جاوراں گوں ھسپیتال ءَ آرگ بیت گڑا اے کیس کورٹ ءَ رؤت اِنت، بیڑ بروک پہ دین جان ءَ بیھار روان دے اَنت کہ تو وتی گُشتگیں بیان ءَ بدل بکن بلے دین جان وتی گپ ءِ سر ءَ اوشت ایت ءُ راست گُش ایت، ھمے راستی ءِ سبب ءَ دین جان ءَ ،،تریٹ،، دمکی ءُ تُرسینگ بوت دین جان داں پنچ سال ءَ وتی الاکہ ءُ وتی گس ءِ مردماں چے دور کنگ بوت بلے آئی ءِ واستا راستی کُلاں پیش ات۔
دین جان ءَ بلوچ ءِ گم بلوچ ءِ درد بلوچ ءِ در پہ دری بلوچ ءِ گُژنگی ءُ بزّگی سک باز مار اتگ، دین جان کدی ھم آ وڑیں مردمے نہ بوتگ کہ یک لَس مردمے وتی لوگ ءَ بیت اِنت، دین جان وتی تہ ءَ زانت ءِ یک درگاھے ات،
ماس ءَ برے برے منی ابا ءَ را گُشت کہ تو پرچا وتی زھگاں توار نہ کن ئے مھر نہ دے ئے آ دگہ پسّ وتی زھگاں ھوار انَت وتی زھگاناں وھد دے اَنت مھر دے اَنت،گُڑا ابا ءَ ھمے گُشت من وتی زھگاں چوں توار بکن آں مھر بدے آں آ زھگاں کے مھر دنت آ زھگاں کے توار کنت کہ آیانی پِت بیگواہ کنگ بوتگ انت شھید کنگ بوتگ اَنت، آ ھمینچو مزنیں مارشت چکاریں انسانے ات۔
روان انت۔۔۔
