بلوچستان ءَ زُورانسری بیگواہ کنگ

نبشتہ کار: سانیہ بلوچ

ھما روچ ءَ کہ تھارگ ءَ آئی زندمان مانپوش اِت ، گُڑا آئی پد ءَ ھچ وڑیں وشیں ساھت نہ دیست ءُ چہ پت ءِ مھر ءَ زبھر اِنت۔
ھو! مرچی ھم مھلب ءِ چم انگت پہ وتی پت ءِ واتر بوَگ ءِ ودار ءَ رھسرے چار اَنت۔ ھما اِنت مھلب ءُ آئی مات یک درد دیمپانیں زندے گْوازینگ ءَ اَنت۔ ڈاکٹر دین مھمد بلوچ کہ آئی ءِ دیم ءَ رُژنے آؤرتگ ات، بلے مرچی آ یک بے تواریں اکسے ءُ بندیگیں بالادے ءِ دْروشم ءَ گیر آرگ بیت۔
مھلب ءِ کماش ڈاکٹر دین مھمد ءَ سرکار ءِ چیریں واکدار 2009 ءَ زوزانسری آوار جن اَنت ءُ بیگواہ کنگ اَنت، ءُ آ اے وھد ءَ ماں ھُزدار ءَ وتی ڈیوٹی ءَ ساڑی بیت۔ ھمے وڑ ءَ پرزانہ رودینی بلوچ ھم چہ ھما بانُکاں یکے کہ آ وتی دوستیں برات ءِ واستا راہ ءُ درانی سر ءَ وداریگ اِنت۔ آ وتی برات ءِ بیگواھی ءَ سکا باز جیڑہ ءُ جنجالانی دیمپان بیت۔ آئی ءِ برات سیپ اللہ بلوچ پولیس ءِ کارمند ءُ ماں ھُزدار ءَ وتی ڈیوٹی ءَ روگ ءِ وھد ءَ آوار جَنگ ءُ زندانی کنگ بیت، مرچی یازدہ (11) سال سرجم بوتگ کہ آئی ھچ وڑیں ھال ءُ اھوالے نیست۔ ھمے نگیگیں جاورانی دیمپانی ءَ آئی ءِ پت جتائی ءِ درداں برداش کُرت نہ کنت ءُ دو ھزار پانزدہ (2015) ءَ وتی ھنکین ءَ بدل کنت۔ ھمے داب ءَ آئی ءِ مات ءَ باز زھمت کش اِت پہ وتی نیگواھیں بچّ ءَ، بلے آئی ھم گمانی دنیا ءَ یلہ دات ءُ دائمی دوار ءَ رپت۔ نوں پہ اے گْوھار ءَ یک نیمگے برات ءِ بیگوائی ءُ دومی نیمگ ءَ مات ءُ پت ءِ روگ ءَ پد تھنائی ءِ مارِشت کہ پہ یک بنی آدمے ءَ سکا تورناک۔

ھمے نگیگیں جاورانی پُژدر ءَ بلوچستان ءَ دہ سال ءَ چہ زُورانسری گار ءُ بیگواہ کنگ یک راجی جیڑھے جوڑ بوتگ، ءُ ایشی ءِ یک دْراجیں ءُ سیاھیں راجدپترے ھست۔ ھما جاہ ءَ کہ بلوچ زالبول نشانگ جوڑ کنگ بہ اَنت، اُود ءَ زُلم ءُ زُوراکی سکا گیش بیت۔ بلوچ زالبول ءِ زُورانسری بیگواہ کنگ ءُ آوار جنگ، باز براں ٹارچر ءُ جنسی بدپَیلی ءِ آماچ بوتگ اَنت۔
اے گپّ ءَ کس رد نہ کنت کہ زرینہ مری نامیں بلوچ زالبول ءُ اُستادے سال دو ھزار شش (2006) ءَ چہ کوھلو ءَ پاکستان ءِ چیریں کارمنداں گوں چُکّ مُراد جان ءِ ھمراھی ءَ آوار جتگ ءُ دنیگا ھِچّ رنگیں ھال ءُ اھوالے نیست کُجا ءُ چون اِنت۔

چوش کہ اُستاد یک وشھالیں بانداتے ءِ جوڑ کنوک اِنت، بلے مرچی زرینہ مرری ءِ وڑیں سرپدیں بلوچ زالبُول ءُ اُستادے پاکستان ءِ ٹارچر سیلاں بندیگ اِنت۔ آئی ءِ ناکو ءَ پہ آئی ءِ یلہ کنگ ءَ زھرشانی ءُ توار چِست کُت، آئی ءَ شُد ھڑتال ءُ کمپئن برجم داشت، بلے آئی ءِ یلہ بوَگ ءِ درگت ءَ اُمیتان نہ اَت۔ کس ءَ آئی ءِ گپّ گُوش نہ داشت اَنت، میڈیا بے مارِشت ءُ ناسھی اَت۔

ھمے وڑ ءَ منیر مینگل وتی زندان ءِ کسّھے نبشتہ کنت، آئی تہ ءَ زرینہ مری ءِ چمّ دیستیں جاوراں دردناکیں رنگے ءَ نبشتہ کنت ءُ گْوش اِیت کہ آئرا منی کُوٹی ءَ بْرھنگی ءَ آرگ بیت ءُ من ءَ ھمے گْوشگ بیت کہ تو زھگے نہ ئے کہ ترا بہ گْوش اِیں کہ گوں اِیشی ءَ ترا چے کنگی اِنت، بلے آ گْوش اِیت کہ من آئی ءَ دپ ءَ مدام ھمے یکّیں ھنر اِش کُتگ کہ ” مُراد جان ، مُراد جان“ ، گُڑا من زانتگ کہ اے زال زرینہ مری اِنت۔ چوش کہ آ اے بابت ءَ وتی نبشتانک ءِ توکا باز دردناکیں ھبر نبشتہ کنت، بلے اے دردناکیں کسّہ ایوک ءَ یک مردمے ءِ نہ اِنت، بلکیں اے کسّہ مرچی تانسریں بلوچ راج ءِ کسّہ اِنت۔

انچوش چہ ڈیرہ بگٹی ءَ ھنیپہ بُگٹی گوں وتی زھگاں آوار جَنگ ءُ بیگواہ کنگ بیت، بلے دنیگا آئی دلجمیں ھالے نیست کہ آ گوں وتی کھول ءَ چون ءُ چتور بوت۔ ھمے وڑ ءَ اَچ بلوچستان ءَ دگہ ھزاراں چوشیں دردیگیں داستان وش آتک کنت، بلے ڈسّ ءُ نِشان زُورانسری بیگوائی اِنت کہ دنیگا برجم ءُ برجاہ اِنت۔ ھمے دْرچ ءِ پُژدر ءَ چہ کراچی ءَ دگہ نُھ (9) نودربر آوار جَنگ ءُ بلوچ بوَگ ءِ جُرم ءَ زندانی کنگ بیت۔
وھدے کراچی ءَ بی وائی سی(بلوچ یکجہتی کمیٹی) ءَ زھرشانی کُتگ، گُڑا زھرشانی کنوکاناں کراچی پریس کلب ءِ دیم ءَ چہ سندھ پولیس ءِ نیمگ ءَ لٹّ ءُ کُٹّ کنگ ءُ بے شرپ کنگ بیت، پرچا کہ بلوچ اَنت۔ پمیشکا پہ بلوچ ءَ اے زند گْرانیں جنجالے، چی ءَ کہ ایردست اِنت۔ اگاں ایردستی ءِ ھلاپ ءَ بلوچ ھمتوار ءُ یکمُشتی ءَ پاد نیاتک، گُڑا رندے گِلگ ءُ پشومانی ھِچّ درد نہ وارت۔ پرے واستا بلوچ پہ وتی وشھال ءُ اِیمنیں باندات ءَ مروچی بہ جیڑ اِیت، اگاں ناں وھد ءِ داتگیں ٹپّ کدی درمان نہ بیت۔