نبشتہ کار: نسار نور
زانتکارے ءِ یک گْوشتنے سک نامدار اِنت کہ ” چہ روباہ ءِ سد سال ءِ زندگی ءَ شیر ءِ یک سالے ءِ زندگی گھتر اِنت “، چریشی ءَ ھمے پدّر بیت کہ کردار ابدمانیں زندمان اِنت، پمیشکا یک جوانیں کردے ءِ واهند ببو کہ چہ تئی مرگ ءَ پد تئی نام پہ دائمی بہ مان اِیت۔ اگاں ما بابا هیربکش مری ءِ زند ءَ بہ چار اِیں گُڑا آ همے زند ءِ واهُند بوتگ۔
بابا 28 پروری 1929 ءَ کاهان ءَ واجہ مھرالله ءِ لوگ ءَ ودی بیت۔ بابا کسانیں شیرمِچیں تپلے بیت کہ آئی مات بیران بیت ءُ چار سال ءَ پد واجھیں کماش هم بیران بیت۔ وهدے یک انسانے اے کودکی ءَ کہ مکھیں مات ءُ آریپیں پت بیران بہ بہ اَنت ، گُڑا زندگی گوں بازیں گم ءُ رنجاں دُچار کپ اِیت ، ناں کہ اے ھبر گوں گالاں نبیسگ بہ اَنت۔
وهد گْوزان ءُ بابا مزن بیت، پہ وانگ ءِ واستا ایچسن کالج (چیپس کالج ) لاهور ءَ روت۔ بابا وهدے کسان بیت بابا ءِ ٹکّ ءِ مردم دُودا هان ( دُودا ھان بابا ءِ ناکو بیت ) ءَ وتی سردار کنت۔ وهد روان کنت ءُ وهدے بابا وتی وانگ ءُ زانگ ءَ سرجم کنت ءُ واتر کئیت، گُڑا وتی ٹکّ ءِ چاگردی ، مالی، رهبندی ءُ سیاسی سردار جوڑ بیت۔ چیزے وهد ءَ پد آ پارلیمانی (بزاں پاکستانی ) سیاست کنت ءُ پارلیمنٹ ءِ ممبرے جوڑ بیت۔ بابا پمیشکا پارلیمانی سیاست کنت کہ بلکیں من پہ وتی بلوچ راج ءِ هکانی واستا گپ کناں، هما بلوچ راج کہ مدام ڈالچار کنگ بیت یا بوتگ۔
بلے! بابا هیربکش ءِ واب ناسرجم بیت ءُ زوت سما کنت کہ اے پارلیمنٹ ،وکیل، جج دُرست بلوچ راجءِ هونانی تُنّیگ اَنت۔ اِد ءَ نندگ ءُ سیاست کنگ بس وتی راج ءِ ریپینگ اِنت، پمیشکا بابا چہ پارلیمانی سیاست ءَ دزکش بیت۔ بابا هیربکش مری نیپ (national Awami Party) ءَ هم داں دیر ءَ سیاست کنت۔ نیپ شرّیں دْروشمے ءَ کار ءَ بیت پہ بلوچ راج ءِ واستا، بلے پد ءَ نیپ ءِ سر ءَ هم پابندی جن اَنت ءُ آئی ءَ ولگوج کن اَنت۔ ریاست همے پوه بیت کہ نیپ ءِ پْروش دیگ ءَ بابا وتی راجدوستی ءُ سیاست ءَ یلہ کنت، بلے اے ساز اِتگیں پندل بے سوب بہ اَنت۔
چیزے وهد ءَ پد بابا روت ءُ اوگانستان ءَ دْرانڈیھ بیت، بلے گوں دْرانڈیھی ءَ وتی جھد ءَ برجم دار اِیت ءُ کدی هم دلپروش نہ بیت۔ بازیں وهدے ءَ پد بابا گوں وتی ٹکّ ءِ لھتیں مردماں دوبر پاکستان ءَ کئیت، بلے بابا گْوش اِیت من پمیشکا دوبر پاکستان ءَ اتکگاں کہ منی ٹکّ ءِ مردماں میڑ آؤرتگ ءُ من ءَ زور کُتگ۔
دیمتر ءَ بابا گْوش اِیت کہ منی اراده بوتگ کہ من اوگانستان ءَ نندان ءُ نوکیں شور بندی کناں کہ آ پہ بلوچ راج ءَ نوکیں ءُ رُژنائیں باندات ءِ مِستاگے بہ بیت۔ وهدے بابا پاکستان ءَ کئیت گُڑا بابا ءِ لیکہ ءُ دیدانک کدی هم بدل نہ بہ اَنت، بلکیں بابا پاکستان ءَ نند اِیت ءُ بلوچ راج ءِ رهشونی ءَ کنت ءُ بلوچ راج ءِ هرچ وڑیں جیڑهانی دیمپان بیت ءُ نوکیں جنز ءِ نیمگ ءَ آشنا کنت۔ هما جُنز کہ پہ بلوچ راج ءِ ھست ءُ ابدمان، آجو بوَگ ءِ واستا ھژدری بیت، همے جنز روچ ء مروچی جنزگ ءَ اِنت۔
بابا 10 جون 2014 ءَ اے کوڑئیں دگنیا ءَ یل کنت ءُ وتی ابدمانی جاگہ ءَ روت ءُ بلوچ راجدپتر ءِ تہ ءَ نمیران بیت۔ بابا هما کارست بوتگ کہ اے رنگیں کارست کرناں چِہ پد باریں ودی بہ اَنت یا نہ بہ اَنت، پرچا کہ سرزمین ءِ سر ءَ هر وڑیں بنی آدم کاینت۔ زندگی کن اَنت، بلے دگنیا ءِ تہ ءَ هما بنی آدم زندگ بہ اَنت کہ یک کردے ءِ واهند بہ اَنت ءُ وتی زند ءَ پہ زمین ءُ راج ءَ ندْر کن اَنت ءُ گھگیری ءِ چیدگ جوڑ بہ اَنت۔ همے کرداں چہ یکے بابا اِنت کہ مرچی هرچ بلوچ بابا ءِ دیدانک ءُ لیکہ ءِ منّوگر اِنت، مکران ءَ بہ گِر تاں کوہ ء سلیمان ءُ تونسہ شریپ ءَ درا۔
گُڈسر ءَ همے گْوشگ لوٹاں کہ
” مَرگ ءِ امبازاں کپاں زندگ باں
انچیں کردانی هُدابُند راجانی تلب “
