ڈیھ ءِ مُریدیں میرل

نبشتہ کار:- ھلیل بلوچ

چارمی بھر

تو گُش ئے بیا پد ءَ من تو امباز باں
وت سر ءُ جاھلیں شْوانگ ءَ کےبلے آئی ءَ زانتگ اَت کہ زُلم ءِ بِگیر ءَ کُتگیں کارانی تھ ءَ مھر ءُ مھبت ءِ چیدگ گِندگ بنت۔۔۔
آئی ءَ پھم اِتگ زورگِریں لشکر ءِ دیم ءَ نزوریں مردُم مُدام بے وَپا، گَدّار، جاھل ءُ بدماش گُشگ بنت گُڑا پرچا نزوریں راج پہ وتی ھستمان ءِ ھاتر ءَ زوراک ءِ بِگیر ءَ وتی نِزوریں کوپگاں کار مہ گیپت۔۔۔
آئی ءَ ھر شے پھم اِتگ بس پہ بے تواری وتی راج ءِ ھزمت ءَ کنگ ءَ اَت۔۔۔
آ راج ءِ یک انچیں کارستے اَت کہ آئی ءَ ھچبر چہ راج ءَ وت ءَ گِستا کنگ نہ لوٹ اِت۔۔۔ آئی ءَ را گوں وتی راج ءَ سکّ ءَ باز مھر ھست اَت پمیشکا راج ھم پہ آئی ءِ گِندگ ءَ ھُدوک اَت۔۔۔
جُنز ءِ تھ ءَ بازیں سنگت بوتگ کہ سکّ ءَ باز کار کُرتگ اِش۔۔۔ سکّ ءَ کوھنیں سنگت بوتگ اَنت بلے مھلوک ءِ نیام ءَ پہ وتا مھکمیں جاگہ اِش جوڑ کُرت نہ کُرتگ۔۔۔ سَباہ ھر دیوان ءُ مجلس ءِ تھ ءَ بھر بہ زُرتیں گُڑا ھما دیوان ءُ مجلس ءِ در چتگیں مردُمانی تھ ءَ شُمار بوت۔۔۔
2009 ءِ گُڈّی ماہ اِت اَنت ھال رس اِت کہ اوتھل شھدربرجاہ ءِ بازیں نودربرے بی ایس او آزاد ءِ تھ ءَ ھوار بوتگ اَنت۔۔۔ آدگہ دْرست نام ءِ بی ایس او آزاد ءِ ممبر اِت اَنت کہ یک وڑیں سرکل ءُ گلی(تنظیمی) کارے ءَ دیم ءَ نیاتک اَنت بلے سَباہ بے توار ءَ نندوکیں مردُمے نہ اَت۔۔۔
سال ھمے 2009 اَت من ھاران کالج ءَ بی ایس او آزاد ءِ یونٹ سیکریٹری اِتاں، اے وھد ءَ بی ایس او آزاد ءِ مرکزی جنرل سیکریٹری زاہد بلوچ ھاران ءَ دورہ ءَ آھت ءُ پد ءَ ھمے زوت ءَ سلام سابر ءُ دگہ مرکزی کمیٹی ءِ ممبرے (شاید رزا جھانگیر اَت بلے شرّی ءِ سر ءَ یات ءَ نہ انت) ھاران زون ءِ کابینہ ءِ گِرگ ءَ آھتگ اِت اَنت۔۔۔ اے وھد ءَ ھاران زون ءِ جنجال سکّ باز اِت اَنت۔۔۔ ھمے کابینہ ءِ دیوان ءَ نسار سَبا نہ تھنا ساڑی اَت بلکینگ ءَ دُراھیں سُروپُرانی دیم ءَ اَت۔۔۔ انچو گُش ئے اے اولی بر اَت کہ آئی ءِ پِگر ءُ کار یکّیں منزل ءَ رھادگ اِت اَنت۔۔۔
آئی ءِ ھُدوناکی من دیست گُڑا من جُست کُت “ھاں سَبا ھالاں بہ دے چون بوت بی ایس او مھی الدین؟” آئی ءَ پسّو دات “آ گوں منی دیدانک ءَ  ھور نہ بیت، من وتی اسل ءَ آھتہ رس اتگ آں۔”
ھاران زون ءَ را سَبا ءِ وڑیں رھشونے رس اِتگ اَت ءُ یک انچیں سنگتے کہ ھر وڑیں وھد ءُ ھالتانی تھ ءَ پہ کار ءَ ساڑی اِنت۔۔۔ اے وڑیں کار نیست اَت کہ سَبا ءَ مکن کُتیں کہ گومن نہ بیت۔۔۔
2010 ءِ یک مئی ءَ ھاران ءِ تھا چہ بی ایس او آزاد ءِ نیمگ ءَ یوسپ ازیز مگسی ءِ نام ءَ مرکزی دیوان ءِ جار جنگ بوتگ اَت۔۔۔ ھر ممبرے وتی وس ءَ کار ءَ اَت۔۔۔ کسّے بیرک ٹھینگ ءَ اِنت کسّے استار ءُ مشلاں۔۔۔ ما چہ وھد ءَ پیسر دیوان ءِ تیاری سرجم کُرتگ اِت اَنت۔۔۔ بی ایس او ءِ ھزاراں بیرک شھر ءِ دمک ءُ در ءُ دیوال ءُ بازارانی تھ ءَ مِکّ بوتگ اَت۔۔۔ دْرستیں میتگاں چاکنگ ءُ پنتاک بھر کنگ بوتگ اَت۔۔۔
تھنا ھاران ءِ مزنیں دگّ کہ کراچی ءُ شال ءِ مرکزی دگّ چہ ھمود ءَ در کاینت پشت کپتگ اَت۔۔۔ اے وھد ءَ سرکار ءُ دژمن ءِ لشکر بی ایس او آزاد ءِ سنگتانی سر ءَ کریک ڈاؤن کنگ ءَ اَت۔۔۔ گُڑا نسار سَبا ءَ اے گرانیں کار وتی کوپگاں زُرت چہ دیوان ءَ سے چار روچ پیسر سَبا ءُ الیاس کریم روچ ء رھمانی گوں بُرش ءُ رنگاں در کپت اَنت۔۔
روان اِنت