نبشتہ کار۔ تیمور بلوچ
کراچی ءِ مزن شھدربرجاہ یک مزنیں وانگجاھے کہ اے وانگجاہ 1280 ایکڈز زمین ءِ سر ءَ اِنت ایشی توک ءَ 52 ءَ چہ گیش ڈیپارٹمنٹ اَنت ءُ اے وانگجاہ ءِ تہ ءَ بازیں راجانی نوجوان بزانکہ راجے آیوکیں باندات ءِ جوڑ کنگ ءِ ھاتر ءَ وانگ ءُ زانگ ءَ کاینت وتی آیوکیں زند ءِ پیسلہ ءَ کن انت۔
استان ءِ مزن نامیں شھدربرجاھانی تہ ءَ ایشی ءِ نام ھوار اِنت ، شھدربرجاہ ءِ تہ ءَ بزگیں بلوچ راجے نوجوان ھم ھوار اَنت۔ چُش کہ ما وت بلوچ ایں گڑا وتی بلوچ نودربرانی زندمان ءِ سر ءَ چمشانکے بہ دے اِیں گُڑا جوانیں رنگے ءَ وانوکاں سرپدی دات کُت کَن اِیں کہ بلوچ نودربر اے شھدربرجاہ ءِ توک ءَ چُونیں زندمانے گوازینگ ءَ اَنت؟ آیانی کرد چُون انت۔؟ اے وانگجاہ بلوچ نودربرانی ھاتر ءَ شر اِنت یا ھراب اِنت ؟ سبب چے اَنت؟ نودربر وت ھرابیں کِشک ءَ روگ ءَ اَنت یا اے وانگجاھے چاگرد ھمے پیم اِنت؟ جھد ھمیش بیت کہ ما جیڑھانی سرجمیں تک ءُ پھناتاں بہ گیشین ایں ۔
من وھدے کہ دُوازدہ ءِ چکاس دات! کراچی ءِ نیمگ ءَ منی دیم کپت ھمے وھد ءَ من شاھدربرجاہ ءِ نودربرے دیست گّپ ءُ تران کُت من ءَ جُست ئِے کت؟
سنگت تو کجام شھدربرجاہ ءَ وانگ ءَ دلمانگ ئے۔؟
من پسّو دات کراچی شھدربرجاہ ءَ۔۔۔۔
آئی ءَ پّسو دات سک ءَ جوانیں وانگجاھے انچوش کہ تو وت جْوان بہ بئے شھدربرجاہ پہ بلوچ نودَربَراں سک ءَ شوکیں درسگاھے۔۔
کراچی مزن شھدربرجاہ بلوچانی سیاست ءِ چیدگ گوشگ بیت، آئی ءِ تہ ءَ چیرمین زاھد ءُ آئی ءِ ھمپگریں بازیں سنگتاں ھمے وانگجاہ شہ وانتگ ءُ سیاست کُرتگ مرچی ھم بازیں ورنا ھمے لیکہ ءِ سر ءَ جنزگ انت۔۔
بلوچ ءِ سیاست اگاں ھستیں وھد ءَ اے رنگ ءَ اِنت گڑا ھما سنگت کہ پیسر ءَ سیاست کنگ ءَ بیتگ اَنت آیانی جْد ءُ جھد ءِ بروَرد اِنت، اے راستی ءِ کہ لھتیں ٹولی وتی زات ءِ نپ ءُ پائدگ ءِ ھاتر ءَ ھم سیاست کنگ ءَ اَنت ءُ وتا سیاسَی گوش اَنت کہ ما سیاسَت کنگ ءَ این ءُ لھتیں زاھد کرد ءُ زاکر مجید پگر ءَ دیم ءَ برگ ءِ جھد ءَ کنگ ءَ انت ءُ بلوچ ایشاں چَہ ایشانی کرد ءَ پجا کار اِیت ءُ زانت کہ کے راستیں دروشمے ءَ بلوچ ءِ نمائندگی ءَ کنگ ءَ اِنت ءُ کے ردیں رنگے ءَ اِنت۔
شھدربرجاہ ءِ تُوک ءَ بازیں بلوچ نودربراں وانگ ءُ زانگ ءَ اَنت چے ءَ کہ بلوچ ءِ ھاتر ءَ وانگ ءُ زانگ ءِ کلیں راہ بند کنگ بیتگ اَنت بلے چنچوک کہ وانگ ءَ اتکگ اے وتی وھد ءَ زوال مہ کن اَنت پرچاکہ آدگہ راجاں بلوچ ءَ چے گیش وانتگ بلے نہ پھم اِتگ، آیانی ھیال ءَ کہ ما زبر تر اِنت، جُھد بہ کنت سک ءَ باز جوانتر بیت، بلوچ ءَ سیاسی، چگردی ءُ اے دگہ راجانی نودَربَراں گوں نند ءُ نیاد کنگ لوٹ ایت ءُ آیانی گندگ ءَ پد آیانی تب(سائیکی) ءِ بابت ءَ اِلم ءُ سرپدی بہ زیرگ لوٹ ایت کہ آ چے پیم اَنت ءُ چِے جیڑگ ءَ اَنت وتیگ ءُ دومی راجانی تہ ءَ چُونیں پرک ءُ تپاکی گندگ ءَ اَنت، ھمے پرک ءَ دربگیج اَنت، شاھدربرجاہ ءِ توک ءَ بلوچ زالبولاں ءُ چاگرد ءِ تہ ءِ زالبولانی گندگ ءَ پد چِے پھم اَنت آیانی تہ ءَ چونیں پرکے ھست بزانکہ نودَربَر اے کلیں چیزاں دیست کت کن اَنت کہ نودَربَر شاھدربرجاہ ءِ تہ ءَ چے پیمیں زندمان گوازینگ ءَ اَنت، ھمے بلوچ کہ شاھدربرجاہ ءَ وانگ ءُ زانگ ءَ اتکگ اَنت آ چِے پیمیں چاگردی سیلکاری ءَ گوں ھوار اَنت، اے سرجمیں جیڑھانی بابت ءَ نُودربراں سرپدی دست کپ ایت، گُڑا نودربرے سما کُت کنت کہ وتی زندمان ءَ چون ءُ چِے پیم بہ گوازین اِیت ءُ کجام کشک ءَ برو کہ آئی ءِ سبب ءَ راج ءُ آئی ءِ جند ءَ بزانکہ دوئیناں گھتری دات کُت کنت، نودربر سرجمیں پرک ءُ تپاوت ءَ در بہ بر اَنت ءُ بزان اَنت کجام کشک پہ مئے باندات ءِ ھاتر ءَ وشی ءُ گھتری کار ایت۔
زانتکارے درورے دنت ” (یونیورسٹی سیاست کی ماں ہوتی ہیں)“۔”شھدربرجاہ سیاست ءِ مات گوشگ بیت” ۔ اے سرجمیں جیڑہ ءُ جنجالاں نودربر وانگ ءُ زانگ، ءُ شاھدربرجاھانی تہ ءَ گند اَنت ءُ آیاں گیش ءُ گیوار کنگ ءِجد ءُ جھد کن اَنت ءُ گُڈی ءَ سپرے ءِ نیمگ ءَ رو اَنت۔
کراچی ءِ پیمیں مزنیں شاھدربرجاھے ءِ ماھول پہ بلوچ نودربراں مزنیں تاوانے دومی نیمگ ءَ دربرگ ءَ ھم بازشوکیں جاھے بزانکہ اے شاھدربرجاہ ءِ تہ ءَ جاھے ءَ وانوکیں بلوچ نودربر دست کپ اِیت جاھے وھد ءِ پاس کنوک دس کپ ایت۔ چوکہ چوشیں نودربر ھم ترا دست کپ ایت کہ بلوچ راجدوستی ءِ لیکہ ءَ گوں بندوک اَنت ھمک وھد ءَ وتی راج ءِ ھاتر ءَ جیڑگ ءُ کار کنگ ءَ انت، دومی نیمگ ءَ انچیں بلوچ ھست کہ اسکالرشپ، کمرہ ءُ کسانیں چیزانی سر ءَ پروگرام برجم دار اَنت بزانکہ اکٹیوزم ءِ لیکہ ءِ سر ءَ کار ءَ اَنت۔
ھمے کاینت وت ءَ ھما نمیرانیں سنگتاں گوں بندوک کن انت کہ آیاں بلوچ جھد ءِ ھاتر ءَ کربانی داتَگ بزانکہ ھما جوانمردانی نام ءِ سر ءَ بلوچ نودربراں ریپینگ ءَ اَنت ءُ گْوش انت کہ مئے گل(تنظیم) ھما نمیرانانی نام ءَ اِنت ما آیانی پدریچین ءُ آیانی لیکہ ءِ سر ءَ کار ءَ اِیں بلے راستی اے نہ اِنت چُشکہ وت ءَ پدر کن اَنت۔ لھتیں جاہ ءَ انچیں ٹولی دْراہ بیت کہ وت ءَ نیوٹرل گْوش اَنت ءُ بلوچ اَنت، بلے وت ءَ بلوچ راج ءِ جیڑھاں گوں بندوک نہ کن اَنت ءُ بلوچ ءِ جیڑہ ءَ چہ وت ءَ گستا کن انت ءُ گوش انت مارا کار نیست اِنت چوشکہ اے گپ ءِ جند رد اِنت کہ یک بلوچے ءَ گوں دومی بلوچ ءَ کار نیست آ وت ءَ گوں بلوچ ءَ ھمگرنچ نہ کنت، بلوچ ءِ زندمان ءِ تہ ءَ اے گال مان نہ اِنت کہ یک بلوچے ءَ گوں دومی بلوچ ءَ کار نیست اِنت ءُ پد ءَ ھمے ورنا بلوچ چاگرد ءَ چِے چّپ شُتگ اَنت ءُ نوکیں نودربراں ھم وت ءَ گوں ھمگرنچ کنگ ءِ جھد ءَ اَنت دانکہ بلوچ ورنا سیاسی تنظیم ءُ وتی وانگ ءَ چَے دور بہ بنت ءُ چاگردی سلکاری ءَ گوں گُلائش بہ بنت، اے سرجمیں ٹولی بلوچ نودربران ءَ زانگی اَنت ءُ ایشاں چِہ آشنا بوھگی اِنت اے بلوچ ءِ دوزوَاہ نہ اَنت بلوچ راج ءِ دیمروی ءَ اڑاند انت ءُ بلوچ ءِ جیڑگی سنچ ءَ ھتم کنگ ءَ ایشانی دست مان اِنت ۔
جست اِیش اِنت کہ بلوچ ءِ راستیں مردم ءُ راستیں گل کُجام اَنت؟
ھما کہ پہ بلوچ ءِ آیوکیں باندات ءِ گھتری ءِ ھاتر ءَ کار کنگ اَنت آیانی گپ ءُ تران، نندگ ءُ پاد آیگ، مھروانی ءُ راجدوستی وت پدر کنت کہ ما نودربرانی دوزواہ اِین ءُ نودربر سرجمیں ٹولی ءَ بزان اَنت ءُ وت ءَ ھما جاھاں سر بہ کن اَنت کہ بلوچ ءِ راستیں مردم اَنت ءُ بلوچ چاگرد ءِ گھتری ءِ ھاتر ءَ یکشل ءَ جھد ءَ اَنت۔ کسّے سوشل اکیٹیوزم ءِ نام ءِ سیاست کنگ ءَ اِنت ھمے مردم سرپد بنت کہ ما بلوچ ءِ راستیں مردم ایں ھستیں وھداں بلوچ راج ءَ اکٹیوزم ءِ زلورت نہ اِنت ھمے ٹولی وت ءَ اکٹیوزم ءِ نام ءَ وت ءَ راجدوست گوش اَنت اکٹیوزم ءِ لیکہ ءَ گوں بندوک اَنت پہ دلجمی ءَ اے ٹولی ءَ سما بہ بیت کہ مرچیگیں وھداں بلوچ ورناھاں سیاسَی زانت ءُ سنچ ءِ زلورت اِنت کہ بلوچ ورناہ گیشتِر سیاسَی جوڑ بہ بنت ءُ راجدوستی ءِ لیکہ ءِ سر ءَ یک مشت بہ بنت، البت اکٹیوزم سیاسَت ءِ کسانیں تھرے بیت کت کنت سیاسی توارے بیت کت کنت بلے سرجم ءَ سیاسَت ءِ جند بیت کت نہ کنت ءُ نودربر دوئینانی میان ءِ پرک ءَ بہ زان اَنت کہ سیاسَت چِے ءَ گُوش انت ءُ اکٹیوزم چِے ءَ گوش اَنت، سیاسَت ھما کار اِنت کہ ورناھانی یکجاہ ءُ یکمشتی، ھواری ءِ جھد کنگ ءِ سکین ءَ دنت آیانی سیاسَی زانت ءُ کردانکی دروشم ءَ مھکم ءُ توانگر کنگ ءِ جھد ءَ کنت دانکہ ھمے ورنا وانگ ءُ زانگ ءَ پد ھم وتی راجی کرد ءَ پیلو کنگ ءَ سوبمند بہ بیت ءُ وتی راجی لوٹانی ھاتر ءَ جد ءُ جھد بہ کن انت، مزن شھدربرجاہ تہ ءَ نودربر دمگ پّرستی ءُ آزاد ھیالی ءِ پیمیں نادُرھانی آماچ مہ بنت کسّے گوش اِیت ما گْوادری ،آوارانی ،ھارانی مکُرانی ،پَنجگُوری،تُربَتی ،کسّے دگہ نام ءِ سر ءَ گوں نودربراں ھمگرنچی دار اِیت اے پرک ءُ پیر، دنگ پرستی، آزاد ھیالی، اے سرجمیں زھر اَنت، بلوچ راج ءَ ھنڈال ءَ چَہ ولگوج کنگ لوٹ اَنت نودَربَر اے سرجمیں جیڑھاں مہ گیشین اَنت گُڑا اے سرجمیں جیڑھاں مزدور ءُ دھکان گیشین اَنت؟ یا کہ اے مئے نودربرانی کار اَنت پرچاکہ چاگرد ءِ تہ ءَ وانندگیں مردم نودربر گوشگ بنت سرجمیں راج ءِ چم نودربرانی سر ءَ سک اَنت،مارا وت ءَ را جیڑگی اِنت اے پرک ءُ پیر ھتم کنگی اَنت دانکہ بلوچ راج تپاکی ءِ نیمگ ءَ جنزاں بہ بیت، پمیشکا بلوچ گوش انت ” وانندگیں ورنا وتی راج ءَ بڈ ءَ بند اِیت“ اگاں ما وانوک اے جیڑھاں سما مہ کن ایں گُڑا بلوچ راج زوالی ءِ نیمگ ءَ روان بیت۔
