نبشتہ: ھلیل بلوچ
بنداتی بھر
نشتگ دیر اِنت نسار پہ ودار ءَ تئی
چو مُرید ءِ وڑا گوں وت ءَ نیاد کنت
آ مُدام جُنزگ ءَ اَت۔ دم برگ ءِ نام آئی ءِ کرّا نیست اَت۔ اگاں پہ دم ءِ ساسارگ ءَ بہ نشتیں انچو مارگ بوت کہ تیوگیں جھاں اوشت ءِ آماچ اِنت، بالی مُرگاں وتی بانزُل نزّ آرتگ اَنت، درچکاں وتی شاہ جھلاد کُرتگ اَنت، گْوات سُرگ ءِ نام ءَ نہ گیپت، ابرم ءِ زیبائی ھُشک ترّاِتگ اَنت۔ ھمے کہ آ جُنزان کَنت بچار زمین ءِ دُرائیں کارست آئی ءِ پُشت ءَ تچان ءَ پیداک اَنت۔ پرچا کہ آ آشکے اَت۔ زمین ءِ اشک ءَ شئے مُرید جوڈ بوتگ اَت۔
گوش اَنت زمین وتی وارساں وت گْچین کَنت۔ اگاں زمین ءَ کسّے پہ وت درچِت گُڑا آ کجام جاگہ ءُ چونیں جاورے ءِ تہ ءَ بہ بیت آئرا الّم نامدار ءُ شرپمند کنت۔
ھمے وڑا کسّے ءِ وھم ءُ گُمان ءِ تہ ءَ نہ اَت کہ چہ شھر ءُ بازاراں دوریں میتگ ءُ کوھی دمگے ءَ یک گْونڈلے پہ دینی مدرسہ ءِ وانگ ءَ درکپ ایت ءُ ھاران ءِ شائرانی دیوان ءَ جاگہ کَنت۔ نہ تھنا ھمدا اوشت ءِ آماچ بیت آ آپ ء روان ءِ وڑا وتی راہ ءَ گیشّینان کَنت۔ داں انچیں منزلے ءَ سربیت کہ آ جاگہ ءَ سر بُوّگ ھر کسی کارے نہ اِنت۔
آ سکّ کسان بیت شھر ءَ کئیت گُڑا دینی مدرسہ ءَ دھیان نہ دَنت ءُ اسکول ءَ پہ ھُبّ ءُ واھگ وان ایت۔ وانگ ءَ مجگ ئِے سکّ کار کَنت گُڑا چہ دومی ھم تبکّیں نودربراں وتی یک جتائیں بستارے جوڑ کَنت، مُدام بچکندگ ءَ گوں گَپّ کَنت گُڑا اُستادانی کِرّا ھم سکّ ءَ دوست دارگ بیت پرچا کہ دومی نودربر سکّ ءَ شرارت ءُ بے ادب بنت بلے آ چہ کسانی ءَ اُستادانی شرپ ءَ کَنت، پدیمیں گَپّ نہ جَنت۔
پدا وھد ھمے بیت ھنکین ءِ دومی گْونڈل شھر ءِ دیوال ءُ درانی سرا پہ مارکر ءَ زاہ ءُ بد نویس اَنت بلے آ ھچبر زاہ نبشتہ نہ کَنت مُدام چُشیں جاگھاں آئی ءَ نویستگ “نسار باگی”۔
اے ھما وھد بیت کہ ھستیں جُنز ءِ بِندات نبوتگ بلے نزاناں کجام وڑا آئی ءِ زھن ءَ آھتگ آئی ءَ نویستگ نسار باگی۔ دُراھیں مردُم ھیران بنت کہ اے پرچا وتی نام ءِ دیم ءَ باگی نویسگ ءَ اِنت۔ آ چہ کئے ءَ باگی اَت زانگ نبوت۔ ھمے وڑا یکروچے کلّانھیں مردُمے آئی ءِ مات ءَ ھال دَنت، بیا کہ تئی زھگ ھر جاگہ ءَ وتی نام ءِ دیم ءَ باگی نویسگ ءَ اِنت۔ گُڑا ھمے گَپّ ءِ سرا آئی ءِ مات زھر گیپت ءُ جَنت ئِے۔
پدا آئی ءِ پِت چون کَنت آئرا چہ اسکول ءَ کشّ ایت ءُ بارت ھاجی ھان ءِ مسیت ءَ داکل کَنت۔۔۔ بلے آئرا اود ءَ تَب نئیت سئے چار ماہ ءِ تہ ءَ کُران شریپ ءَ ھلاس کَنت ءُ واتر کئیت، وتی پِت ءَ جواب دَنت کہ من مسیت ءَ نہ واناں۔ پدا کئیت ءُ ماڈل اسکول ءَ وانگ ءَ بندات کَنت۔
روان اِنت
