نبشتہ کار: منھاج مکتار
اگاں ما پہ سنچ ءُ سما، پھم ءُ دید بچار ایں گڑا مرچیگیں وھد ءَ جھان ءَ ھرچیز ءِ راہ ءُ رھبند گیشتگ اَنت۔ھر ازم ءُ ازمکار ءِ جاہ،ازم ءُ ھنر ءِ مزّ درس پیشگی ٹاھینتگ اَنت،بلے مئے پد منتگ ءُ ھون آماچیں چاگرد ءِ تہ ءَ اے رھبندانی نام ءُ نشان نیست۔انچش بے سمائی انت کہ نام نگر ئے،ادا کئے انت کہ وتی ازم گر ءُ ساچشت کار ءَ ھمائی ءِ ازم ءُ ساچشتکاری ءِ دروشم ءَ بہ چاریت؟، ھمےگوھراں بہ پھریز ایت ءُ آیاں دستے سرا بہ سمارت ایت ءُ زندگ بوھگ ءِ راھانی نشون ءَ بہ دنت۔
ما گیشتر بیھال بئیں پرچاکہ ما نابلد ایں ھرتک ءَ ھرھمک پڑ ءَ مارا ایربکینگ بوتگ، چہ وتیگانی دست ءَ بہ بیت یا کہ درآمدانی۔درآمد ءِ و گلگ نہ بیت ءُ نیکہ درآمد ءِ زنگ ءَ کسے جنت۔پدا مارا چشیں سنِچ ءُ بودے ھم نیست کہ ما وتی بنکی ءُ بنیادمی اگبالاں سرپد بہ بئیں۔
لھتیں روچ بیت کہ شاکر زامُرانی ءِ اکسے ءُ مردمانی یک ٹولی یے دیم ءَ آیگ ءَ اِنت کہ راج شاکر زامرانی ءِ کمک ءَ بہ کنت۔ باز جوان ءُ شّریں ھبرے۔ باید انت کہ ھستومندیں بلوچ وتی راج ءُ وتی بزگیں ازمکارنی کمُک ءَ بہ کنت۔ دومی ھما ادارہ کہ بلوچ ءِ ادب، زیمر ءُ دودمان ءِ نامانی سرا ٹھینگ بوتگ انت، آیاں گرانٹس رس ایت، کمک رس ایت، وڈے ناں وڈے ءَ آ باید شاکر زامرانی ءَ ھوار ھر بزگ ءُ لاچاریں ازمکار ءِ کمک ءَ بہ کن انت۔پرچاکہ شاکر زامرانی ءِ دروشم ءَ دگہ بازیں ازمکار مارا شمارا دست کپ ایت کہ آ نادزرس انت۔ پمشکا نپت گواریں مجاں اندیم کتگ اَنت، کہ آھاں ھزارانی کّچ ءَ سوت، دستونک ءُ اے دگہ تھرانی تہ ءَ وتی ازم درانگاز اِتگ ءُ چشیں اِزمکار ھم سک باز اِنت کہ آ تھنا زیمر کار اَنت، ھزاراں گُشندھانی ھمراھی ءَ ھمایانی سوتانی تہ ءَ زیمر داتگ، آھاں ھمے سوت گوں وتی ازم ءُ زیمر ءَ گیشتر زیبا ءُ تامدار کتگ اِنت، آیاں چے وڑیں سازے کہ کارمرز کتگ بلے وتی ازمی بستار ءِ پد ءَ وتا پالاتگ، زیمر کش اِتگ ءُ ازم زندگ کتگ۔
ھمے وڈیں بازیں ازمکار بوتگ اَنت کہ مروچی مئے شمے درمیان ءَ نیست اَنت۔نمیران بوتگ اَنت، بلے آھانی ازمکاری سوت ءُ زیمراں ما شما گوشداریں، ما ءُ شما ملُما بئیں دیمترا وھدے کہ ما ءُ شما پٹ ءُ پول کنان بہ بئیں گڑا مارا ھمے گنِدگ ءَ کئیت کہ بازیں انچیں گوھر است انت کہ کھرسازیں اھد ءِ مجاں بیگواہ کتگ انت۔
گیرانی ساھگ ءَ زندگی کنگ ءَ اَنت۔ اولی سوب بلوچ ءَ را شوک ءُ توانائیں ادارہ نیست کہ کسے ءِ ازم ءُ کرد ءِ ھمراھی ءَ آئی اگبال چیر مہ تراَنت، گژنگ مہ بیت وتی دودانی پھریزگ ءِ ھمراھی ءَ بلوچی زیمر ءَ بہ ساچیت ءُ دگنیا ءِ دیم ءَ سھرا بہ کنت۔بلے ھمے نابودی ءُ ھزاراں جنجالاں ابید بلوچ ازمکاراں وتی زبان، زیمر ءُ دودمان ءِ پھریزگ ءِ جھدے کتگ یاکہ انگت ھمے جھد ءَ گلائیش انت،یک گپے ھست کہ ما بلوچ زیمرکار یا گشندہ تنیگا وتی اگبالاں سرپد نہ ایں، ھیر مارا ادارہ نیست مئے گلگ وتی جاہ ءَ ھست بہ بیت ءُ ھمے گلگ ءِ ھمراھی ءَ کمے وتی نابودی ءُ نادانیانی ءِ سرا مارا کمے جیڑگی انت۔
من ساری ءَ وتیگانی گپ جتگ ات کہ ما ھر وڑا چیرترینگ ءُ نزور کنگ بوتگ ایں۔ اے گپ ءَ ما اے وڑا کمے گیشینت کت کن ایں کہ بلوچ گشندھاں کہ سدانی ھساب ءَ ڈیلر یا پروڈکشنانی کرا سوت یا نوار ریکارڈ کتگ، آ وھد ءَ نوارانی یا کہ سی ڈی کیسٹانی زمانگ بوتگ ءُ گشندہ ءَ را ناں چشیں شِھمین ءُ مزنیں مُّزے رس اِتگ یا کہ ناں چشیں کول ءُ کرارے بوتگ نہ کہ منّگ نامہ یے نبشتہ کنگ بوتگ کہ ما بئیں یا نہ بئیں اے سوت یا نوار تئی ملکیت اَنت۔ کجا شنگ ئِے کن ئے بہ کن ئِے، بلے ھک ءُ مزّانی ھبر پیسرا چہ گیشینگ بوتیں۔
منی ھیال ءَ ھچ ڈیلر ءُ گشندھاں چشیں گپے نہ گیشینتگ یا کرادادے نبشتہ نہ کتگ، بلے مرچی دگنیا ءَ دیمروی کتگ، پہ سوتانی شنگ کنگ ءُ زر کمائینگ ءَ دگہ بازیں جاگہ ٹھینگ بوتگ اَنت۔ چش کہ یوٹیوب، ٹیک ٹوک، اپیل اسپوٹ پائی ءُ دگہ دگہ ایپس جوڈ کنگ بوتگ انت۔ ھما ڈیلر ھمے بزگیں ازمکارانی سوتاں ھمودا ایر کنگ ءَ اِنت زر کمائینگ ءَ اِنت، باید کہ ھمے ازمکار ھمے ڈیلرانی سرا ایراد بگرانت، گپ بجن انت، اگاں بوت کنت کیس بہ کن اَنت، پرچا کہ اے زیمرکارانی ھّک اِنت، پرچاکہ ھمے گشندہ ءُ ازمکارانی سوت ڈیلراں یا ھمے یوٹیوبر ءُ اے دگہ جاھاں زرّ کمائینوکیں تند جاہ وتی روزگار ءِ وسیلہ جوڈ کتگ اَنت، بلے زیمرکار چو شاکر زامرانی ءُ دگہ سدانی کچ ءَ ازمکار کہ ھست انت پہ ایردستی ءُ لاچاری وتی زند ءَ گوازینگ ءَ اَنت۔ مروچی راج گوانک جنت کہ اے گریب ءُ بزگیں ازمکار ءِ کُمّک ءَ بہ کن اِت منی ھیالا اے ازمکاراں کہ ھزارانی ھساب ءَ سوت گشتگ اے کل ڈیلرانی یا راج ءِ کرا ھست اِنت، اشانی ھک باید ھما ازمکار ءَ دیگ بہ بنت، تاں کہ زیمرکار یا ازمکار پہ مدام پنڈگ ءِ سرا مہ بنت۔ ھمنچو کہ آئی سوت ءُ زیمر گوشدارگ بنت آئی مُز دیگ بہ بنت،تاں کہ ازمکار ءِ ھّک جنی مہ بیت۔ پروڈکشن ءِ کارمستر ءُ یا ھما مردم کہ ھمے گشندھانی سوتاں وتی چینلاں ایر کن انت ءُ زرّ کمائین اَنت باید ازمکار ءَ جست بگر انت۔آھانی سوتاں آھانی اجازت ءَ ابید شنگ مہ کن انت، یاکہ اے وڑیں جاھاں ابید مُز ءَ ایر کت اش مہ کن اَنت، من اے گپ ءَ ھم زاناں کہ اے زر آئی زندمان ءَ وشھالی دات نہ کن انت بلے آ اے گپ ءَ سرپد بیت ءُ زانت کہ ادا منی ھک جنی نہ بوگ ءَ انت، من ءَ وتی گشتگیں زیمرانی ھساب رسگ ءَ انت۔
چرے ھبر ءَ کسے وتی جھد ءُ کوشست ءَ یا چہ وتی ازم ءُ ھنر ءَ دلپروش مہ بیت۔ ازم ءِ دیمروئی ھم بیت ءُ باندات کسے چو مروچیگیں ازمکارانی ڈول ءَ واز مندگ،لاچار ءُ بے وس مہ بیت۔
اگاں مئے وانندگ ءُ با سمائیں مھلونک سما بہ کنت، وتی ادارہ ءُ ایندگہ چیزاں پہ راج ءِ ھذمت ءُ دیمروئی ءَ ابید لب ءُ لالچے ءَ کار بہ بندیت ءُ کار بہ گیپت جوانیں مستاگے بیت۔ پہ وتی دود ءُ ربیدگ، ازم ءُ ساچشت ءُ ساچشت کار ءَ
اگاں ناں گُڑا زندگی پہ ھرچ بنیادم ءَ ماتے نہ اِنت کہ دست ءِ سر ءَ سمار ایت۔
