نبشتہ کار: مھیم ابدالرھیم بلوچ
بلوچستان ءِ آجوئی جُنز ءَ کساس بیست ءُ چار سال ءِ سپر جَتَگ، بلوچستان بہ بیت یا درانڈیھ ، ما بلوچ زالبول ءِ جنز ءَ گوں بندوکی ءَ سهرا ءُ پُر امیت ءُ رژناه گندگ ءَ ایں، اے رد ءَ ماں نیدرلینڈ ءَ بلوچستان ءِ جنز ءِ تہ ءَ بلوچ زالبول ءِ کرد سک باز پُر اومیت ءُ کرار بکش گندگ بیت۔ اے زرمبشت ءِ تہ ءَ بلوچ زالبول ءَ جتاجتائیں پڑاں سوبمندیں کردے پیلو کتگ ءُ کنگ اِنت۔ آ کرد تری سیاسی بہ بیت، انسانی هک بہ بنت، یا چاگردی بہ بنت۔
بلوچستان ءِ آجوئی ءِ زرمبشت ءَ بلوچ زالبولاں کردی دْروشُم ءَ بهر زرتگ۔ بازیں جنین آدم بلوچ سلاه بندیں چست ءُ ایراں ھوار بیتگ اَنت، ءُ سیاسی رد ءَ سرگرم بوھگ ءِ وھد ءَ پہ آجوئی ءَ جنگ اِش کتگ۔آ نہ ایوک ءَ روانک ءُ زھرشانی ءَ بھر زور اَنت،بلکیں وتی ھیالاں (گلوبل پلیٹ فارمز ) جهانی تک ءَ ھم سر کن اَنت۔
بلوچستان ءَ زالبولاں بیگواھیں مردمانی شوھازگ ءِ تہ ءَ مزنیں کردے پیلو کتگ ءُ زوراکی ءَ بیگواہ کنگ ءِ ھلاپ ءَ چست ءُ ایراں مزنیں کردے پیلو کتگ ، ھاسیں رنگ ءَ ھما مات ءُ گُْھاراں کہ آ وتی نزیکیں مردمانی بیگواھی ءِ آماچ بوتگ اَنت، آیاں اے جیڑہ سیاسی جیڑھے جوڑ کُتگ ءُ بلوچستان ءِ آجوئی ءِ جُھد ءَ گوں ھمگرنچ کُتگ۔
لھتے بلوچ زالبولاں ھم راجی جنز ءِ پگری بُن ھشتانی مھکم کنگ ءَ مزنیں کردے پیلو کتگ۔ آیاں وانگ ءُ زانگ ءِ تک ءَ کار کتگ ءُ نوکیں پدریچ ءَ را وتی ھک ءُ راه ءِ نشون داتگ۔
نیدرلینڈ ءَ نندوکیں بلوچ زالبولاں بلوچستان ءِ ھک ءُ آجوئی ءِ جیڑہ ءَ میان استمانی تک ءَ دیم ءَ آرگ ءَ مستریں کردے پیلو کتگ۔ آ چہ میان استمانی انسانی هکانی دیوان، میان استمانی رسانکدر، ءُ جتا جتائیں این جی اوز ءِ وسیلگ ءَ بلوچستان ءَ بلوچستان ءِ تہ ءَ برجاھیں ریاستی زلم ءُ زوراکی، یا پہ زور بیگواہ کنگ ءُ ریاستی ناشرکاری جوانیں رنگے ءَ پدر ءُ آشکار کتگ ،اے جنز ،اے جنگ ، انگت برجاه اِنت ،مارا اومیت اِنت مهرنگ گونگیں گهار ودی بنت۔
نیدرلینڈ ءَ بازیں بلوچ زالبول آجوئی زرمبشت ءِ سپیر ءِ بستار ءَ کار کن انت۔ آ میان استمانی دیواناں بلوچستان ءِ آجوئی ءِ بابت ءَ گپ جنگ ءُ چہ جتاجتائیں میان استمانی گل ءُ سرکاراں بلوچستان ءِ کمک ءِ لوٹ ءَ کنگ ءَ اَنت۔ جُھد کن اَنت کہ بلوچستان ءِ جیڑہ ءَ میاں اوستمانی تک ءَ گیشتر منّگ بہ بیت۔
نیدرلینڈ ءَ بلوچ زالبول سوشل میڈیا ءَ سرجمیں رنگ ءَ کارمرز کن انت کہ بلوچستان ءِ آجوئی ءِ جُنز ءَ میاں استمانی تک ءَ دیم ءَ آرگ بہ بیت۔ آئی ءَ آن لائن کمپین، بلاگ، ءُ ویڈیوانی وسیلہ ءَ بلوچستان ءَ برجاھیں سیاسی ءُ انسانی ھکانی بھراں پدر کن اَنت۔ ھمے وھد ءَ جھان ءِ چاگرد ءُ رسانکدرانی دلگوش ءَ بلوچستان ءِ آجوئی جھد ءِ نیمگ ءَ آرگ ءِ جُھد ءَ کن اَنت۔
نیدرلینڈ ءُ دگہ یورپ ءِ ملکاں بلوچ زالبول وتی براتانی ھمراھی ءَ جتاجتائیں مراگش ءُ سیمیناراں اوشت اَنت کہ ایشی ءِ تہ ءَ بلوچستان ءِ جاورانی سر ءَ گپ جنگ بیت ءُ پہ آجوئی ءِ جھد ءَ میان استمانی کمک ءِ رسگ ءِ جھد کنگ بیت۔ چریشی ءَ چہ میان استمانی چاگرد ءَ ایوک ءَ سرپدی گیش نہ بیت بلکیں بلوچ چاگرد ءِ تہ ءَ یکوئی ءُ مھکمی ھم پیداک بیت۔
بلوچ آجوئی ءِ جُھد ءَ بلوچ زالبول بے کساسیں چیلنجانی دیمپان اَنت ۔ آھاں وتی چاگردی، دودمانی ءُ سیاسی نزام ءِ ھلاپ ءَ جنگ کنگی اِنت بلے پدا ھم آ وتی( استقامت) ءُجزبہ ءَ گوں دیم ءَ روان کن اَنت۔نیدرلینڈ ءِ وڑیں ملکاں کہ آھاں گیشتر گپ ءُ تران ءِ آزادی ءُ سرپدی است انت، آ وتی گپ ءَ گیشتر گھتریں وڑے ءَ سر کت کن انت۔
بلوچ آجوئی ءِ زرمبش ءَ بلوچستان ءُ درملکاں بلوچ زالبولانی کرد سک باز ھژدری اِنت۔ آ نہ ایوک ءَ وتی دمگاں بلکیں جھان ءِ تک ءَ وتی مول ءُ مراد ءِ ھاترا توار چست کنگ ءَ اَنت۔ نیدرلینڈ ءِ تہ ءَ آیانی کار اے زْرمبشت ءَ میان استمانی تک ءَ یک گھتریں پجارے ءِ دیگ ءَ جوانیں کِردے پیلو کنت۔
