لاش من ءَ گوپگ ءَ اَت

نبشتہ کار گھرام بلوچ

28 جولائی 2024 سرجمیں بلوچ راج ءِ یکجاگہ بوھگ ءِ روچ اَت، ڈیرہ گازی ھان  ءَ بگر داں مکران ءَ ھرھند ءَ بلوچانی یکمُشتی ءِ پلہ مرزی ءُ پاکستان ءِ زوراکیانی بگیری ءَ اوگاماں کوہ ءُ کور، میتگ ءُ بازار جکسینتگ اِت اَنت۔ من ھم راج ءِ بازیں دردانی سوک ءَ دیم پہ راجی مُچی ءَ درکپتگ ات آں، بلوچ راجی مُچی ءِ کاروان ءِ ھمراہ ات آں، اے ساھت ءَ کہ کاروان نوک تلار ءِ آرمی چیک پوسٹ ءَ سر بوت تاں ھرکسی دپ ءَ یکیں گپ ات“وتن مئے دین ءُ دنیا انت “ بلئے ما چہ اے گپ ءَ شری ءَ آژنا ات ایں کہ اے لگوریں دژمن چہ راجی مُچی ءَ چنچو ترس آماچ اِنت،چوشکہ من پیسر ءَ دل ءَ جیڑ اتگ اَت کہ پاکستان ءِ رستریں پوج ءَ مرچی آس لگ اِتگ کہ سرجمیں بلوچ راج چہ آئی ءِ پندلان آژنا بوتگ ءُ وتی راج ءُ زمین ءِ رکینگ ءَ سرانی ندر کنگ ءَ تیار اِنت، بلئے رستر زانگ ءَ نہ اَت کہ بلوچ ءِ مرگ ءِ بیم ءَ وتی روچ وارتگ اَنت ءُ نوں بلوچ راج چہ آئی ءِ توپانی بیم ءَ پد کنز نہ بیت۔

تلار ءِ سر بوھگ ءَ گوں رستر ءَ وتی کوکار ءُ زاہ دیگ بنا کتگ اَت، مُچی انگت دیم ءَ روان اَت ھمے دمان ءَ توپ ءُ بمبانی توار بنا بوت زھریں گیس ءِ دور دیگ بندات بوت زھگ ءُ زالبولانی وا ءُ زاری یے بنا بوت رستر ءَ ”اللہ ءُ اکبر“ ءِ اوگام  جت ءُ توپانی دپ مُچی ءِ نیمگ ءَ کت اَنت۔ ھمے میان ءَ من انچو کہ وتی دیم رسترانی نیمگ ءَ چکرینت تاں چاراں کہ مئے تنگوئیں براس  لشکر ءِ تیرانی دیمپان بوت آئی ءِ سر ءَ تیر ءَ لگ اِتگ، آئی ءِ تیر سُپتگیں بالاد زمین ءَ کپت، من پہ گنوکی آ وتی امبازاں زُرت، منی رسگ ءَ چہ پیسر آئی ءِ ارواہ ءَ بال کتگ اَت، آ پہ زمین سالونک بوتگ اَت بلئے من ءَ اے سما نہ اَت کہ سنگت شھید

بوتگ۔

اے ساھت ءَ پاکستان ءِ ناپاکین پوج ھچ چارگ ءَ نہ اَت بس بلوچ کنگ ءَ اَت ءُ جنگ ءَ اَت، مُچی ءِ نیام ءَ گیس دور دیگ ءَ اَت، بلئے لکاں دروت بلوچ ءِ تنگوئیں پرزنداں کہ انگت ءَ دل اش داشتگ َات ھوسلہ مند اِت اَنت۔ من ءَ ھم گیساں گپتگ اَت چوناھا  اے گیس مردم ءَ  توسین ایت  بلئے اے وھد ءَ کہ تیر سُپتگیں جون کہ منی کوپَگ ءَ اَت من ھچ نہ زانت کہ چے بوگ ءَ  اِنت، بس من تچان ات آں  ءُ دپ ءَ بس ھمے گپ اَت کہ سنگتاں گاڑی ءَ بیار اِت ءُ زدگیں سنگت ءَ ڈاکٹر ءَ بر اِت دل اے گپ ءَ ھچ رنگ ءَ منّگ ءَ نہ اَت کہ من ءَ لاشے کوپَگاں اِنت ۔ ھمینکس ءَ سنگتے گوں پرپٹ ءَ اَتک،  ما سنگت نیام ءَ کُت ءُ  کمو دیم ءَ گاڑی ءَ کُت ءُ دیم پہ تربت ءَ رھادگ بوت ایں۔

سنگتاں گوشت کہ  سنگت ءَ زوت ڈاکٹر ءَ  رسین اِت کہ ھون سک رِچگ ءَ انت، وھدیکہ ما تربت اُلسی نادراھجاہ ءَ سر بوت ایں ءُ  ڈاکٹر ءَ سنگت چار اِت  پد ءَ دیمے گوں من کت ءُ گْوشت ئِے اے  سنگت دیری شھید بوتگ ۔

 منی دپ ءَ بس ھمے در آتک”اُپ اڑئے“ گڑا سنگتانی گوں ءَ ھال ءُ ھوال بندات بوت سنگتے ءَ  گْوشت کہ تھنا اے نہ اِنت دگہ باز سنگت جنگ بوتگ من ایمرجنسی ھال ءَ سر بوت آں کہ زدگیں سنگتاں  جاگہ نیست اَت ۔ نوں من زانت دژمن ءَ پروش وارتگ مئے مچی ءَ  دژمن پروش داتگ اَت ءُ  ما باج برتگ چریشی  ءَ منی دل  مزن بوت ءُ پد ءَ مار اِت کہ نوں مارا ترسگی نہ اِنت، دژمن لگور بوتگ اے مارا دیم ءَ بر اَنت اے لاش مئے رھشونی ءَ کنت۔

چو بالاچ ءِ لاش ءَ ، چو بابا ھیر بکش ءِ لاش ءَ اے ھمک تک ءَ مارا ھمت دے اَنت۔

 راجی مُچی ھمے چیز ءِ نام انت، راجی مُچی ءَ ھمے زُلم ءُ زوراکیانی بابت ءَ تران بوھگی ات ما گوادر ءَ سر نہ بوت ایں بلئے ما دیست کہ مئے راج چنچو زوراکیانی آماچ اِنت بلئے دل وش اَت پمیشکہ کہ من ءَ سما کپتگ اَت کہ بلوچ راج پہ وتی راجی پجار ءِ رکینگ ءَ وتی دژمن ءِ ھلاپ ءَ ھوسلہ مند اِنت ءُ اوشتاتگ۔