نبشتہ کار: راجدوست بلوچ
8/8/2024 گْوادر (راجی مُچی)
بلوچ راجی مُچی جلسھے نہ اِنت پروگرامے نہ اِنت بلے بلوچ راجی مچی یک جُنزے کہ ما سوگند زوریں کہ وتی راج ءَ را دوسد سال ءَ گیش ءِ گلامی ءِ ھلاپ ءَ یکجاہ کنیں
روکپتی بلوچستان نیست، رودرتکی بلوچستان نیست
بلوچستان تھنا یکے، ھر بلوچ ءِ لوگ اِنت
ءُ ھر ھما تاکت ءَ کہ مارا سیمسرانی سر ءَ بھر ئِے کتگ اے راجی مُچی ءِ جُنز ھر ھما تاکت ءِ ھلاپ ءَ پادآتکگ
ءُ اے جُنز بلوچ ءَ را یک تاکتے جوڑ کنگ ءِ جُنزے، بلوچاں بچار اِت اے ریاست ءِ ءُ ایشی ءِ کانون ءَ گوستگیں یازدہ روچ اِنت ما اد ءَ نشتگیں گوں اے ریاست ءُ ایشی ءِ کانون ءَ یک ناں بلے دہ بر اِنت نشتگیں گپ کتگ
شمئے ادارہ ءُ شمئے ایپ سی ءَ بے گناھیں بلوچ جتگ اَنت، زالبولانی سر ءَ لٹ چست کتگ سے ورنا شھید کتگ، ایشانی ھلاپ ءَ کورکمانڈر ءِ ھلاپ ءَ ایپ آئی آر درج بکن اِت ءُ ادالت ءَ بہ بر اِت ئِے ءُ برو اِت انساپ بکن اِت۔
بلے ایشاں مارا انساپ نداتگ، بلکیں ھمے ایپ آئی آر مئے سر ءَ جنگ بوتگ۔ گڑا ایش اِنت ایشی ءِ کانون ءُ ریاست
بلے ما اے ریاست ءَ ھمے کلوہ دیگ لوٹاں کہ ھر بلوچ ءِ نسل کشی ءُ کوش ءِ ھلاپ ءَ ایپ آئی آر بلوچ ءَ وتی راجدپتر ءَ شمئے پوجی ءِ ھلاپ ءَ نبشتگ۔
ءُ بلوچ وتی انساپ ءَ وت کنت۔
اے جُنز ءُ گوں اے جنز ءَ بستگیں ھرچ مردم سوگند بزور اِیت کہ بلوچ راجی مچی ءِ جنز ءَ گوں ھمراھداری کنت، بلوچ راج یکجاہ کنگی اِنت۔
تا سیستان ءُ مکُران، اے درستیں بلوچ یکجاہ آرگی ءُ بلوچ سرزمین ءِ واستا جد ءُ جھد ءِ تہ ءَ ھمراھداری کنگی اِنت۔
ما اے ریاست ءَ ھمے پیشداشتگ کہ بچار اے پدی زِر کہ تو مئے میری ڈرائیو جوڑ کتگ، اے دگ تو جوڑ کتگ، چہ اے دگ ءَ مئے ھما دریاوردانی تو روزگار پُل اِتگ، بلے انگت ھمے دگ ءِ سر ءَ تو مارا نہ اِشتگ۔
بلے بلوچ ھمے دگ ءِ سر ءَ نشتگ ءُ ترا ءُ تئی زالمیں ریاست ءَ جواب لوٹگ ءَ اِنت کہ ما نندیں۔
گْوادر ھر ھما وزیر ءُ گزیراں کہ ھسّاس جوڑ کتگ، گْوادر ھسّاس نہ اِنت۔ گْوادر بلوچ ءِ سر زمین اِنت، سر ڈگار اِنت۔ ایشی ءَ ھساس جوڑ کنوکیں ھرچ تاکت ءِ ھلاپ ءَ مارا اوشتگی اِنت۔
ما ءُ شما انچش کہ یکجاہ بوتگیں انچش یکجاہ بئیں، باندا ادار دہ ءَ سرجم ءَ گْوادر اد ءَ بئیت ءُ ھوار بہ بیت۔ تلار ھما جاگہ اِنت کہ سرجمیں بلوچسان ءِ مردم اود ءَ مُچ بوتگ اَنت، آیانی سر ءَ تیرگواری کنگ بوتگ، بازیں مردمے ٹپی بوتگ ءُ مردم شھید بوتگ اَنت۔ نوں بیا اِت ما ءُ شما رویں ھمے راہ ءَ ھمے چوکیاں، کیچ ءِ سرزمین ءَ تُربَت ءِ سرزمین ءَ یک جلسھے کنیں۔ ھوار بئیں اے راج ءَ کلوہ بدئیں اے استان ءَ کلوہ بدئیں کہ بلوچ پُشت ءَ نہ کنز اِیت،تو پشت ءَ کنز ئے، بلے بلوچ پشت ءَ نہ کنز اِیت۔
ما شمئے درستانی سک باز منتواریں ءُ ھمے لوٹیں کہ باندا سرجمیں بلوچستان ھاسکن کیچ ءِ مردم وت ءَ تُربَت ءَ سر بکنت، ءُ ھرچ بلوچ ءَ کلوہ بدنت کہ آ بلوچ راجی مُچی ءِ جنز ءَ ھمراہ اِنت، ءُ اے جنز بلوچ ءِ ھما گڈی سرزمین ءِ مزمت ءِ مستریں جُنز بیت، اے جنز ءَ گونڈو، زالبول، کماش درست یکجاہ بنت، ءُ ھر سیمسر ءَ پْروش اَنت، بلوچ ءَ یکجاہ کنیں ءُ یکجاہ کنگی اِنت، مئے باندات اِنت۔
شمئے درستانی لک لک منتوار۔
