دوهزار یازده ئے (2011) جون ءِ یک گرمیں شپے اَت، من زِندان ءِ سیاه ءُ تھاریں کوٹی یے ءِ تہ ءَ وپتگ اِتاں، بلے اَنگت واب نہ کپتگ اِتاں، من وتئی دل ءِ دریکگانی توار ءَ ساپ اِشکُنگ ءَ اِتاں، منی دل سکّ دریکگ ءَ اَت، منی دل ءِ اِے پیمیں دریکگاں من ءَ گوں جیڑگاں دوچار کُتگ اَت، من تُرسے ءِ آماچ اِتاں، چہ اِے دست ءَ دومی دست ءَ دمان پہ ساهت لیٹ اِتاں، بِگندے دِل ءِ دریکگانی توار منی گوشاں مہ کپ ایت شپ داں نیم ءَ رستگ اَت کہ کوٹی ءِ دپ یکے ءَ پچ کُت منی پاد آهگ ءَ پیسر سَے سیاه پوشیں مردم چو ملکموت ءَ منی دیم ءَ میلانک بوت اَنت۔ یکّے ءَ منی دست گوں مُھریں سانکلاں بست اَنت،دومی ءَ منی چم گوں سیاهیں پٹی ءَ بست اَنت، سیمی منی کیسگانی پٹگ ءَ لگ اِت، من ءَ بالزُلاں گِپت کش ءُ چیل کُت ءُ چہ کوٹی ءَ ڈن در کُت، من ءَ گوں مُشت ءُ لگتاں ماں بست، چہ کوٹی ءَ ڈن در کُت، بلے من زانت من تھنا نہ آں،منی کّش ءُ گوراں باز مردم ءِ توار اَت، آ هم اَنچو منی وڑ ءَ مزنیں بوٹ ولاهانی دست ءَ زور بیگواه کنگ ّبوتگ اِت اَنت۔ همے ساهت ءَ گاڑی یے اِسٹارٹ بوت مار ءَ دُرستان ءَ همے گاڑی ءَ سوار اِش کُت، گاڑی روان اَت، ما یکّ بیگواهیں منزلے ءِ نیمگ ءَ رھادگ اِتیں، منی نِز ءَ هر همُکّ چیز هلاس بوان اَت، دست گوں سانکلاں بندوک، چم گوں سیاهیں گُدے ءَ، مرگ ءِ اکس ھرسھت ءُ دمان منی چمانی دیم ءَ گوزگ ءَ اَت، منی کّش ءِ مردم ءَ کّلمہ آرگ بندات کُت، همے پیما زوت زوت ءَ کہ من گُڈی ءَ آئی گپ ءَ هم پوه نہ بوتاں کے چے گُشگ ءَ اِنت۔
اِے وهد ءَ من اَنچو گُٹگیر اِتاں من زِندگ بوگ ءَ چہ ملکموت ءِ گُلائیش کنگ شر تِر لیک اِت، گاڑی اَنگت روگ ءَ اَت، سپر اَنچو دراج اَت، من وهدے کِمار کنگ یل دات هر همُک چیز منی چمانی دیم ءَ زاهِر اَت، لوگ، میتگ، بازار، سنگت، چہ درُستاں گیش مات کہ من مُدتے بیت نہ دیستگ اَت، برے برے تھنا واب ءِ تہ ءَ دیستگ اَت،
دومی مردمانی وڑ ءَ من هم همے جیڑگ ءَ اِتاں کے مانوں ابدی راه ءَ سپر کنگ ءَ اِیں بلے اِے دمان ءَ منی دل ءَ مرگ ءِ هِچ وڈیں تُرس نیست اَت، من اِے هم جُھد نہ کُت کے ما هنوں کُجائیں کُجا نہ اِیں، بس من وتارا همے سوال کُت اگاں رستر مارا هم چو اِیدگرانی رنگ ءَ بے کبر ءُ کپن مُچی (اجتماعی) کبرانی تہ ءَ دوربے دنت من اِے هم زانتگ اَت، اگاں مارا بے تِرپ ءُ توار ایں مرگے ءَ بکُش ایت مئے هاتِر ءَ کّس پاد نہ اِیت، مئے هاتِر ءَ کّس توار چِست نہ کنت، پرچہ کہ ما گوں اَنچیں زمینے ءَ سیادی کن ایں کہ اودا بےگُناه ءَ را سزا جزا دئیاں یا کُشاں بےنامیں دیاراں دور دئینت او گناهگار ءَ آزاتی دئینت، من اِے مُلک ءِ اِنساپ ءِ هال ءَ شر سرپد اِتاں۔
بلئے اِے ساهتاں مئے زِند ءُ مرگ ءَ هِچ ارزِشت نہ داشت، جُست ءَ پیسر من وتارا وت پسہ دات زاناں اَچ من پیسر کہ گار ءُ بیگواه بوتگ اَنت، آیاں کُجام کرنل ءُ جرنل ءِ گِس پرُوشتگ، کُجام سرکار ءِ هزانگ لُٹ ءُ پُل کُتگ، کُجام سُپاهی ءِ دست ءِ تُپنگ هُرج اِتگ ،مارا گُناه نیست بلے یکّ زنڈیں گُناهے مئے کہ مارا بلوچیت ءِ نام بِر بوتگ، ما همے رنگ ءَ بیگواه کنگ بوتگیں، ما وت ءَ گون وت هبر کنگ ءُ وتارا وت سوال کنگ ءُ وت جواب دئیگ ءَ اِت اِیں، کہ وتکُشی جیڑهانی هلاس کنگ ءِ راه نہ اِنت اِے سزا ءُ جزا بّس یکّ چکاسے کہ مارا گوزگی اِنت، بس گهگیری پہ وتئی هکانی هاتِر ءَ گهگیری الّمی اِنت، مئے هر چیز اِے زورآوراں وتئی کُتگ اَنت، پہ زورآنسری مئے کِرا تھنا راه یکے، آ راه جنگ ءِ راه اِنت، مارا وتئی زمین ءِ پهریزگ ءَ چک ءُ پد نہ بوگی اِنت، ما چہ آیاں نئیاں کے زُلم ءِ دیم ءَ پرُوش ورآں وتارا پہ مرگ ءَ یل کن اَنت، ما جنگ کناں، آ جنگ کوه ءُ هساراں بیت یا زِندان ءِ سیاه ءُ تھاریں کوٹیاں گوں سانکلاں، ما داں گُڈی ساه ءَ جنگ کناں همے جیڑگانی تہ ءَ گاڑی گوں مزنیں توارے ءَ بند بوت، من چہ هیالانی دُگنیا ءَ درآتک آں، ساه منی باتِن ءَ گٹ اِتگ اَت، منی نُک چہ تُن ءَ دستے ءَ درآتکگ اَت، درآمدیں سُپاهیانی توار منی گوشاں کپگ ءَ اَت، کہ وتئی گالوارآں هبر کنگ ءَ اِت اَنت بلے منی مجگ اَنچو ڈمب اَت کہ من سرپد نہ بوتاں کہ اِے چے گُشگ ءَ اَنت، مارا چہ گاڑی ءَ درکنگ بوت، مئے چمانی پٹی پچ کنگ بوت اَنت، چمانی پچ کنگ ءَ گوں من دیست کہ تھنا منی همراهی ءَ یکے چہ گاڑی ءَ اِیرکنگ بوتگ، مارا یکجاه اوشتارینت اِش، چمے سپاهیاں من ءَ مُشتے جت ءُ وتئی سرجمیں زورے گون همے مُشت ءَ جتاں، همے ساهتاں درُستیں سُپاهیانی تُپنگانی دپ یکّجا پچ بوت اَنت، تیراں مئے سینگ دِرت، ما هردو یکجاه زمین ءِ سرا کپت ایں، هون چو گرماپ ءَ زمین ءِ هاکاں رِچاں اِت اَنت، زمین ءِ سُن گپتگیں بدن اِش پاد کُت، من ءَ اِے گّپ اِے دمان ءَ وشی دئیگ ءَ اَت کے لگور چو چہ ما تُرس ایت، اِے آئی پرُوش ورگ ءِ مستریں نشان اِنت، کہ دُژمن مارا اِے گپ ءَ وت باور کنائینگ ءَ اِنت کہ آئی ءَ اِے جنگ ءَ کُجام سیمسراں پروش وارتگ ءُ تاوان بار بوتگ۔
