راج دپتر ھچبر بامرداں بیھال نہ کنت۔ کے ڈی جان بلوچ راج ءِ ھما بامردانی لڑ ءَ ھَوار اِنت کہ آھاں پہ راج ءِ باندات ءِ ھاترا نا لُنج ءُ تھاریں شَپ چارتگ نیکہ گرم ءُ لواریں روچ، بس جُنزان اِش کُرتگ۔
کے ڈی جان ءَ زمہ دار ءِ کار سکّ باز ارزان کُرتگ اَنت۔ چوکہ نوکیں سنگتے اوتاگ ءَ بیاتیں گُڑا آئرا ماھول ءِ پھمگ ءِ ھاترا وھد لگّ اِتگ پَدا نوکیں سنگت ءِ ھاترا نہ تھنا جنگی ھُنرانی ھیلکاری الّمی اِنت بلکنہ زھنی ھوالہ ءَ سکّی ءُ سوریانی برداشت کنگ ءِ ھاترا سوج دیگ ھم الّمی اِنت۔ گُڑا جنگی ھُنرانی ھیلکاری ءِ ھاترا سنگت ساڑی بوتگ۔ گُڑا زھنی ھوالہ ءَ سنگت ءَ را تیار کنگ کے ڈی ءَ وتی پرز سمج اِتگ۔
کے ڈی ھما سنگتانی تھا ھَوار بوتگ کہ آئی ءَ شُرّ ءِ ھر جل ءُ شیپ زانتگ۔
یکبرے اوتاگ ءِ کورکمانڈر شھید بولانی اَت گُڑا آئی ءَ من ءَ زمہ داری داتگ اَت کہ سُھب ءِ سرا دْراھیں سنگتاں پاد بکن آں۔
24 ستمبر 2021 ءَ سُھب ءِ سرا مھلہ من پاد آھت آں دْراھیں سنگت من پاد کُرت اَنت من وَت نوکیں سنگتے ءَ را ٹریننگ ءِ واست ءَ بُرت ساھتے ءَ رَند من واتر اوتاگ ءَ آھت آں من چاراں دْراھیں سنگت پاد آھتگ اَنت بلے کے ڈی وتی کمبل زُرتگ ءُ آس ءِ کش ءَ آھتگ وپتگ۔ گُڑا من کے ڈی ءِ سرا نِشت آں کہ تو انگت واب ئے۔ گُشت ئِے “نا یار من پاد آھتگ آں انچو تچک آں اِدا۔”
من گُشت “تو یار سینئریں سنگتے ئے تئی وپسگ نوکیں سنگتانی سرا جوانیں سانے دور نہ دَنت۔”
من ءُ کے ڈی ھمد ءَ مزاک ءَ لگّ اِتیں۔
اناگت ءَ ھمے شیپ ءِ بُرزی نیمگ ءِ ٹُلّاں تیرے ءَ توار کُرت۔
من نہ پھم اِت ھمے ھیال کُرت کہ کامریڈ مزار ءِ زی دار پْروشگ ءَ اَنت پہ اوتاگ ءَ بلے سنگت آسم سرپد بوت گوں تیر ءِ توار ءَ گُشت ئِے “ھمّت کَن اِت کہ مئے سنگتانی سرا اِنت۔”
ھمے گَپّ ءَ گوں تیرگْواری شرو بوت۔ مئے مزنیں پریشانی سنگر اَت کہ پاد ئِے پْرشتگ اَنت۔ گُڑا من گُشت دو سنگت شیپ ءِ جھلی نیمگ ءَ کَور دیان پکنت گُڑا سنگر موٹر سائیکلانی نیمگ ءَ بریں سائیکل ءِ سرا کشّان ئِے۔
گوں ھمے گَپّ ءَ مزن مرّیں کے ڈی ءُ شھید سبزو جان شیپ ءِ جھلی نیمگ ءَ شُت اَنت انچو شہ گَر ءَ ایر کَپت اَنت کہ جھلی نیمگ ءَ تیرانی توار بندات بوت۔ ما زانت کہ نوں دژمن ءَ سرجم ءَ مارا انگیر کُتگ۔ ھمے تیرانی نْیام ءَ کے ڈی ءُ سبزو واپس آھت اَنت۔
ما درکپتیں بلے مارا مزنیں نُکسے آھت کہ شش انچیں سنگت نمیران بوت کہ ھما کَنڈ ھچبر پُرّ بوت نہ کنت۔
تیوگیں روچ ما آپریشن ءِ نْیام ءَ اِتیں۔۔۔ گُژن وڑے نا وڑے ءَ برداشت بوت جاگہ جاگھے گْون ءِ تاک ما وارت گُزارہ کُرت بلے تُنّ برداشت نہ بیت گُڑا کے ڈی جان ءَ مزنیں ھمتے کُرت کہ آئرا گیشتر آپ مالُوم اِت اَنت یا کہ اندازہ است اِت ئِے کہ اے شیپ ءَ آپ بیت اگاں ما جاگھے بہ ڈکّ اِتیں گُڑا کے ڈی ءَ کلّی گون اِت اَنت پہ آپ ءِ شوھاز ءَ درکَپت۔
روان اِنت
