گَپّ کے ڈی ءِ بوت۔۔۔
ھُرود اِش تْریت کُرتگ اَت آؤرت اِش۔۔۔ کے ڈی ءَ بچکندِت ءُ منی نیمگ ءَ چارِ ات۔۔۔ من دِل ءِ تھ ءَ گُشت تو وتی کُرت اَنت سیاہ زُبان۔۔۔ ؟
کے ڈی ھمے تْریتیں ناناں پونڈو کنان اَت، دمانے نہ گْوست کہ سیسو اِش سُھر کُرتگ اَت آؤرت اِش، من دِل ءِ تھ ءَ وشّ بوت آں بلے کے ڈی ھمے ھمدرد ءِ زھگ ءَ را بے عزت کُرت کہ تو پرچا مئے ڈیھ ءِ زیبائی شکار کُرتگ اَنت۔۔۔؟
آ ورنا ءَ بھانھے کُرت کہ منی ماس بیمار بوتگ ھمے واستا من دام ءِ سر ءَ لھتیں گِپتگ۔۔۔
نان ءَ پَد شیرچاھے آؤرت اِش ما چاہ وارت ءُ من سگریٹے روک کُرت، بے وابی ءَ مارا بے وار کُرتگ اَت ما نِندگ ءُ مجلس ءِ وڑ ءَ نہ اِت ایں۔۔۔
من ھمے ورنا ءَ را گُشت کہ چہ گِس ءَ کمّو گِستا پہ ما نِپادے وڑ کن کہ ما دَم بُرتگ ءُ سُھب ءَ مھلّہ پاد کائیں در کپ ایں۔۔۔
ما اوتاگ ءِ سوج گِپت ءُ شُتیں پہ وابجاھاں۔۔۔
بے وابی ءُ دم برگ ءِ سَوب ءَ ما شرّیں وابے جَت بلے سُھب ءَ ابید کہ ما وت پاد بیا ایں ھمے ورنا ءَ چاہ آؤرتگ اَت چاہ دان ءِ ٹلینگگ ءَ ما سَما کُرت۔۔۔
چاہ وارت ءُ در کَپت ایں۔۔۔ نیمروچ ءَ چہ پیسر ما اوتاگ ءَ سر بوت ایں زگرین جان ءَ مارا دیست ناچ ءَ لگّ اِت۔۔۔ ما گوں سنگتاں انچو بگل گیر بوتیں گُش ئے سالانی سال ما یکے دومی ءَ نہ دیستگ۔۔۔
پد ءَ ھمے اوتاگ اَت کار اِت اَنت۔۔۔
کے ڈی برے یک نیمگے جُنزان اَت۔۔۔
شَپ گَردے اَت مُدام تاں شَپ ءِ نیم پاس ءَ سفر ءَ اَت۔۔۔ بلے گِلگ ءُ شکوہ آئی ءِ زُبان ءِ سر ءَ نیست اَت۔۔۔
ناں بیماری ءِ بہانہ۔۔۔
من مُدام آئی ءَ را گُشتگ اَت کہ کے ڈی یار تَو بُرو وتی دنتاناں اِلاج بکن وتی ھون ءِ آزمائشاں بکن کہ اے دُور سریں جنگے چو جلدی نہ کُٹّ ایت واپس آھت ئے اے جنگ ھست اِنت۔۔۔
آئی ءِ مُدام پسّو ھمیش اَت کہ من وتی کوپگاں سُبکّ کناں گُڑا اِلاج ءَ رواں چو مہ بیت اِنسانے آں نِزور بہ باں واپس آھت مکن آں۔۔۔
بلے ما سنگت وتی جاگہ ءَ اے ڈیھ ءِ ھر سِنگ ءُ بوچ آئی ءِ گَواہ اَت کہ وھد ءِ زوراکیں تیلانک آئی ءَ را سُرینت نہ کنت ۔۔۔
شہید شاہ داد ءُ اھسان ءِ شھادت ءَ رَند بلوچ نوجوان پہ کوھاں دیم کنگ ءَ اِت اَنت، گُڑا کے ڈی ءِ کار ھم گیشتر بُوھان اِت اَنت۔۔۔ برے پہ یک کارے ءَ در کَپت گُڑا نا روچ ءِ بْرانز آئی ءَ داشت کُرت اَنت ءُ نئیکہ شَپ ءِ مانپوشتگیں سیاھیں چادر ، ءُ ناں کہ موسُم ءِ سکّی ءُ سَیلاں۔۔۔
اگاں گوریچ جان ءِ گوشتاں تَل دَیگ ءَ بوتیں کے ڈی جان گوں ھمبلاں الّم کِشکے ءَ رھادگ اَت یا سرشَمے ءَ دُورگِندئِے چمّان اَت۔۔۔ اگاں ھَور ءُ برپ بوتیں کے ڈی جان ءِ گُد میچّلیتین اَنت بلے جُنزان اَت۔۔۔
یکبرے ھمے وڑیں کارے ءَ پہ من کے ڈی ءِ ھمراہ اِت آں۔۔۔ شَپ ءَ ما جاگھے داشت سکّ سرد اَت۔۔۔ ھَور ءِ موسم اَت۔۔۔ تیوگیں زمین نمب اَت۔۔۔ ما چار سنگت اِت ایں۔۔۔ سُھب ءَ ھر کسی پوشاک ترّ اِت اَنت ھرکس سردی ءُ نمبی ءِ زنگ ءَ جنگ ءَ اَت۔۔۔ کسّے گُشگ ءَ اَت من ءَ واب نیاتکگ۔۔۔ کسّے گُشگ ءَ اَت من ءَ سردی ءَ بے وار کُرتگ۔۔۔ بلے کے ڈی ءِ جان ھُشک اَت، لاگریں مردُم ءَ چوناھا سردی سکّ بے وار کَنت، چوکہ کامریڈ مزار اَت سردی ءَ دانکہ جامبو ءِ تیل ئِے مہ جتیں یکّیں جاگہ ءَ ھُشک بوت پاد آھت ئِے نہ کُرت۔۔۔ کے ڈی سُھب ءِ سر ءَ پاد آھت۔۔۔ آس ئِے روک کُرت ءُ چاہ دان ئِے ایر کُرت۔۔۔ ما چاہ وارت ءُ درکپتیں نیم ساھت نہ گْوستگ اَت کہ مارا ھَور ءَ گِپت۔۔۔ ھمے نزّیک ءَ کوھنیں کوٹی یےھست اَت ما ھمود ءَ شُت داشت گُڑا یکپارگی نیمروچ ءِ ھاتر ءَ نان ھم پچ اِت۔۔۔ ھَور ءَ ھم بَس کُرتگ اَت۔۔۔ ما ھمے سوچ جنگ ءَ اِت ایں کہ شَپ ءَ داں کُجام جاگہ ءَ وتا بہ رسین ایں کہ جمبر انگت سر ءَ اوشتاتگ ھَور ءِ اِمکان ھم ھست بلے مارا ھر ھال ءَ دو روچ ءِ تھ ءَ وتی منزل ءَ سر بُوھگی اَت گُڑا کے ڈی ءَ گُشت پلاں جاگہ ءَ کوٹی یے ھست۔۔۔
اگاں نون در بیا ایں راہ ءَ ھِچ مہ داریں گُڑا مگرب ءَ پَد ما سر بوت کن ایں۔۔۔ ما نیمروچ ءِ نان ھمے وھد ءَ وارت کہ راہ ءَ دارگ مہ کپیت ءُ درکپت ایں۔۔۔ راہ ءَ برے برے کمّو ھَور ءَ گْوارت بلے ما جُنزان اِت ایں کہ گْوستگیں شَپ ءِ اَزابی ما دیستگ اَت ءُ دومی جمبر ءَ ھم مارا تُرسینتگ اَت۔۔۔ مگرب ءَ چہ پیسر ما جوانیں سفرے جتگ اَت بلے انگت ءَ کوٹی باز دور اَت ءُ چہ پُشت ءَ سیاھیں جمبرے چِست اَت۔۔۔ کے ڈی ءَ گُشت اے نْیام ءَ چہ شاٹیں راھے ھست نزّیک کپ ایت بلے لگّ ءُ دڑے باز اِنت۔۔۔
ما کے ڈی ءُ یک سنگتے دیم ءَ کُرت کہ تھار بُوّان اِنت لاگ مردُم ءِ پُشت ءَ بہ بنت گُڑا وتی کِشک ءَ یلا نہ دَے اَنت۔۔۔
ما انچو اولی شَم ءَ کہ لگّ اِت ایں ھَور ءَ ایر دات اے گُڑا کمّیں ھَورے نہ اَت دَمان ءَ مئے پُچّ میچّل بوت اَنت۔۔۔ اے نزّیک ءَ ھِچ چُشیں جاگھے نیست اَت کہ ما وتی سر ءَ چیر بہ دے ایں۔۔۔ یک گڑتّی یے ھمے اَست اَت کہ اے تنکیں چُرّ آپ بیاریت ما وتی ھراں بچّارینت نہ کن ایں۔۔۔ ما گُڑا کُرّو کُرّو کنان کُرت ءُ تیزی ءَ گوں رَوگ ءَ لگّ اِت ایں۔۔۔ ما ھر چینکہ رَو ایں جاگہ ءَ سر نہ بہ ایں۔۔۔ پد ءَ تھاری ءَ کے ڈی ءِ زی ھم زاھر نہ بُوّگ ءَ اِت اَنت۔۔۔ برے ھمے ھیال آھت چو مہ بیت ما رَد بہ کنیں۔۔۔ دو ساھت ھَور ءِ سر ءَ ما پَند کُرت گُڑا چاراں چہ بُرزی یے ءَ کے ڈی تَوار جَت “ھمے کِشک ءَ بیا اِت”۔۔۔
وھدے ما بُرزی ءَ لگّ اِتیں چاراں کوٹی ءِ تھ ءَ آس روک اِنت۔۔۔ چُشیں ھَورانی موسم ءَ ھُشکیں دار ءِ جم کنگ ءُ آس ءِ روک کنگ بلائیں مسلھے۔۔۔ ما چہ سردی ءَ لرزگ ءَ اِت ایں۔۔۔ منی ھمراھیں سنگت ءِ دنتان گوں دنتاناں ڈیکّ ورگ ءَ اِت اَنت کہ ٹک ٹک ءِ توار اِش اِشکنگ بوت اَنت۔۔۔ آس ءِ گِندگ ءَ گوں مئے جان ءِ تھ ءَ گرمی پیدا بوت۔۔۔ ما دوئیں راست ءَ شُتیں آس ءِ کش ءَ نِشت ایں۔۔۔
کے ڈی ءُ سنگت ءَ ھَرانی بار جھل کُرت اَنت ءُ سامان کوٹی ءِ تھ ءَ آؤرت اَنت۔۔۔ کے ڈی ءِ سر ءَ من ءَ سکّ زار آیگ ءَ اَت کہ مارا اِشتگ ئِے آھتگ، بلے آس ءِ گِندگ ءَ گوں من جھل بوت آں۔۔۔
من سوج کُرت “ھاں اُڑے شُما مارا یلو دات ءُ گار بوت اِت، ما رَد بہ کُرتیں؟”
کے ڈی ءَ پسّو دات ” شُما کہ ھمے چُرّ ءِ شَم ءَ لگّ اِت اِت۔۔۔ من چارِت نو سیدا ھمے چُرّ اِنت رَد نہ کن اِت گُڑا ما میدان کُرت کہ دارے جم کن ایں کہ پَد ءَ گیشتر ترّ بہ اَنت آس ءِ روک کنگ مشکل بیت۔۔۔ ءُ دومی من زانتگ اَت کہ شُما باز میچّل ات بِلّ ئِے مھلّہ کاینت آسے روک کن اَنت۔”
روان انت۔۔
