چہ تئی رنگ ءَ من انچو رنگ بُزرتیں
ترا راسکوہ وتا کلّگ کُتیں من
اے جنگ نزور ءُ زوراک ءِ جنگ اِنت ایشی تہ ءَاگاں کمزور مستقل مزاج بوت گُڑا بزاں کہ زوراک الّم دم بارت ءُ پْروش وارت۔۔۔
کُران شریپ ءِ سورہ انپال ءِ یک آیتے ءِ متلب چو اے وڑا اِنت کہ ھُداوند یک راجے ءِ جاوراں داں ھما وھد ءَ مٹ نہ کَنت دانکہ آ وت ھمیشی مٹ کنگ ءِ اِرادہ مہ کن اَنت۔۔۔
ھمے وڑا ما گوں ناگیگیں جاوراں گوں دیم پہ دیم بوت ایں ءَ مئے جاور مٹ بوت اَنت۔۔۔ ھمے شش سنگت ھژدہ ءَ آھت سر بوت اَنت۔۔۔
من ءُ کے ڈی کوھنیں وھدے ءَ گوں میرل جان تیار اِت ایں کہ راسکوہ ءَ رو ایں ءُ لھتیں وھد نِندایں بلے میرل جان ءِ شھیدی ءَ پَد ھمے اِرادہ یک اَرمانے جوڑ بوتگ اَت۔۔۔ گُڑا من ءُ کے ڈی دیر اَت تیّار اِت ایں کہ راسکوہ ءَ روگی اِنت بلے وائے بھت کہ برے یک کارے مئے دیم ءَ اڑاند اَت۔۔۔
نوں اے بر ءَ مارا موہ رس اِتگ اَت گُڑا ما چہ زمہ دار ءَ موکل گِپت ءُ در کَپت ایں۔
اے جھد ءِ تہ ءَ ما سکّ باز یادگاریں سپر کُرتگ بلے چُشیں سپر کہ اے بر ءَ منی نسیب ءَ بوت نزاناں زندگی دگہ چُشیں بھار کد بیار ایت۔یک جاگھے ما پہ دم ءِ ساسارگ ءَ نِشت ایں، کے ڈی جان ءَ چادان آپ کُرت ءُ من دار جم کُرت ءُ آس بالینت۔ دوئیں آس ءِ کش ءَ نِشتگ اِت ایں، اے سَپر ءَ ما پند ژند اِتیں بلے من کے ڈی ءِ نیمگ ءَ چارِت بچکندِت ءُ کے ڈی منی نیمگ ءَ چارِ اِت ءُ بچکندِاِت۔ پرچاکہ مزنیں وھدے ءَ پَد ما ھاران ءِ سرزمین ءَ وتی پاداں ایر کنگ ءَ اَت ایں۔ھمد ءَ کے ڈی ءَ درّائینت “پیش ءِ بلوچاں مُپت ءِ نا ھکّ چوش نہ گُشتگ کہ “وائے وتن ھُشکیں دار” راست ء جِند ءِ زمین مردُم ءَ باز دوست بیت ھالانکہ ما سرمچار دْرائیں بلوچستان ءِ وارسی ءِ گَپّ ءَ کن ایں پہ ما سرجمیں بلوچستان مئے وتن اِنت۔۔۔ بلے ھما جاگہ ءَ مردُم ءَ وتی کسانی گْوازینتگ مردُم ءِ یات گوں ھما جاگہ ءَ بندوک اَنت ءُ مردُم ءَ را گیشتر دوست بیت۔”
من گوشت “ھو چو کہ کِشک گوش ایت ھاران ءِ ھاکاں سُجدہ کَن چمّاں کَن، گُڑا تو ھاران ءِ ھاک ءَ چمّاں کن ئے؟”
آئی ءَ مزنیں کندگے جَت ءُ گوشت “ھاھاھاھا چٹ چو ھم نہ اِنت کہ مردُم وتا کور پکنت بلے ھَو مردُم ءَ ھاک دوست بیت۔”
کمّو بے تواری ءَ پَد کے ڈی گوشت “راستےتو من ءَ اے ھال ءَ بدئے بارگ جان ھر وھد چہ ھاران واتر پہ اوتاگ ءَ بیا آتکیں آئی ءَ پُچّے ءِ تہ ءَ ھاک گون اَت کہ ھر اوتاگ ءِ تہ ءَ کمّ کمّ شانک ئے داتگ اے چے کِسّھے؟”
من پہ مزاک گوشت “ھاھاھاھاھا اے ھاران ءِ ھاک بوتگ اَنت ھر جاگہ آئی شانک داتگ اَنت کہ بِلّے اوتاگ ھاران ءِ بوہ ءَ بہ کنت۔”
آئی ءَ کندت ءُ لیٹ وارت پداگوشت ئِے “نا یار من سوج کُرتگ گوشتگ ئِے دمی ئیں ھاک اَنت دوزواھے ءَ داتگ اَنت۔”
من گوشت “ھو من آ دوزواہ ءَ زاناں مُدام پہ ما دوا کَنت۔
پدا من گوشت “بارگ سرجمیں بلوچستان یکّیں چمّ ءَ چاراِتگ گیشتر آئی ءِ دِل آواران ءَ کلّ اَت، جاؤ ءَ شتگ ساہ ءَ گیشتر دوست ئِے داشت, مکّران آئی ءِ اَرواہ اَت، جھالاوان ئِے گوں وتی ھون ءَ سیراپ کُت۔
آئی ءَ چارِت من سنگینی ءِ نیمگ ءَ رَوگ ءَ آں گُڑاگوشت ئِے “ھَو آ ھمے وڑ اَت بلے بیا کہ سنگتے گوش ایت کہ آگا جان کسم وارتگ کہ من چہ بلوچستان ءَ پیسر ھاران ءَ آزات کناں،
ھمے گَپّ ءِ سرا ما ٹھک دات ءُ کند اِت۔
ما چاہ وارت ءُ در کَپت ایں شام ءِ وھد ءَ ما ھاران ءِ نزّیک ءَ آپے ءَ داشت۔ کے ڈی جان بُٹّے ءِ سرا لگّ اِت ءُ الاکہ دورگِند کُرت ءُ سنگتے ھم ھال ھوال ئِے کُرت کہ باندا سھب ءَ مئے دیم ءَ بیا۔ ما شَپ ءَ ھمے جاگہ ءَ داشت ءُ سھب ءَ سنگت ءِ ودار کُت۔
ودار چوناھا سکاگْرانیں ساھت بَنت بلے وھدے پہ یک چیزے ءَ مردُم ھُدوک بہ بیت گُڑا ھمے ودار گیشتر مردُم ءَ تَوریت۔۔۔ ما پہ ھاران ءَ گوشئ ے ھُدوک اِت ایں۔
سنگت نیمروچ ءِ وھد ءَ آھت ءُ ما درکپت ایں پہ مہر ءِ آپ وارتگیں دَیار ءِ نیمگ ءَ۔
روان اِنت
