زُرمبش ئے
دا جُنز ئنا
داجہداسے نا
چیدہ ئے
نا فکرئنا ضمانت ئے
علامت انقلاب ئنا
تیوگیں شپ من نیٹورک ءَ نِشت آں ، چم چہ بے وابی ءَ سچگ ءَ اِت اَنت۔ دل ھرچی کہ ڈڈّ کرت ، بلے دستانی لرزگ گار بوگ ءَ نہ اَت۔ دومی سنگت نوکینے اَت آئی ءِ دیم ءَ وت ءَ نزور پیش دارگی نہ اَت۔ من دل ءِ تہ ءَ ساھدارے ءِ ھیرات منّ اِت۔ ودارانی ھمے شپ سکا مزن اَت کہ کٹّگ ءِ نامے نہ زانت۔ من برے تلار ءَ جوکہ بوت آں ءْ برے جابہ ءِ سر ءَ سروشک ایر کت ، بس وھد ءَ تیلانک دیان اَت آں کہ سھب بوت۔
سھب ءِ سر ءَ مساپر ھال اھوال کرت کہ کے ڈی نیٹورک ءَ آھتہ ، من ھال داتہ کہ دیم ءَ مہ رو۔ نوں واتر پہ اوتاک ءَ آیگ ءَ اَنت۔ اے جنگ ءِ تہ ءَ ھرچی کہ (ھرچینکہ) تنگی ءُ ڈُک بئیت ، بلے یک وشی یے دْرائیناں بے ھیال کنائین اِیت۔ کے ڈی ءِ ھال ءِ رسگ ءَ گوں پورا گْوش ئے منی جان ءِ تہ ءَ تاکتے مان بوت۔ منی دیم ءِ روژنائی واتر بوت ، من سنگت ءَ را زرت ءُ واتر پہ اوتاک ءِ نیمگ ءَ در کپت آں۔ نیم روچ ءِ نزیک ءَ ما اوتاک ءَ سر بوت اِیں ، اود ءَ چاراں ملا یک کُنڈے گپتگ ءُ نشتگ۔ ءُ زگرین کہ نوک دہ روچ اَت ئِے آھتگ اَت ، یک نیمگے نشتگ انچو گْوش ئے گوں وت ءَ زھر اِنت۔ آ مئے ودار ءَ اِت اَنت کہ ما جوانیں ھالے بیار اِیں۔
من زانتگ اَت کہ ملا کْوھنیں بازیگرے آ وتارا دلگوش کنت ، بلے زگرین کہ نوک آھتہ تنیگا ھیلکاری یے سرجم نہ اَنت کہ مئے انچو (اینکہ) سنگت چہ ما سست ءُ شت اَنت من پر آئی پریشان اِت آں۔ گوں آیگ ءَ من بچکند اِت ءُ سلام دات۔ چہ بلوچی ھال اھوال ءَ پیسر زگرین من ءَ جست کرت کے ڈی ءُ کامریڈ ءِ ھالاں بہ دئے ، من گْوشت آیگ ءَ اَنت۔ زگرین ءِ جان ءِ تہ ءَ جان آھت مارا آپے وارینت ، ما سک گُژنگ اَت اِیں۔ من ملا ءَ را گْوشت کہ من ھیراتے منّ اِتگ ، گڑا آئی ءَ ھم دیر نہ کرت ءُ اوتاک ءَ گٹّورے ھست اَت ھمائی ءَ را ھلارے (ھلالے) کرت۔
دیگر ءِ وھد ءَ راسکوہ ءِ شان کے ڈی ءُ لیاری ءِ پھر کامریڈ مزار چہ اوتاک ءِ دیم ءِ بُٹّ ءَ زاھر بوت اَنت۔ زندگی ءِ تہ ءَ اولی بر ھمیش اَت کہ من پہ کسے چو ھُدوک اِت آں۔ من آئی ءَ را بگل کرت داں دیر یلہ نہ دات۔ ھال اھوال ءِ تہ ءَ ھمے گپے کرت کہ منی اِرادہ نبوتگ کہ نیٹورکے بہ گِر آں ، بس ابرمی ھمے جاگاہ ءَ لاگ ءِ ھُرجین یک نیمگ ءَ شُتگ کامریڈ گوں ھمائی ءَ سر ماں سر بوتگ ، گڑا من انچو موبائل کش اِتگ کہ نیوز بیا اَنت ، پد ءَ مردم اوتاک ءَ وانیت اِش۔ گوں ڈیٹا ءِ پچ کنگ ءَ مساپر ءِ کلوہ آھتہ کہ واتر بہ اِت کہ گوں شما باجوئی کنگ بوگ ءَ اِنت ، ما گڑا واتر بوت آں۔
یک سکابچہ سک تریں دورے (فیزے) ھمیش اَت کہ پورائیں شورّ ءِ تہ ءَ ما براس ءِ شش سنگت ءِ جند پش کپتگ اِت اِیں آ ھم کْوھنیں سنگت من ءُ ملا ءُ کے ڈی ءِ جند اِت ایں، کامریڈ مزار ءَ نوک دو ماہ اَت، زگرین ءَ دہ روچ اَت ءُ دگہ یک سنگتے اَت کہ آئی ءَ را ماھے بوتگ اَت۔ اے سکیں ساھتاں کے ڈی توکل ءُ جزبگبءِ کوھے اَت۔ مئے وڑیں کُنٹ مجگی چوشیں وھد ءَ سکا پریشان بہ اَنت۔ ھو من ھچ زانگ ءَ نہ اِت آں کہ چون بیت ، بلے آ مدام آھت منی کِر ءَ گْوشت ئے بس تو زگرین ءَ چار ءُ دلگوش کن کسانیں سنگتے دگہ کامریڈ مزار وت سیاسی مردمے چوشیں جاوراں (ھالتاں) برداشت کنت۔
اے جھد ءِ تہ ءَ برداشت سکا ھژدری اِنت ، کے ڈی مدام چو باگی ءِ کوہ ءَ ھر وڑیں تْرندیاں برداشت کنگ ءَ اَت ءُ مارا سکین دیگ ءَ اَت۔
اے جنگ ءِ تہ ءَ جاور (ھالت) یکشل ءَ نہ اوشت اَنت ، کم کم ءَ جاور (ھالت) بدل بْوان بوت اَنت۔ نوک نوکیں سنگت کوھاں دیم ءَ کنگ ءَ اِت اَنت ، زگرین ءُ کامریڈ مزار ھمے سکیں جاورانی (ھالتانی) تہ ءَ پشّ اِت اَنت۔ کامریڈ مزار بی ایل اے ءِ کیمپ کمانڈر جوڑ بوت۔شھداد ءُ اھسان ءِ وڑیں بلوچ ءِ نودربریں زانتکار آھت اَنت۔ ھرکس کے ڈی ءِ مھنت ءُ پندانی گواہ اَت ، ھرکس چہ کے ڈی ءَ دربرگ ءَ اَت ، بلے نوں کے ڈی تھنا کے ڈی نہ اَت۔ واجہ کے ڈی گْوشگ بوگ ءَ اَت ، آئی ءَ وتی ارزشت ھمینچو (ھمینکہ) گیش کنائینتگ اَت کہ ھر کس ءَ آئی ءِ ازت کرت ، چہ مستریں سنگتاں بہ گر کستریناں درا ھرکسی کر ءَ آئی ءِ نام واجہ کے ڈی اَت۔
روان اِنت۔۔۔
