2018 ءَ من ءُ زوھیب دگہ دمگے ءَ شتیں ، مئے روگ ءَ پَد گڑا منی دْرائیں کارانی زمہ داری آئی ءَ را دیگ بوتگ اَت ، ءُ ھمے وڑ ءَ زوھیب ءِ کارانی زمہ داری ھم آئی ءِ کوپگان اَت۔ دوری ءِ ھمے ساھت اَت اَنت کہ مدام لین ءَ بہ اتکیں (بیاتکیں) گُڑا کلوھے دیم داتگ اَت ئِے کہ ” انوں من پہ راھگْوزی لینے گپتگ ، دگہ وھدے ھال اھوال کنیں۔
چر ایشی ءَ ھمے زاھر اَت کہ سنگت گوں کاراں سک دزگٹّ اِنت ، بلکیں آئی ءَ گوں شورّ ءُ نوشکی ءِ کوھاں کول ءُ کرار کرتگ اَت کہ چوشیں شیپ ءُ چُرّے نہ مان اِیت کہ آئی ءِ تہ ءَ ھید مہ ریچ آں۔ چہ شورّ ءِ نیمگ ءَ ھر کجام سنگتے بہ اتکیں (بیاتکیں) گڑا آئی ءِ دپ ءَ کے ڈی ءِ نام اَت۔ کے ڈی چو منی ءَ کار ٹھینتگ اَت ، کے ڈی اے ، کے ڈی آ ، سنگت وتی جاگاہ ءَ چہ شورّ ءِ برپ پوش اِتگیں کوھانی سر ءَ کونجانی کتارے بہ گْوستیں ھم گوں آئی ءَ کے ڈی ءِ ھید ریچی ، واری ، پندانی کسہ گون اِت اَنت۔
2019 ءَ وھدے من واتر شورّ ءَ آھت آں ، گڑا منی دیم ءَ کے ڈی آھتگ اَت۔ اے بری دگہ چیزے اَت ، سرجم ءَ زمہ دار ءُ تیوگیں کارانی دیم ءَ ھما اَت۔ منی نہ زاناں چونیں بھتے ، من کہ شورّ ءَ پاد ءَ ایر کن آں مئے دْرستیں سنگتانی پریشانی ءُ مشکل گیش بہ اَنت۔ اے بر ءَ بزگی ءِ گپ جنگ نہ بیت کہ یک ماھے نہ گْوستگ اَت ، ماما شمس ، ھدل (خُدّل) ءُ گزو جان شھید بوت اَنت۔ ما گوں ماما ءِ گماں سر ءُ پیٹال اِت اِیں کہ بی آر اے ءِ سنگت گل ھان ساسولی ءُ ھمید ماندائی ءَ( چیروکائی دژمن ءِ دیم ءَ وتی ایمان اِش بھا کرتگ اَت) پہ باجوئی سئے سنگت گرائینتگ اَت ، مارا مالوم نہ اَت ءُ جھد ءُ کوشست اِش ھمیش اَت کہ منا ءُ کے ڈی ءَ یا کے ڈی ءُ ملا ءَ ھمانگو بہ لوٹائین اَنت۔ من پہ روگ ءَ تیار اِت آں ، بلے سد بر ءَ کربان بہ بہ آں کے ڈی ءِ پکر ءِ سر ءَ کہ پھم ءَ ئِے کار کرت ءُ گْوشت ئِے ” ناں! کْوھنیں سنگت تھنا ما ھمے سئے پش کپتگیں ، من نوکیں سنگتاں چہ کسے زوران ءُ رو آں۔”
گڑا آئی ءَ کامریڈ مزار زرت ءُ در کپت ، گوں آیانی درکپگ ءَ ھند ءِ نیٹ بند بوت۔ مئے پھم ھچ کار کنگ ءَ نہ اَت کہ چے بوگ ءَ اِنت ، دومی روچ ءَ یو بی اے ءِ سنگتاں کلوھے دیم داتگ اَت کہ گل ھان ءُ ھمید سنگت گرائینتگ اَنت ھیال بہ کن اِت کہ دگہ سنگت آنگو دیم مہ دئے اِت۔ چہ اے ھبر ءِ اِش کنگ ءَ پہ مئے پریشانی سکا گیش بوت اَنت کہ کے ڈی درکپتگ ءُ ھما دیم ءَ شتگ ایشاں چیزے مہ بیت ، پمیشکا من یک سنگتے زرت ءُ ھشت ساھت ءِ پند بُرّگ ءَ پد نیٹورکے گپت۔
کے ڈی لین ءَ نیاتکگ اَت ، منی پشار ء ھون کم بوت۔ دست ءُ پاد لرزگ ءَ لگ اِت اَنت ، گْرانیں ساھتاں ھداوند ءِ یات کنگ ءَ ابید دگہ ھچ پش نہ کپتگ اِت اَنت۔ من دُوا کنگ ءَ اِت آں کہ سر بوگ ءَ سر کے ڈی لین ءَ بئیت ، وڑ وڑیں وسوس دل ءَ آیان اَت۔ برے وت ءَ تسلا دیگ ءَ اِت آں کہ پلاں جاگاہ ءَ راہ ءِ سر ءَ نیٹورک کار کنت۔ الم کے ڈی سرسری لین ءَ کئیت ، برے ھمے ھیال ءَ من ءَ پچ گُڑینت کہ کے ڈی بھتاور پہ کارے ءَ در آھت دگہ دگنیائی چیزاں بے ھیال اِنت۔ بس سر ءَ جھل کنت روت ، بلے پہ جیڑگ ءُ ھیال کنگ ءَ گْواچن بدل نہ بیت ، شپ تھار بوتگ اَت ءُ کے ڈی ءِ درک ءُ توار نیست اَت۔
روان اِنت۔۔۔
