من چوناھیا مدامی ترا گیر کاران ءُ تئی گیراں گوں دچار آں ، تو ھردیں من ءَ گیر کائے من لوٹاں کہ تئی توسیپ ءَ بہ کن آں۔ تئی بر اِتگیں پند ءُ جھد ءِ سپت ءَ بہ کن آں۔ تئی ھید ریچی ءِ کسہ ءَ بہ کن آں۔ تئی گْرانبھائیں سر ءِ داتگیں دیمونی ءُ رتکگیں ھونانی ھر ترمپ ءَ نبشتہ بہ کن آں۔ تئی گڈی تیر ءِ پلسپہ ءَ چو درونت ءَ یات بہ کن آں۔
اے راستے کہ تو منی سپت ءُ ستاھانی مھتاج نہ ئِے ، ناں کہ منی اے چاریں دانک تئی بے ملیں جھد ءُ پند ءِ درشان ءَ کرت کن اَنت ، بلے من اگاں زرد ءِ پاھاراں درشان مہ کناں سک بے چاڑ بہ آں۔
من ھردیں کہ پر تو نبشتہ کنگ بندات کن آں ، گڑا پھک ھبکہ بہ آن ءُ منی ند ھمراہ نہ بیت۔ ھمک لبز ھوادگ ءُ بے مانا بہ اَنت ، اے منی نزوری اِنت یا کہ تو انچیں کشکے ءِ مساپر ءُ راھی بوتگ ئِے کہ منی لبز وت ءَ کسان لیک اَنت۔
نزام جان!
تئی کجام گپ ءَ بہ کن آں؟ تئی مھروانی ءِ گپ ءَ بہ کناں تہ چے بہ گْوش آں۔ پرچا کہ تئی مھروانی ءِ کساس ھمینچک زیات اِنت کہ گوں من سنگ ءُ پارسنگ کدی کنگ نہ بیت ، بلکیں پمن مدام یک استادے ءِ دْروشم ءَ بوتگ ئِے۔ من ترا چہ مدام ھمے دربرتگ کہ بنی آدم بے مھر ءَ ھچ براہ ءُ ڈولدار نہ بیت۔ من ترا چہ مدام ھمے دربرتگ کہ پہ ھمراہ ءَ ھر چیز کربان کنگ لوٹ اِیت ءُ ھچ وڑ ءَ چک ءُ پد بوگی نہ اِنت ، بلکیں ھر ساھت ءُ دمان ساڑی ءُ جاڑی بوگی اِنت۔
نزام جان!
من کہ گوں تو ڈیک وارت تو چو بلوچستان ءَ زیبا اِت ئِے ، چہ مھر ءَ سریچ ءُ مھروان اَت ئِے۔ پہ وتی بیل ءُ ھمبلاں تبد ءُ لوار ءِ موسم ءَ چو سارتیں ساھگ ءِ وڑ ساچان اَت ئِے۔ من ھردیں کہ ترا دیستگ گڑا سما کتگ کہ تئی تہ ءَ دگہ ھم بنی آدمے زندگ ءُ آ بنی آدم مدام گوں اورتی ءَ ندارگاں دربرگ لوٹگ ءَ اِنت۔ منی جھد مدامی ھمیش بوتگ کہ ترا بہ زان آں ، شریں وڑے ءَ پوہ ءُ سرپد بہ بہ آں ، گیش ءَ گیش ترا چہ دربرت بہ کن آں۔
نزام جان!
من ءَ مدامی ھما ساھت گیر کا اَنت کہ گوں تو گْوازینتگ آں ، من ءَ شال ءِ سارتیں دگ ءُ تو مدامی گیر کائے۔ من ءَ ھما چاچا ءِ ھوٹل دائم ءَ گیر کئیت کہ من گوں تو ڈیک وارتگ اَت۔ من ءَ ھما ٹالے سگریٹ ھم مدامی گیر کئیت کہ من چہ تو پچ گپتگ ءَ ، من ءَ ھما ساھت اے ھم شری ءَ یات اِنت کہ لنگڑی ءِ وھد ءَ یکیں ٹالے سگریٹ نیم کرتگ اَت ، پمیشکا تئی گیرانی زر منی دل ءَ چول جنت ءُ ساہ ءِ کشگ ءَ سر گپتگ ، بلے من وتارا ڈڈ کتگ داں اچ وت ءَ شمشکار مہ بہ آں۔
نزام جان!
من تئی میتگ ءِ درائیں مردماں ھال دیگ لوٹ آں کہ تو پہ وتی پدریچ ءِ وشیں باندات ءَ چینچو جپا کش اِتگ ءُ چینچو جنجالانی دیمپان بوتگ ئِے۔ نہ شپ چار اِتگ ناں کہ روچ ، گرم ءُ سرد ھساب نہ کرتگ اَنت ، پمیشکا من تئی میتگ ءِ مردماں ھال دیگ لوٹ آں کہ ترا گوں وتی میتگ ءِ مردماں چینچو مھر بوتگ۔ من مردماں ھال دیگ لوٹ آں کہ ترا پسنی ءِ بھشتیں ریک ءُ زر چتور دوست بوتگ اَنت ، ءُ ھما گپ من ءَ مدام یات کئیت کہ تو گْوشتگ اَت کہ من وتی ماتیں ڈگار ءُ گلباگیں بلوچستان ءِ چنکے ھاک ھم درامد ءَ نہ بکشاں ، بلکیں من دْرائیں ھساب ءَ چہ دژمن ءَ لوٹ آں۔
نزام جان! تو وتی جتگیں گپانی سر ءَ اوشتات ئِے ءُ پدکنز نہ بوت ئِے ، بلکیں وتی گْرانبھائیں سر گوں بچکندگاں نْدر کرت۔ وتی زند ءِ گڈی ءِ ساھت ءَ گوں تمردی ءَ دژمن ءَ دیم پہ دیم بوت ئِے ءُ جتائیں نامے کٹ اِت۔ بولان ءِ گْوات انگت تئی بوہ ءَ کنت ، بولان ءِ دگ تئی چھرگ ءَ جنت ، پسنی ءَ ھما اِنت کہ تئی وشبوئیں ھونانی بوہ سریچ اِنت ، پسنی ھمک ساھت تئی سر ءَ پھر بند اِیت ءُ بلوچستان پہ مدامی تئی سر ءَ پھر کنت ءُ گْوش اِیت کہ نزام جان ءِ وڑیں ھزار بچ انگت ھست کہ منی پاسبان بہ اَنت ، تو چوں من ءَ چہ منی پسگاں پچ گپت کن ئے۔ گڈی ءَ سھریں دْروت نزام جان ترا گوں راج ءِ مچ شھیدیں پسگاں کہ پہ ز
