28 مئی 1998 ءَ زورآواریں ملک ءِ نیمگ ءَ یکیں وھد ءَ پنچ ایٹمی تراک کنگ بوت۔ اے تراک ماں بلوچستان ءِ شھر چاگی ءِ کوھاں راسکوہ ءَ کنگ بوت اَنت کہ چاگی بلوچستان ءِ پشت کپتگیں شھراں چہ یکے زانگ بیت۔ اے ایٹمی تراک ءِ کاریچ ءِ جند 1968 ءِ دھک ءَ کارمستر (صدر) ایوب ھان ءِ اھد ءَ بندات بیت ، بلے ھمے کاریچ ءِ جند بے سوب بیت۔ چی ءَ کہ امریکہ گوں پاکستان ءَ ھمراھداری نہ کنت ، چوش کہ امریکہ یک سُپر پاور ملکے ءُ پد ءَ پاکستان ءِ انٹرسٹ ءُ ھب گوں امریکہ ءَ بندوک اَنت۔
ھمے ھاتر ءَ اگاں ابید ءِ امریکہ ءِ شور ءُ سلاہ ءَ چوشیں مزنیں گامگیجے بہ زور اِیت ، گڑا باند ءَ روچ پاکستان امریکہ ءِ گور ءَ بلیک لسٹ ءُ بلیک میل بیت۔ ھمے وڑ ءَ وھد گوازان بیت بلے یک برے پد ءَ امریکہ ءُ پاکستان ءِ سیادی (تعلق) گیش مھکم بہ اَنت ، چی ءَ کہ امریکہ پاکستان ءَ پروکسی ءِ بستار ءَ کارمرز کنگ ءَ اِنت۔ پاکستان امریکہ ءِ واستا مردم جاڑیگ کنگ ءُ دیگ ءَ انت پہ اوگانستان ءَ جنگ ءَ دیم دیگ ءَ اِنت۔ اے وھد سرد جنگی ءِ وھد گْوشگ بیت، چی ءَ کہ ھر ملک ءِ وتی کالونی ءَ شِنگ کنگ ءِ ھاتر ءَ ملکاں ایردست کنگ ءَ اَت ، یا ملکاں دیمروئی دیگ ءِ نام ءَ ریپینگ ءَ اَت ، یا ملکاں پروکسی ءِ بستار ءَ کارمز کنگ ءَ اِنت ، چوش کہ ھمے دْرچ ءَ پاکستان امریکہ ءِ پروکسی ءِ بیت ءُ روس وتی کالونی ءِ شنگ کنگ ءِ ھاتر ءَ اوگانستان ءَ دیمروئی ءِ نام ءَ رپینگ ءَ اَت ، بلے مول ءُ مراد ھردکانی یکین اَت کہ وتی کالونی ءَ گیش بہ کن اَنت۔ ھمے سوب بیت کہ روس اوگانستان ءِ وسیلہ ءَ پاکستان ءَ اتک کت کنت گڑا امریکہ ءِ راہ ءِ دیم ءِ کنٹگ بوت کنت۔ امریکہ پمیشکا روس ءَ چہ اوگانستان ءَ کشگ ءِ ھاتر ءَ پاکستان ءَ پروکسی ءِ بستار ءَ کارمرز کنگ ءَ اَت ءُ ھمے داب ءَ روس وت ءَ پاکستان ءَ سر کنگ لوٹگ ءَ اَت ءُ اوگانستان ءَ دیمروئی ءِ نام ءَ رپینگ ءَ اَت۔
امریکہ ءِ کمک ءَ چہ پاکستان 1984 ءَ ایٹمی تاکت ءِ جوڑ بوت ، بلے اے زمانگ ءَ امریکہ ءُ پاکستان ءِ ناوشی گوں انڈیا ءُ روس ءَ گوں ھست اَت اَنت ، پمیشکا امریکہ ءُ پاکستان ءَ اے گامگییج زرت نہ کت۔ اگاں اے ردی یے بہ کتیں گڑا روس ءُ انڈیا پاکستان ءُ امریکہ ءِ ھلاپ ءَ جنگ ءِ بندات بوت کنت۔ ھمے ترس ءَ اے کار آ وھ دءَ کت نہ کت ئے ، بلے چاردہ سال ءَ پد بزاں کہ 28 مئی 1998 ءَ چاگی ءِ دلبند ءَ اے ایٹمی تراک کنگ بوت۔
دنیا ءِ نز ءَ پاکستان یک نیوکلئیر تاکتے بوگ ، جھان ءِ واستا تاوان ءُ سر دردے ، چی ءَ کہ پاکستان نیوکلئیر تاکتے پھاز اِت کت نہ کنت ءُ بوت کنت کہ نیوکلئیر تاکت چہ پاکستان ءِ دست ءَ پچگرگ بہ بیت ، چی ءَ کہ پاکستان ءِ تہ ءَ جنگجو تنظیم (گل) سک باز اَنت ءُ پاکستان اِشاں مرّینت کت نہ کنت ، اگاں پاکستان ءِ دست ءَ نیوکلئیر تاکت پچگرگ بہ بیت گڑا اے دنیا ءَ دگہ زنڈیں جنگے ءِ بندات بوت کنت ، پمیشکا دنیا ءِ جان ءَ ترس ءِ کپتگ کہ پاکستان اگاں وتی ادارھاں پھاز اِت کت نہ کنت ، گڑا چوں نیوکلئیر تاکتے ءَ پھاز اِت کت کنت۔
نوں اد ءَ یک جستے ودی بیت کہ پاکستان ءَ پرچا بلوچستان ءِ زمین گچین کت پہ ایٹمی تراک کنگ ءِ واستا ، پاکستان ءَ دگہ جاگہ باز اِت ، چوش کہ سندھ، کے۔پی۔کے ءُ پنجاب اوں ھست اِت اَنت پہ چکاسگ ءِ واستا؟ بلے اد ءَ ھمے گندگ بیت کہ پاکستان ءَ بلوچ ءِ مھلوک دوست نہ اِنت ، بلکیں آئی ءِ چم ماں بلوچستان ءِ مال ءُ مڈیاں سک اِنت۔ زوراک ھچبر نہ لوٹ اِیٹ کہ ایردستیں زمین ءِ مھلوک ایمنیں زندے بہ گوازین اِیت ، آئی ءِ مدام لوٹ ھمیش بوتگ کہ برے ما چاریں سیمسراں بلوچ مھلوک ءِ بزگ کتگ کہ کسے پہ لاپ ءِ شوہازگ ءَ روت گڑا آ ملک ءِ زوراکیانی آماچ اِنت ءُ چہ گْوست ءَ بلوچ ءِ یک روزیگی وسیلہ ءِ زر بوتگ کہ مرچی زر اوں چہ بلوچ ءِ دست ءَ شتگ ءُ اود ءَ ملک راج کنگ ءَ اَنت ءُ مردم ھر روچ لٹ ءُ کٹ کنگ بوگ ءَ اِنت۔
ڈاکٹر پاؤلویم WHO کہ آ یک باسکے آئی ءِ رد ءَ ایٹمی تراک ءِ سان ءَ چہ مزنیں نادْراھی سر کش اِیتب، چوش کہ کینسر ، دم ءِ جیڑہ ، لنگ ءُ منڈے زھگ ءُ بے مرد بوگ۔ ھمے رنگ ءَ آپ ءِ چمگانی ھشک بوگ ، پوست ءِ نادْرھی ءُ باد ءِ وڑیں نادْراھی سک باز گندگ ءَ کئیت۔
ڈاکٹر ءِ رد ءَ اگاں ایٹمی تراک ءَ چہ اے ڈولیں نادْراھی وھدے سر کش اِیت گڑا آ جانور ءِ جند کشگی ءُ ھلاس کنگی اِنت دانکہ اے نادْراھی جند دیم ءَ شت مہ کنت بلے اے نادْراھیانی مئے مردم آماچ اِنت۔ گپ ءِ مکسد اِش اِنت کہ سکیں سِلیں نادْراھی ءِ وھدے ایمٹمی تراک ءِ کیمیکل یک زمینے ءِ سر ءَ کپت اَنت گڑا اود ءَ ھچ شے نہ رک اِیت۔ مردم ، دلوت ، کشت ءُ کشار ھر چیزے کہ ساہ زورگ ءَ اِنت ، آ ھمے زد ءَ کا اَنت گوں۔
ھندی مردمانی گْوشگ ءِ رد ءَ 1998ءَ پیش زالبول وتی لوگاں چلگ بوتگ اَنت ڈاکٹر ءِ گور ءَ روگ ءِ زلورت نہ کپتگ ، بلے مرچی ڈاکٹر ءِ گور ءَ روگ ءَ پد زالبول چلگ بوگ ءِ وھد ءَ ھر دو ( مات ءُ چک) بیران بوگ ءَ اِنت۔ اشی ءِ مستریں سوب ھمے ایٹمی مواد اِنت کہ چاگی ءِ دلبند ءَ چکاسگ بوتگ اَنت۔ اشی ءَ ابید ایٹمی تراک ءِ چکاسگ ءَ پد دنیا ءُ جھاں ءِ نادْراھی سرکش اَنت اشی ءَ چہ مردم لاچار بہ اَنت کہ لڈ ءُ بار ءَ سر بہ گر اَنت ، وتی پت ءُ پیرکی ھند ءَ یل بہ کن اَنت۔ وتی ھند ءُ دمگ ءِ یل کنگ پہ مردماں تاوان ءِ ھبرے ، چی ءَ کہ وتی ھند ءُ دمگ ءِ یل کنگ ءَ گوں تو بزاں سرجمیں گوست ءِ یل کنگ ، چوش کہ روایتے یل کنگ ءَ اشی ءَ ابید چاگی ءِ مردمانی روزیگی وسیلہ کشت ءُ کشاری ءُ دلوت بوتگ اَنت ، بلے ایٹمی تراک ءَ چہ سرجمیں شے ستک ءُ تباہ بوت اَنت۔ آپانی چمگ ھشک بوت اَنت ، بے سریں نادراھیاں سرکش اِت نوں مردم لاچار اِت اَنت کہ لڈ ءُ بار بہ کن اَنت ءُ دگہ ھندے بُرو اَنت۔
چوناھیا ملک ءِ لوٹ ھمیش اِنت کہ ھندی مردمانی سر ءَ زوراکی بہ کنت ءُ مردماں پہ وتی زمین ءُ ھندانی یل کنگ ءَ لاچار بہ کنت ءُ وت بہ نند اِیت مال ءُ مڈیانی سر ءَ لوٹ ءُ پُل بہ کنت۔ پاکستان ءِ واستا بلوچستان ءِ ھر ھند ءُ دمگ ارزشت دار اِیت ، بلے لھتیں ھند گیشتر ارزشت دار اَنت چی ءَ کہ اود ءِ مڈّی گیشتر پائدگ مند اَنت ، چوش کہ چاگی اِنت کہ ھمے سوب اِنت کہ پاکستان انچو لاچار بوت کہ تچک ءَ چاگی ءِ دلبند ءَ ایٹمی تراک بہ کنت دانکہ سِلیں نادْراھی ءِ سر بہ کش اِیت ءُ مردم پہ لڈ ءُ بارءَ لاچار بہ بہ اَنت ءُ من چاگی ءِ دلبند ءِ لٹ ءُ پُل ءَ شریں وڑے ءَ کت بہ کن آں۔
ایٹمی تراک ءَ چہ ودی بوتگیں نادْراھی ءِ آماچ بوتگیں مردمانی ھواری ءَ گیشتریں کچ ءُ کساس جوان ءُ زھگانی اِنت ، انچوش کہ جوان ءُ زھگ راج ءِ باندات ، اوست ءُ امیت گْوشگ بہ اَنت ، بلے ایٹمی تراک ءِ کیمیکل ءَ چہ پیداک بوتگیں نادْراھی ءَ بیران بوگ ءَ اِنت۔ اِشی ءَ تو پاکستان ءِ زنڈیں پندلے گْوشت کن ئے ، چی ءَ کہ آئی ءَ بلوچ ءِ زھگ ءُ ورناھیں پدریچ چکچینی کنگی اِنت ، اے ھمے پندلاں چہ یک پندلے زانگ بیت۔ ورناہ تبکگھگیری ءِ چیدگ گْوشگ بیت کہ ھر ھند ءُ دمگ ءَ کہ زوراکی یے بوگ ءَ بیت گڑا ورناہ تبک زوراکی ءِ دیم ءَ ھشک ءَ دستاں سر ءَ نہ کنت ءُ نہ نند اِیت ءُ ھاموش نہ بیت ، بلکیں آ مدام اوگام جنان کنت ءُ کوکار کنان کنت کہ پادا اِت مئے زمین ، مئے مال ءُ مڈی چہ زووگر ءِ دست ءَ رکینگ ءُ پچگرگی اَنت، چوش مہ بیت کہ ما چہ اے ھستیاں زبھر بہ بء اِیں۔
بلوچ ءِ چکچینی بازیں دْروشمے ءَ برجاہ اِنت ، چاگی ءَ چہ ابید بلوچستان ءِ ایندگہ ھند ءُ دمگ چوش کہ ھزدار انت کہ کینسر ءِ سبب ءَ مزنیں کساسے ءَ مردم مِرگ ءَ انت کہ اشی ءِ سبب اوں پاکستان اِنت کہ آئی وتی ایٹمی مواد ھزدار ءَ زمین ءِ چیر ءَ کل کتگ اَنت۔ آئی ءِ کْوھن بوگ ءَ چہ یورینم (کیمیکل) زمین ءَ گوں ھوار بہ اَنت ءُ اشی ءَ چہ کینسر ءِ وڑیں سِلیں نادْراھی سر کش اِیت۔ ھمے وڑ ءَ دگ ویلاں اوں بلوچ ءِ مزنیں چکچینی ءِ برجاہ اِنت ، اشی ءِ زمہ وار زورگر اِنت۔ چی ءَ کہ بلوچستان ءِ انپرااسٹرکچر انچو جوڑ کنگ بوتگ کہ ھر بلوچ چہ وتی یک ھستی یے ءَ چہ زبھر بیت، ھردیں کہ رسانکدر ءَ چمے جن ئے داں ھمے گندگ ءَ کئیت مرچی بلوچستان ءِ پلاں جاہ ءَ دگ ویلے ءَ مردمے بیران بوتگ ، بلے ما کدی نہ اِش کتگ کہ پنجاب ءَ بلوچستان ءِ وڑ ءَ مدامی ئیں رنگ ءَ دگ ویل ھست اِنت۔ دگہ یک بلوچ ءِ چکچینی ءِ دْرچے ماں ڈی۔جی ھان، کوہِ سلیمان، تونسہ ءُ ڈیرہ بگٹی ءَ برجاہ اِنت کہ گیشریں کچے ءَ مردم کینسر ءِ آماچ اَنت۔ اشی ءِ سبب اِش انت کہ یورینم (کیمکل) در پیداک اِنت گوں ورگی آپ ءَ ھوار بوگ ءَ اَنت۔ اشی ءَ چہ روچ پہ روچ نادْراھی ودان اِنت ءُ مزنیں کساسے ءَ مردم کینسر ءِ سبب ءَ بیران بوگ ءَ اَنت۔
بلوچاں اے سرجمیں پندلانی دیم ءَ چو بولان ءِ کوہ ءَ مک بوگی ءُ گھگیری کنگی اِنت ، زووگر ءِ پندل پروش دیگی اَنت ، اگاں مرچی اے بلوچ پدریچ دست ءَ ماں دست ءِ سر ءَ بہ کنت بہ نند اِیت کہ منی گوم ءَ زوراکی نہ بوگ ءَ اِنت ، من نیوٹرل مردمے آں ، باند ءَ اے زوراکی تئی سر ءَ اوں اتک کنت۔ پرچا کہ تو بلوچے یے، آس کہ کپتگ تر ءُ ھُشک نہ زانت ، کسے اگاں وت ءَ نیوٹرل بہ دار اِیت داں نہ رک اِیت۔ بلوچستان ءِ سرزمین ءِ سر ءَ لبز ء نیوٹرلے جند ءَ ھستانک نیست اِنت۔ اشی ءَ چہ پیسر پاد آھگی ءُ گھگیری کنگی اِنت ، اے نہ اِنت کہ باند ءَ گوں ھاکاں ھوار بہ ئے۔
