تابناکیں تراک ءِ سانمندی، بلوچ ڈیھ کشتارجاھے جوڑ بوت

نبشتہ کار : ڈاکٹر جلال بلوچ

رجانکار:بابا جی آر بلوچ

(مارا کشتارجاہ ءِ سیل کنائینگ آیانی مول اَت)

پاکستان ءِ تابناکیں تراک ءُ آئی ءِ پشدر چی اَت، یا ھما سوب اِت اَنت کہ آئی ءِ سوب ءَ پاکستان ءَ بیست ءُ ھشت مئی نوزدہ سد ءُ نود ءُ ھشت ءَ یکیں وھد ءَ پنچ تراکناک ءُ تابناکیں شورو آس دات، بلوچ چریشی ءَ پد کجام سکیاں گوں دوچار بیتگ ءُ دنیا ءِ سر ءَ ایشی ءِ چے سان کپتگ اَنت؟

اے نبشتانک ءِ تہ ءَ ما ھمے بنگپانی ٹپاسگ ءِ جھد ءَ کن ایں۔۔

پاکستان ءِ تراکناکیں شوروانی پروگرام ءِ گوستانکی پشدر :

چہ بی بی سی اردو ءَ شنگ بیتگیں یک اھوالے (رپورٹ) ءِ بارو ءَ 1954 ءِ ھبر اِنت، وھدے اے زمانگ ءِ مزن وزیر مھمد الی بوگرہ ءَ ماں وائیٹ ھاوس ءَ امریکی ءِ مستر آئزن ھاور ءَ گوں گند ءُ نند کتگ اَت ءُ پاکستان ءَ امریکہ ءِ ایٹم پہ وشھالی (ایٹم فار فیس) ءِ شوربندی ءِ تہ ءَ ھواری گوں جوھری تاکت(توانائی) ءِ بھرگ ءَ پٹ ءُ لوٹ ءُ دیمروی ءِ واستا جوھری کمیشن ءِ جوڑ کنگ ءِ جار جنگ بیتگ اَت۔

ایٹمی زور ءِ گرگ ءِ واستا ھمے پاکستان ءِ اولی کدم اَت،آ دیم ءَ شت ءُ مئی 1998 ءَ وتی اے شوربندی ءَ پہ سرجم کنگ ءِ واستا بلوچ مھلوک ءِ سر ءَ ھدائی ازاب دور اِش دات۔

ھمے سال ءَ بزاں 1954 ءَ پاکستان ءُ امریکہ ءِ میان ءَ دو سک ءَ المیں لشکری ساد باد ” سینٹو ءُ سیٹو” ءِ سر ءَ دزرند کنگ بوت، ھمائی ءِ پارست ءَ امریکہ پاکستان ءِ گور ءَ سلاہ بھا کنت ءُ ایشی ءِ بدل ءَ پاکستان وتی ملک ءِ تہ ءَ امریکہ ءَ پہ بنجل جوڑ کنگ ءِ واستا کمک کنت۔۔

اے اجبیں ھبرے وھدے شست ءِ دھک ءَ ھندوستان تابناکیں تراک ءِ جوڑ کنگ ءَ سر ءُ لینڈ اَت،گڑا پاکستان ءَ ایٹم بمب ءِ چکاسگ رد کرت ءُ دومی نیمگ ءَ بی بی سی اردو ءِ اے اھوال کہ ماں دامگ ءَ دست کپ اِیت، ایشی ءِ پدریں گالانی تہ ءَ اے ھبر ءِ نشان ءَ دے اَنت کہ پاکستان جوھری پروگرام ءِ رد ءَ سک دیر اِنت کہ سر پُٹ اَت۔

بلے لھتیں مردم امریکہ ءِ زورانی سوب ءَ اے پروگرام ءِ واھگدار نہ ات اَنت، چوناھیا 1954 ءَ مھمد الی بوگرہ ءَ گوں امریکہ ءِ مستر ءَ ھواریں گند ءُ نند ءَ جوھری تونائی ءِ پروگرام ءِ جار جتگ اَت، بلے جوھری کتہ کاری (ایٹمی دھماکہ) ءِ گپ نہ بیتگ اَت،اے راستی ءَ ھم کس رد نہ کنت کہ گیدی ءِ زور ءُ میان استمانی ترامگیجاں اے کتہ کاریانی ھرچ وھد ءَ بگیری کتگ ءُ پیداگ اَنت۔

ھمے واستا پچیں پتر ءَ اے پیمیں سادباد کنگ بیت نہ کنت، ھو البت جوھری توانائی ءَ امریکہ ءِ رزا اے پروگرام ءِ تہ ءَ ھوار بیتگ۔

اے ھما روچانی ھبر اِنت، کہ یک نیمگے دپ جنگی وتی سیمسر ءَ رس اتگ اَت کہ گیدی دو بھرگ ءَ ونڈ ونڈ بیتگ اَت، یک نیمگے سوشلزم ءِ واھگداریں راجمستر ءُ دومی نیمگ ءَ زرداریں ترام ءِ لوٹوکیں ڈیھ ات اَنت، ھمے روچاں سویت یونین اپگانستان ءِ تہ ءَ مزنیں شوربندیانی دیمروی ءِ واستا جوانیں رنگ دیگ ءِ جھد ءَ اَت، چہ ھمیشی ءَ امریکہ ھمے ترس ءِ آماچ بوت کہ اگاں اپگانستان سویت یونین ءَ آئی ءِ سادباداں کردانکی رنگ بہ دنت گڑا بیت کنت کہ سویت یونین گرمیں آپاں گوں وشی ءَ دسرس بوگ ءَ سوبین مہ بیت ھمے واستا آ زاران ءِ روس ءِ زمانگ ءَ چہ جد ءُ جھد کنگ ءَ اِنت، چشکہ سویت یونین ءِ دارگ ءِ واستا پاکستان یک انچیں ملکے اَت کہ ایشی ءِ ھستانک ھمے بنیاد ءَ کار ءِ تہ ءَ آرگ بیتگ، ھمے واستا گوشت کن ایں کہ امریکہ ءِ سرجمیں رزامندی ھمیشی ءَ ھوار ات اَنت، البت راجمسترانی ھما شوندات کہ مھلوک ءِ چماں مدام پدر ءُ دیم ءَ ات اَنت ءُ ھمے پروگرام ھم ھمیشانی یک بھرے اَت۔

دومی ھبر بھارت چشکہ دنیا ءِ دومی مستریں نیادی جاہ اِنت ءُ مردم ءِ بازی ءِ ھساب ءَ گیدی ءِ دومی مستریں ڈیھ اِنت، اود ءَ ھم جوھری پروگرام ءِ بارو ءَ سر ءُ پر دست کپتگ اِت اَنت، بھارت چشکہ روکپت ءِ پلپانچ ءِ ترام ءِ سوب ءَ بازیں وھدے ءَ تا زوراکی ءِ چَکّی ءَ ماں مان اڑ اِتگ اَت، چشکہ روبرکت ءَ  ھندوستان ھچبر دگہ لائک ءِ بروسھیں دوستے پگر نہ کتگ اَت، آیاں ھمے ترس اَت کہ اگاں ھندوستان اے دمگ ءِ زوراور بہ بیت، گڑا بیت کنت آ وتی اے چنڈ ءَ کہ آ پاکستان ءِ نام ءَ چہ جتا بیتگ اَت پد  ءَ بیت کنت کہ گرگ ءِ جھد ءَ ئِے بہ کنت، روکپت ءِ اے ھیال اَت کہ اگاں ھندوستان پد ءَ ٹوھیں انڈیا ءِ جوڑ کنگ ءِ جھد بہ کنت گڑا چریشی ءَ روبرکت ءِ سیتاں کستیں کہ اے دمگ ءَ آ  گرگ بہ لوٹ اِیت گڑا بیت نہ کنت، بلکیں اے بیت کنت کہ بھارت  سویت یونین ءِ اے کار ءَ یک تھتے بہ بیت، چشکہ بھارت ءِ اوشتارینگ ءِ واستا روکپت ءِ سرجمی ءَ کمک کہ آئی ءِ چیرکائی بیتگ اے ایٹمی پروگرام ءِ دیم ءِ برگ ءُ گیش کنگ ءِ واستا گرگ بیتگ۔

گپ پد ءَ کیت کہ امریکہ ءَ آیوکیں روچاں ایشانی بگیری پرچا کرتگ؟ چوناھیا اے روچاں امریکہ ءُ پاکستان ءِ بدل ءُ سدلی گڑ ءُ منج ءَ ات اَنت ءُ امریکہ ءَ پاکستان ءَ ابید ھندوستان ءِ کش گپتگ اَت، چشکہ 25 سال ءِ جنگ ءَ امریکہ ءَ پاکستان ءَ ھچ پیمیں کمک نہ داتگ، یا پاکستان ءَ امریکہ ءَ ابید ایدگہ ملکاں چوش کہ پرانس ءَ 76 ء ءَ وھدے پاکستان ءَ” ایٹمی ری راسسنگ پلانٹ” دات چشکہ اے زمانگ ءَ پاکستان ءِ مستر ءَ ایشی ءِ بگیری کرتگ اَت، بلے ایشی ءَ چہ یک ھبرے پدر بیت کہ پرانس ءَ وھدے (offer) دات گڑا آ سدک بیت کہ پاکستان اے کار ءِ نزیک گور ءَ رس اِتگ، انچش کہ رند ءَ بٹو ءِ ھکومتی ءِ زمانگ آتک گڑا آئی ءَ چہ پرانس ءَ ھمے کار ءِ کنائینگ ءَ کمک ءِ لوٹ کرت ءُ ھمے سوب ءَ پہ زر ءُ مال ءِ مچ کنگ ءِ واستا اسلامی ملکاں سری تر ءُ گرد ئِے ھم کرت، انچش کہ نوزدہ سد ءُ ھپتاد ءُ سے 1973 ءَ بٹو ءَ امریکہ ءِ زور دیگ ءُ مکن کنگ ءَ ابید ایٹمی کار ئِے بندات کرت، اے کار ءِ سرجم کنگ ءِ واستا گوستگیں کارکنوکیں مردم ئِے کش اِت اَنت ءُ ایشی ءِ جاہ ءَ ڈاکٹر کدیر ھان ئِے لوٹائینت کہ اے زمانگ ءَ آ ماں ھالینڈ ءَ زند گوازینگ ءَ اَت۔

بٹو ءَ پاکستان ءِ ایٹمی کار سرجمی ءَ سر کرت نہ کرت اَنت پرچاکہ اے زمانگ ءَ پاکستان ءِ گور ءَ بازیں کساس ءَ یورینیم امبار کرت ئِے نہ کرتگ اَت کہ اے کار ءِ واستا بس اِش بہ بنت ءُ دومی ھبر بٹو ءَ اے دور ءَ امریکہ ءِ دری کارانی وزیر کسینجر ءَ زاھریں بیھارے ھم داتگ اَت کہ اگاں آیاں اے پروگرام ءِ سر ءَ کار کرت گڑا آ نہ بچ اَنت، بٹو ءِ امریکہ ءِ نزیکی چوناھا ھمے سوب ءَ ھراب بیتگ اَنت کہ بٹو اسلامی جھان ءَ یک مچی یے ءِ تہ ءَ آرگ ءِ واھگدار اَت ءُ اے ھوالہ ءَ پاکستان اوں آیانی رھدربر جوڑ بیتگ اَت،امریکہ ءَ زانتگ اَت کہ اگاں پاکستان ءِ دزرسی اینچک ملک ءَ تا بہ بیت گڑا آ چہ دست ءَ روت۔

امریکہ ءَ گوں ھمائی ءَ 1954 جوھری پروگرام ءِ جار جتگ اَت ءُ ھمے روچاں امریکہ ءَ ایشی ءِ بگیری ھم کرتگ اَت، ھمے روچاں ایشی ءِ بگیری ءَ سر ئِے کش اِتگ اَت، ایشی ءِ مستریں سوب ایش بیت کنت کہ امریکہ  تچکی ءَ پاکستان ءَ وتی چیردست کنگ لوٹگ ءَ اَت ،کستیں تا مروچیگ ءَ تا آ کنگ ءُ پیداگ اِنت، بٹو چشکہ سویت یونین ءَ چہ ھچ پیمیں چیز نہ لوٹگ ءَ اَت،ھمیشی ءَ چہ امریکہ گیشتر ترس ءِ آماچ بوت کہ سویت یونین اے دمگ ءَ وتی دست ءَ مہ کنت، ھمے سوب اِنت کہ وھدے 1977 ء ءَ بٹو سرکار ءِ سرمستری ھلاس کنائینگ بوت ءُ امریکہ ءَ ھچ پیمیں بگیری نہ کرت ءُ ایشی ءَ چہ ابید یک لشکری زوراورے ءَ راجمستری ءِ ترام ھلاس کرتگ اَت۔

نی امریکہ ءِ بگیری مئے چماں نئیت اِنت، وھدے زیا ءَ اے کار ءِ دیم ءَ برگ ءِ وتی گامگیج تیز کتگ اَت۔

ڈاکٹر کدیر ھان ءِ گوشگ ءِ پد ءَ پاکستان ءَ 1984 ء ءَ جوھری بمب ءِ جوڑ کنگ ءِ بودشت رس اِتگ اَت، اے ھما دور اَت وھدے اپگانستان امریکہ ءُ پاکستان ءِ سوب ءَ بربادی ءِ گڈی سمیسر ءَ سر بیتگ اَت،آئی ءَ چہ امریکہ ءُ روکپت ءِ ھما کْوھنیں مول کہ آئی ءِ تہ ءَ گرمیں آپ ءِ رسگ ءِ اوشتارینگ اَت کہ امریکہ اے مول ءَ سوبمند بیتگ اَت، ھمے وجہ اَت کہ امریکہ ءَ پاکستان ءِ اے پروگرام ءِ ھچبر بگیری نہ کرتگ پرچا کہ پاکستان امریکہ ءِ سیتانی واستا سک کاری ئیں باسکے اَت، اے روچاں پاکستان ھمے واستا ایٹمی کتہ کاری(تجربہ) نہ کرتگ اَت کہ یک نیمگے آئی ءِ بس پہ نامے ھمراہ اَت سر ء بازار بھارت ءِ اے نیمگ ءَ کدم چست کنگ ءَ نہ اَت ءُ دومی نیمگ ءَ سویت یونین ءِ بگیری ءَ پاکستان ءُ امریکہ ءِ جنگ چشکہ امریکہ ءُ پاکستان ءَ دوئیں ھمے ترس ءِ آماچ اِت اَنت، اگاں پاکستان ءَ ایٹمی کتہ کاری بہ کتیں گڑا بیت کنت کہ جھان ءِ ھمدردی گوں سویت یونین ءَ بیتگ اِت اَنت، ھمے واستا اے کار ءِ کنگ ءَ پاکستان ءَ پہ کردانکی رنگ دیگ ءَ وت ءَ دور داشتگ اَت ءُ چہ ایشی ءَ چاردہ سال رند 28 مئی ءَ 1998 ءَ بلوچستان ماں دوزہ ءِ آس ءِ تہ ءَ مانبُرّ اِت ئِے ءُ اے پاکستان ءِ بے دودانی یک کدمے اَت۔

بلوچ راج ءِ سر ءَ سانمندی:

تابناکیں تراکانی(ایٹم بمب) سان سک ترند ءُ بیمناک بنت ،ھمے ھوالہ ءَ ورلڈ ھیلتھ آرگنائزیشن ءِ یک جوانیں باسکے ءَ بزاں ڈاکٹر پائلو ایم بوس ءِ گوشگ اِنت کہ” اے پیمیں سرجمیں جناور کشگ بہ بنت کہ شک اِنت کہ چرے تابناکیں تراک ءَ چہ سانمند بیتگ اَنت ءُ سرجمیں درچک ءُ لولُک کہ آیاں اے تراک ءِ بو وتی تہ ءَ کشّ اِتگ ءُ اے دمگ ءِ ماھیگ ھم ھمے پیم ءَ اَنت،اگاں ھمے برانزانی (تابکاری) ناپ کنگ بہ بیت ءُ ھر ھما جاہ ءَ کہ اود ءَ ایٹم بمب ءِ ھچ برانز سر مہ بنت، اے پوروئیں دمگ یک پسیلے جوڑ کنگ بہ بیت تاکہ ایٹم بمب ءَ چہ سانمندیں دمگانی جناورانی گوشت، شیر، ماھیگ، نیبگ ءُ سبزی دگہ ھر دابیں ورگ ءُ نوشگ ءِ ھر پیمیں ورگ ھچ پیم ءَ انسانانی ورگانی تہ ءَ ھوار مہ بنت۔”

اے یکیں گالرد ءَ چہ ھمے کساس کنگ بیت کہ ایٹمی تابکاری ءِ سان چینچوک بیمناک بنت ۔ھمے پارست ءَ ڈاکٹر پاؤلو ایم بوس ءِ گیشتریں گوشگ اِنت کہ ” ھما مردم چہ برانزاں سانمند بیتگ اَنت آ آیوکیں پنچ دہ سال ءَ تا ءُ بازیں وھد ءَ  گیشتر وھد ءَ ڈاکٹرانی ھر وھد ءَ چاروکایانی تہ ءَ بنت۔

(ڈاکٹر پاؤلو ایم بوس ءَ اے سرپدی جاپان ءِ ایٹمی پلانٹ ویل ءَ پد یکجاہ کتگ اَنت)۔

چہ ایشاں ابیدیں نادراھی آیانی تہ ءَ شومک، رسولی، گین بندی ءِ نادراھی، منڈ ءُ لنگیں زھگانی ودی بوگ، چک ءِ پیداک بوگ ءَ پیسر کپگ، بے چکی ءُ دگہ نادارھی ھوار اَنت۔

اے مریزی اگاں دیمروی کرتگیں ملکے وتی تہ ءَ اڑینت کت کن اَنت، گڑا پاکستان ءِ پیمیں دیمروی نہ کرتگیں ملک چوں چریشاں رک اِت کن اَنت ءُ دومی گپ پاکستان ءِ ھر وھد گوں بلوچستان ءَ روشت چو ماتو  ءَ  بیتگ آ چونکا پہ مئے لاچاریں مردماں شریں کار کنت ءُ پہ مئے رکینگ ءَ شریں سسا کنت۔؟

آیاں 1947 ءَ بہ گر تا مروچی کشتارجاھانی سیل ءَ کنائینگ ءُ پیداگ اِنت۔

28 مئی 1998ء ءِ روچ راجدپتر ءِ تہ ءَ یک سیاھیں روچے ھساب ءَ زانگ بیت، انچش کہ پاکستان ءَ لکانی ھساب ءَ بلوچ ھما نادراھیانی تہ دور داتگ اَنت کہ آیانی دراھی ھم بیت نہ کنت ءُ ھمے کار ئِے ھم کرتگ بلکیں آیانی چاگردی ءُ مالی زند ھم یکسر ءَ گوں ھاک ءَ ھوار کنائینتگ۔

اے جاور پہ بلوچاں چو اسراپیل ءِ پیک (سور) ءِ وڑ ءَ ایرگیجگ بوت ءُ اود ءَ آیانی وتی سرزمین ءَ چوں جھندم ءِ ندارگ پیش دارگ ءَ ئِے بنا کرت، اے جاور بلوچانی سر ءَ 28 سوچکان 1998 ءَ ھمے وھد ءَ دور دیگ بوت وھدے پاکستان ءَ راسکوہ چاگی ءَ یکے پد دگہ پنچ تابناکیں تراک(ایٹمی دھماکہ) کرت۔

ھمے تراکانی سوب ءَ راسکوہ ءِ سیاھیں کوھانی رنگ چو اسپیتگ ءَ بوت، اگاں اے تراک تیھریں کوھانی رنگ ءَ مٹ کرت کنت،گڑا چہ گوشت ءُ پوست ءَ جوڑ بیتگیں بنی آدم چینچو سانمند بیت کنت، ایشی ءِ کساس کنگ سک گران ءُ نہ بیتگینے۔ ھمے رد ءَ زانتکارانی گوشگ اِنت تابناکیں تراکانی سان یک مزنیں دمگے ءِ مردماں سانمند کرت کنت اود ءَ بازیں نادراھی تالان بیت کنت، پرچا کہ اے پیمیں کتہ کاری چہ کسانکیں برانز ماں چاگرد ءَ شنگ بیت کن اَنت ءُ دم ءِ کشگ ءِ وھد ءَ ماں بدن ءَ ھوار بنت ءُ جاندراھیں مردم ءَ سک سانمند کن اَنت۔

اے ایوک ءَ اے دمگ ءِ مردماں سانمند نہ کن اَنت بلکیں ایشانی سان ماں ھزاراں میل دور ھم تالان بیت کن اَنت، اے بیماریانی تہ ءَ، شومک، گین بندی، چک ماتی اھم اَنت،انساناں ابید اے برانزانی سوب ءَ کشاورزی، مال ءُ دلوت کہ بلوچانی زر ءِ پیداگ کنگ ءِ مستریں سوب انت آ ھم سک سانمند بیتگ اَنت، یک کساسے ءِ ھساب ءَ چہ اود ءَ بزاں چاگی ءُ ھاران ءَ ھزارانی ھساب ءَ مردماں لڈ ءُ بار کرتگ ءُ دگہ جاہ شتگ اَنت ءُ انی ایشانی یک مزنیں مھلوکے بلوچستان ءِ دگہ دگہ دمگ ءُ شھراں زند گوازینگ ءَ اَنت، تابکاری ءِ دگہ یک سانے کہ جھان ءَ دیستگ آ مولم ءِ سانمندی اِنت، بلوچستان ءِ تہ ءَ ھم  1998 ءَ بیوکیں تراک ءَ پد یکسر ءَ تا ھپت سال ءَ ھشک سالی بیتگ، اے ھشک سالی تھنا چاگی ءَ نہ بیتگ بلکیں سرجمیں بلوچستان چریشی ءَ سانمند بیتگ، مجید زھیر بادینی وتی نبشتانکے ءِ تہ “بلوچستان تایخ کے آئینے میں ” نبیس اِیت کہ ” میان اوستمانی یک ترامگیجے ءِ یک باسکے ءَ نسراللہ بڑیچ ءَ گوشتگ” آپ ءِ سکیں تنگی ءِ سوب ءَ چاگی ءِ چل درسد مردماں چاگی یلو دیگ بندات کرتگ،” اے راستی یے اے روچاں نسراللہ بڑیچ  “آکسفارم”نامیں یک دری ترامگیجے ءِ زمہ واریں باسکے بیتگ ءُ اود ءَ بزاں چاگی ءَ کہ مردم چہ ایٹم بمب ءَ سانمند بیتگ اَنت پہ ھمایاں کار ئِے کرتگ۔

اے تراکاں لھتیں ماہ ءَ رند  بلوچستان ءَ نندوکیں مردم کہ آیانی کمائی ءِ مستریں سوب مال ءُ دلوت بیتگ سک سانمند بیتگ اَنت، اے روچاں بلوچستان پوروئیں پاکستان ءِ %75 درسد مال ءُ دلوت ءِ لوٹ ئِے سرجم کرتگ اَنت، بلے ایٹم بمب ءَ پد اے ریشو  آیوکیں لھتیں سالانی تہ ءَ %47 ءَ  آتک ءُ سر بوت، چریشی ءَ زانگ بیت کہ تابکاری ءِ سوب ءَ مال ءُ زر ءِ جاور چینچک ھد ءَ تا سانمند بیت۔

بلوچستان ءِ تہ ءَ زر ءِ پیداگ کنگ ءِ اے دوئیں لازمیں پارست کشاورزی ءُ شپانکی ءِ سانمند بوگ ءِ پدریں منانک ھست اَنت، اود ءِ تھنا اناں بلکیں دگہ بازیں دمگانی کھن ءُ کانیگانی آپ ھم ھشک بوان اِت اَنت۔

آپ ءِ جھل روگ ءِ سوب ءَ بورانی آپ ھم نزور تر اِتگ ات اَنت کہ ھر ھما دمگ ءِ بوریں چات بیتگ اے سک سانمند بیتگ اَنت ءُ برزاد ءَ اے تراکانی سوب ءَ چاگردی بدلی کہ ایشی ءِ سوب ءَ تا ھمک باریگ ءَ تا ھپت سال ءَ ھور ءِ نہ بوگ ءَ مھلوک ءِ زند سک ءَ گڑ ءُ منج بیتگ اَت، اے سرجمیں کاراں چہ اگاں ما بلوچ راجکاری بہ چاریں گڑا ایشانی سر ءَ لب ءُ لالچ ءِ جن سوار اَت کہ آیاں بلوچستان کساب جاھے ءِ تہ ءَ دکہ دیگ ءُ دور دیگ ءَ ابید ھچ نہ اشتگ،آئی ءِ منانک اے وھد ءِ بلوچستان ءِ سر وزیر ءُ بلوچستان نشنل پارٹی ءِ سرمستر اکتر مینگل ءَ تا چاگی ءَ نواز شریپ ءِ گاڑی ءِ ڈرائیونگ سیٹ ھیال گور کتگ اود ءَ آئی ءَ ھمے روچانی یات تاجگ کرت وھدے بلوچ سرداراں انگریزانی بھگی ھم کش اتگ اَنت۔

1998 ءَ اکتر مینگل ءَ پد ءَ راجدپتر نوک کرت، اے وھد انگریزانی چانوگری ءَ ابید نواز شریپ ءِ انگریزانی داشتگیں پِٹو اَت ھمیشی ءِ دمب ئِے داشت، چشکہ ایندگہ راجکاراں ھم وتی ھیش ءُ نوشانی واستا اے بلوچ چکچینی ءِ بگیری ھچ کس ءَ نہ کرت،پاکستان ءِ ایٹمی تراکاں دمگانی ایندگہ ملکانی سر ءَ سان:

پاکستان ءَ وھدے ایٹمی تراک کرت گڑا آ وھد ءَ اے دمگ ءَ چین، روس ءُ ھندوستان ءَ ھم اے بمب جوڑ کرتگ اَت، بلے ایشی ءَ پد ھمے کار ءِ تہ ءَ شمالی کوریا ءُ ایران ھم وتی پاد دور دیگ ءِ جھد ءَ کنگ ءَ اِت اَنت، اے گپ انکار ھم کنگ نہ بیت کہ اے ملکاں پاکستان ءِ سرجمی ءَ رھدربری گون اَت، پرچا کہ شمالی کوریا ءُ ایرانی سرمسترانی رھوت ءِ سوب ءَ ڈاکٹر کدیر ھان ءِ سر ءَ بھتام جنگ بیتگ اَت ءُ آ یک مزنیں وھدے ءِ واستا چم بند کنگ بوت، اے جاورانی تہ ءَ آ ڈیھ وتی مھلوک ءَ ابید دیمداری ترام ءَ پہ زر جنگ ءَ اِت اَنت، ھمے سوب ءَ اے سرجمیں دمگ ءِ مردمانی زند ءِ کیلار پشت ءَ روان بوت ءُ آ روچ ء مرچی ھمے زند ءُ جاورانی تہ ءَ گوزگ ءَ اَنت، دومی ھبر ایٹمی اسولانی وجہ ءَ دنیا ایران ءُ شمالی کوریا ءِ جاور ءُ اے رد ءَ اے ملک روکپت ءِ دری شونداتاں چہ ھمے سما بیت کہ دنیا یک مزنیں جنگے ءِ دیم ءَ روگ ءَ اِنت ءُ نہ زان آں اے جنگ کدی بندات بیت ءُ اے آپت کدی ءُ کجام وھد ءَ دنیا ءَ پتا ایت۔

بلوچ راج ءِ سر ءَ چے گوست آیانی وتی گوشتگیں:

1- مھمد نور کہ چھتر ءِ کوھی درچانی جھمند اَنت، اے تراکاں رند آ “ریکو” نوشکی ءَ لڈ ءُ بار کنت،آئی ءِ گوشگ اَت کہ ” آ وھد ءَ وھدے تراک بوت ایشی ءِ سوب ءَ رمبوکیں چمگ کہ مئے زر جوڑ کنگ ءِ سوب اِت اَنت، ایشانی تہ ءَ چو سیاھگ دابیں شے ھوار بوت، اے آپانی ورگ ءَ مئے دلوتانی دپ ءَ ھون ءِ پِٹ ءَ شتور گرگ بندات بیت ءُ سک ءَ شانت اش۔ھمے سوب ءَ ما چہ اود ءَ لڈ ءُ بار کنگ ءَ لاچار بیت ایں، ایشی ءَ ابید اے تراکاں پیش مئے زالبول پہ چِلگ بوگ ءِ واستا ھچبر نادراھجاہ ءَ نہ شتگ اَنت پرچا کہ آیاں اے دور ءَ اینچکیں مزنیں تکانسری ءِ دیمپانی نہ بیتگ، بلے چہ اے تراکاں پد چِلگی ءِ وھد ءَ بازیں زالبول مرگ ءِ ارجان بیت اَنت”

2۔ ابدلکادر ءِ الاکہ ” مالدین” راسکوہ ءِ جھمنندے اَت، آئی ءِ ھساب ءَ اے تراکانی سوب ءَ چم ءِ نادراھی سک باز بوت چوناھا اے دمگ ءِ جھمنند ھچبر اِے نادراھی ءِ دیمپان نہ بیتگ اَنت، چم ءِ نادراھیانی تہ ءَ چمانی موتی آرگ ءُ شپ کورگ ءِ نادراھی سک باز بوت ءُ ھد ءَ دیم ھمے نادراھی شنگان اَت، روچ ء مرچی ءَ مئے دمگ ءِ مردم ھمے نادراھیانی آماچ اَنت۔”

3۔ اسمائیل بلوچ کہ آ ھاران شھر ءِ جھمنندے، آئی ءِ گوشگ اَت چمانی نادراھی انچش باز بیت، کہ مرچی ءَ ھم ھاران ءِ چمانی نادراھجاہ ءَ ھزارانی کچ ءَ مریزانی الاج بیتگ اَت، اے نادراھیانی تہ ءَ چمانی موتی سک باز اِنت، چوناھیا چہ چریشی ءَ پیش مئے دمگانی مردماں چشیں نادراھی گمان ھم نہ بیت۔”

4۔ کمال بلوچ کہ ھاران ءِ جھمنند اَت آئی ءِ گوشگ اَت کہ”

اے زمانگ ءَ من کسان اِت آں، بلے آ ویل ءَ من ھچبر نہ شموش آں، وھدے منی بلک 50 سال ئیگ اَت، چمانی نادراھی ءَ گور جت ءُ ھمیشی ءِ سوب ءَ آئی ءِ چم سک ءَ سانمند بیت اَنت۔”

5۔ راسکوہ ءِ دگہ جھمنندے الی جاہ سیاھپاد ءِ گوشگ اَت کہ ” ایٹمی تراکاں چہ پد انسانی نادراھیاں دمگ وَ پتاتگ اَت بلے ایشی ءِ ھواری ءَ مئے مچانی ڈگار ھم ھشک بیگ ءَ بندات بیت اَنت، آ آیوکیں دو سالانی تہ ءَ مچانی کنٹ مئے مال جوڑ بیت اَنت۔”

5۔ نوشکی ءِ جھمنند ابداللہ ءِ گوشگ اَت کہ یک اجبیں ویلے ءِ گواھی ءَ من دیاں” یک مردمے ءَ وتی یک زھگے ءِ رکینگ ءَ پہ وتی دومی زھگ پہ بیست کلدار ءَ بھا کنگ ءَ لاچار بوت۔”

6۔ اے گپ ءِ گواھی ءَ سرجمیں بلوچستان ءِ ھر مردمے دنت کہ شدیکی ءُ تابناکی ءِ سانمندی ءِ سوب ءَ چہ مردمانی مستریں کمائی ءِ سوب مالداری سک سانمند بوت، اے زمانگ مردماں وتی پس ءُ دلوت پہ کمکیں زرے ءَ بھا کرت اَنت، کہ ھما پسانی یا جناورانی کیمت 500 یا 600 ات آ پہ سد دو سد کلدار ءَ بھا اِش کرت اَنت۔

7۔ابراھیم کہ چاگی ءِ جھمنندے اَت گوشگ ءَ اَت کہ ”  اگاں مروچی ھاسکن چاگی، ھاران ءُ راسکوہ ءِ چارگ ءَ بہ رو اِت گڑا ترا اود ءَ لنگ ءُ منڈانی کمی گندگ ءَ نئیت کہ اے تراکاں چہ پد ودی بیتگ اَنت۔”

8۔چاگی ءِ یک جھمنندے سلام بلوچ ءِ گوشگ ات کہ ” اے تراکانی سوب ءَ  سک باز انسانی نادراھیاں ابید مئے چمگانی آپ ھم ھشک بیتگ اَنت ھمیشی ءِ سوب ءَ چاگی ءُ کش ءُ گور ءِ مزنیں مردمے ءَ چود ءَ لڈ ءُ بار کنگ ءَ لاچار بیتگ ، اود ءَ چاتانی آپ 15 یا 20 پُٹ ءَ بیتگ اَنت آ مروچی سد پُٹ ءَ گیش جھل ءَ شتگ اَنت ءُ ھمے تابناکی ءِ سوب ءَ کشار ھم سک کم بیتگ اَت۔” سلام ءِ گیشتر گوشگ اَت کہ مروچی تا ما تابناکی ءِ سانمندی ءِ وجہ ءَ سک گرپتار ایں، گوستگیں سے ماھانی تہ ءَ چاگی ءِ جھمنندانی تھنا 550 مردم  اپینڈکس ءِ بر ءُ برین اِش شال ءَ بیتگ اَنت۔

9۔نال بلوچستان ءِ جھمنند زپر بلوچ ءَ اے بارو ءَ گوشتگ اَت کہ شدیکی ءِ اے روچاں ھاران ءِ سک باز مردماں مئے دمگ ءَ لڈ ءُ بار کتگ ءُ آتکگ اَنت، یک روچے من نال کور ءِ دومی نیمگ ءَ شت آں کہ من دیست مزنیں میش ءُ گوک پسانی جون شنگ ءُ شانگ اِت اَنت ءُ مرتگ ءُ کپتگ اَنت، اود ءَ من یک بزرگے اے ھوالہ ءَ جست گپت گڑا آئی ءَ گوشت “ایٹمی تراکاں چہ پد کہ اے ھشک سالی آتکگ اے ھمیشانی سوب اِنت۔”

اے وَ لھتیں مردمانی رائے اِت اَنت۔

اگاں دری ترامجاہ اے نیمگ ءَ دلگوش بہ دے اَنت گڑا گوں سدکی ءَ گوشت کناں کہ پاکستان ءِ ایٹمی تابناکی ءِ سانمندی ءَ بلوچ راج ءَ را چہ جاپان ءِ شھر پوکوشیما ءَ چہ گیشتر سانمند کتگ، اود ءَ وَ تابناکی ءِ سانانی واستا وَ گامگیج زیرگ بیتگ بلے ماں بلوچستان ءَ چشیں ھچ پیمیں درور ترا گندگ ءَ نئیت کہ پاکستان ءَ اے نیمگ ءَ شریں گامگیج زرتگ۔۔

انسانیت ءِ دژمن پاکستان ءَ وَ بس تکبیر بزاں اللہ اکبر ءِ توار برز کنگی بیتگ اَت، انچش کہ آ دژمن ءِ ھلاپ ءَ پہ جھاد ءِ پٹ ءَ کہ آیانی کشگ ءَ در آتکگ اَت، آیانی اے تکبیر ءِ روچ بزاں “یومِ تکبیر” بستار ءَ من ءَ یک نیکراھی زانتکارے ءِ ھما لپز یات آتک اَنت،کہ آئی ءَ جما ءِ نماز ءِ گوشتانک ءِ دور ءَ گوشتگ اَت۔ کہ ” نام اوں ھمے ھبر ءِ نشان کنگ ءِ واستا بس اِنت کہ بلوچستان کربانی ءِ جانور پھم اتگ ءُ آ تکبیر دیگ بیتگ” اے لپز نامداریں بلوچ نیکراھی زانتکار  مولانا ابدالازیز  ساھب ئیگ اَنت کہ آ انگیں وھد ءَ شال ءَ ایریگیشن کالونی ءِ جامہ مسیت ءِ پیش امام انت۔۔۔