دگنیا ءِ راجدپتراں ما بہ چار اِیں گڑا مستریں تاکتوریں ڈیھ امریکہ گْوشگ بیت کہ آئی دومی جھانی جنگ ءَ پد وت ءَ یک تاکتوریں ڈیھے ءِ نام ءَ دیم ءَ آؤرتگ۔
ءُ دگنیا ءِ راجدپتر ءِ توکا آئی ءَ مزنیں کردے پیلو کتگ۔
بہ گندئے اے وھد ءَ ھم آئی ءِ دست ءَ مزنیں راجے ایردست بیت ، گڑا ھمے پیم ءَ آئی ماں جھان ءَ وتی تاکت ءِ گیش کنگ ءِ ھاتر ءَ جاپان ءِ شھر ناگاساکی ءِ سر ءَ وتی بنداتی ایٹمی ارش ءَ کنت کہ چر ایشی ءَ بازیں مردمے مر اِیت۔
دومی نیمگ ءَ ھیروشیما ءِ سر ءَ ھم ھمے وڑیں ارشے بیت کہ چر آئی ءَ 74 لک مردم مرگ ءِ آماچ بیت۔
ھمے وڑ ءَ پرانس ھم وتی ایردستیں راج بزاں الجزائر ءِ سر ءَ ھم یک ایٹمی ارشے کنت کہ چر آئی ءَ الجزئر ءِ لس مھلوک مرگ ءِ آماچ بیت۔
بہ گندئے اے شھرانی توکا انگت ھچ نہ مان اِیت ، ءُ زندمان ءِ ھمک آسراتی ھم اد ءَ نیست۔ ھر وڑیں نادْراھی ودی بوتگ ءُ بوگ ءَ اِنت ، پرچا کہ اے وڑیں ارشانی پژدر ءِ درگت ءَ اگاں ما چمشانکے بہ دئے اِیں گڑا منی ھیال ءَ آ نزور ءُ تاکت ءِ ھبر دیم ءَ کئیت۔
ایشانی ارشانی کنگ ءِ مول ءُ مراد ھمے بیتگ ءُ ھمیش اِنت کہ ما وتی تاکت ءَ گیش بہ کن ایں ءُ دگنیا مارا یک تاکتوریں ڈیھے ءِ نام بہ زانت۔
ھمے وڑ ءَ دگنیا ءِ تاکتوریں ڈیھانی وڑ ءَ انڈیا ءَ ھم وتی ایٹمی تاکت ءَ پدر کنت۔ انڈیا ءِ ایٹمی تاکت ءَ پد پاکستان سرپد بیت کہ ھما ڈیھ چہ من پد آجو بیتگ
آ وت ءَ یک تاکتوریں ڈیھے ءِ من اِیت۔ گڑا ما ھم چہ آئی ءَ نزور نہ اِیں۔
پاکستان یک مزنیں شورے (plan ) کنت کہ وت ءَ ایٹمی تاکتے جوڑ بہ کناں ، اے وھد ءَ پاکستان ءِ سرکماش بزاں نواز شریپ بیت ءُ گوں بلوچستان ءِ ھما وتگڑیں سیاستداناں ھوار بیت ءُ پاکستان ءِ ایٹمی تجربہ ءَ یک پندلے ءِ دْروشم ءَ کنت۔ ایٹمی تجربہ ءِ بنداتی روچ 28 سوچکان 1998 ءَ پاکستان
بلوچستان ءِ ھما مزنیں شھر ءَ گچین کنت کہ آ بلوچستان ءِ مزنیں شھر ءِ نام ءَ زانگ بیت ، بزاں چاگی۔
بلے! اے ھبر راستاں گلامیں زند ءَ بستار نیست ،
زورگر چوناھیا مدام ھمے جیڑ اِیت کہ من گلام ءِ زندمان ءَ ولگوج بہ کناں ، اگاں آ زندگ بہ بیت یا مرگ ءِ تلام ءَ بہ بیت۔ تھنا زورگر ءِ مزنیں بستار مال ءُ مڈی اَنت۔ ھمے پیم ءَ پاکستان ھم بلوچستان ءِ وارس ءُ واھند بلوچ ءَ بنی آدم نہ لیک اِیت۔ اگاں بہ چار اِیں چاگی ءِ مستریں ءِ دمگ راسکوہ ءِ کوھانی دلبند ءَ پاکستان وتی ایٹمی اُرش ءَ کنت۔
زمین زانت ءِ رد ءَ چاگی ءِ سیمسر اوگاستان ءُ ایران چنچو گستا اَنت ، دومی نیمگ ءَ وتی دیمپانی ءَ کن اَنت۔ بلے بلوچ ءُ بلوچستان ءِ بزگیں مھلوک مدام دوئیں نیمگ ءَ مرگ ءِ چنکاں کپتگ۔ پاکستان یک گپتمانے( discourse ) دیم ءَ کار اِیت ءُ وتی بے سوبیں امل( act ) ءَ سوبین کنت۔ یک نیمگے ءَ وتی راجی بیرک ءَ مک کنت ءُ گوں ھما وتگڑیں بلوچ سیاستداناں اکس کشی کنت ءُ رسانکدار ءَ اے ھبراں دیم ءَ کار اِیت
ءُ وت ءَ پہ زور تاکتوریں ڈیھے ءِ من اِیت۔ ءُ ھمے روچ ءَ پاکستان ( یوم تکبیر ) ءِ نام ءَ پدر کنت ءُ مرچی سرجمیں پاکستان ءِ لس مھلوک اے روچ ءَ پہ ناز ءُ شان برجم دار اِیت۔ بلے پہ ما اے بژن ءِ گپ اِنت کہ وتی لوگ ءِ سوچگ ءَ مئے جند ءِ بلوچ ءِ دست ھوار بیت۔ ھما وتگڑیں سیاستدان مرچی نامگپتیں اسمبلی ءَ نشتگ ءُ بلوچ ءِ ھک ءِ گپ ءَ کنت ، گڑا کج ءَ بوتگ اَنت ھما چاگی ءِ جاہ منند ءُ بزگیں بلوچ کہ پاکستان ءَ وتی تاکت ھمود ءَ پدر کتگ کہ آ روچ ءَ بلوچ ءُ بلوچ ءِ سرڈگار ءُ زندمان مرگ ءِ امبازاں بوتگ۔
چر اے ایٹمی تراک ءَ پد ھما سبزیں درچکانی سبزیں تاک گندگ نہ بوتگ اَنت ، ھما کوھانی سرمگیں رنگ گندگ نہ بوتگ اَنت ، ھما بزگیں بلوچ ءِ لوگانی دریگ گندگ نہ بوتگ ، ھما درتہ پچیں بلوچ ءِ بزگی گندگ نہ بوتگ۔ مرچی ھما وتگڑیں سیاستدان کہ آیانی دست ءَ بزگیں بلوچ ءِ ھوناں گوں سھر اَنت ، اے روچ بلوچ ءِ پدریچ ھچبر بے ھیال کت نہ کنت۔ پرچا کہ اے روچ پہ بلوچ راج ءَ ھما گرانیں روچاں چہ یک روچے کہ بلوچ راجدپتر ءِ تاکاں نبشتگ اِنت۔
بلے! بازیں جستانی اد ءِ الم جست بیت کہ پاکستان ءَ بلوچستان ءِ سر ءَ وتی ایٹمی تجربہ ءَ پرچا چاگی ءَ گچین کتگ ؟ اگاں بلوچستان ءِ ھما جاہ ءِ سر ءَ چمشانکے بہ دئیں گڑا ایٹمی تجربہ ءَ پد چے آسر بوتگ۔
الم مارا گندگ ءَ کئیت کہ وڑ وڑیں نادْراھی پدر بیت ،
انچوش کہ شومک (کینسر) ءِ وڑیں ھترناکیں نادْراھی دیم ءَ کا اَنت۔ دومی نیمگ ءَ اے دمگ ءِ مردم وتی ھنکیں ، مال ءُ مڈیانی یل کن اَنت دیم پہ دگہ ھلک ءُ میتگاں سرگر اَنت۔ کشارکاری ءِ رد ءَ انگت ھچ نہ رد اِیت ، نوکیں ھالانی رد ءَ انگت بازیں بلوچ نادْراھی ءِ آماچ اِنت۔
ھمک دمگ ویرانگی ءِ دنزانی تہ ءَ گار ءُ ھچ سھرا نہ بیت ، بس ھر نیمگ ءَ کہ چماں شانک دئے ستکگیں درچک ءُ دارانی بوہ آتار اِنت۔ مرچی اے روچ پہ ھمک بلوچ ءَ بازیں جست ودی کنت کہ آیانی پسہ دیگ لوٹ اَنت۔
