جنگ چوناھیا یک ناوشیں کارے ، ءُ چر ایشی ءَ مردماں باز ھرابیں سان رست کرت کنت۔ اے ھم راستے کہ چہ جنگ ءَ مردماں چاگردی ، زری ، جانی ءُ مجگی سان ھم رست کرت کنت ، بلے انگت بنی آدم ، ڈیھ ءُ چاگرد جنگ ءَ گچین کن اَنت۔ پرچا کہ جنگ وھد ءِ زلورت بیت ، جنگ نوکیں راجے ودی کنت ، جنگ آجوئی دات کرت کنت ، ءُ جنگ آسودگی کار اِیت۔ پمیشکا جنگ لھتیں جاورانی رد ءَ سیت مند اِنت۔
جنگ ءِ اولی سیت ایش اِنت کہ وھدے 1775 ءَ بہ گر تاں 1783 ءَ برٹش امریکہ ءِ سر ءَ زورآور بیت ، ھمے ھشتیں سالانی دوران ءَ زورگر ءُ نزور ءِ میان ءَ جنگ بیت۔ گڈی ءَ امریکہ برٹش ءِ بگیری ءَ آجوئی گیپت ، چر اے جنگ ءَ پد امریکہ ءِ تہ ءَ راجمستری ءُ وتواجھی ءِ ترامگیج دیم ءَ کئیت۔ بازیں ھون ءِ ریچگ ءَ پد امریکہ ءِ مردمانی بھت ءَ ایمنی ، آسودگی ءُ آجوئی نبشتہ کنگ بیت۔ مرچی ما وت گندگ ءَ اِیں کہ امریکہ جھان ءِ تہ ءَ یک تاکتوریں راجے زانگ بیت۔
جنگ ءِ دومی سیت ایش اِنت کہ وھدے 1914 ءَ بہ گر تاں 1919 ءَ اولی جھانی جنگ بیت ، گڑا ماں یوروپ ءَ زوراکیں ایمپائر ھتم بہ اَنت ءُ نوکیں راجانی ھستی ماں دگنیا ءَ دیم ءَ کا اَنت۔ ءُ پد ءَ پہ بازیں نزوریں راجانی کمک کنگ ءَ ‘ لیگ آپ نیشن ‘ کمکی دْروشم ءَ دیم ءَ کئیت۔ ھمے نوبت ءَ میان استمانی کمک پہ راجاں ھم دیم ءَ کئیت۔ ایشی ءِ بزانت ایش اِنت کہ جنگ کْوھن ءَ را نوک کنت ءُ نوک ءَ را نوکتر کنت ، گڑا پمیشکا جنگ ھژدری اِنت۔
جنگ ءِ سیمی سیت ایش اِنت کہ وھدے 1939 ءَ بہ گر تاں 1945 ءَ دومی جھانی جنگ بیت ، گڑا چہ پاشسٹ ءُ ٹوٹلی ٹیرین رجیم ءِ ھتم بوگ ءَ زلم ءُ زوراکی ھم مرگ ءِ آماچ بیت ءُ چہ ھمے جنگ ءَ نوکیں راجمستری دیم ءَ کئیت ءُ بنی آدم ءِ اکبالانی پیلو کنگ ءَ وتی کرد ءَ ادا کنت۔ ءُ میان استمانی کمک ھم یو این او ءِ دْروشم ءَ گندگ بیت۔
گڈی ءَ اے گپ راست اِنت کہ جنگ یک راجے ءِ مردماں تاوان دنت۔ انچوش کہ ما بلوچی ءَ گْوش اِیں وھدے کہ ” آس کپ اَیت تر ءُ ھشک نہ زانت ” ، چوش کہ جنگ ءِ تہ ءَ کسان ءُ مزن ، ورنا ءُ کماش دْرا کشگ بہ اَنت ، بلے چے کن ئے یک راجے ءَ را زندگ بوگ ءِ ھاتر ءَ جنگ ءِ کشک ھم گچین کنگ لوٹ اِیت۔ جنگ دوئیں نیمگ ءَ تاوان ءُ سیت دنت ، بلے بازیں رنداں پہ سیت ءِ دزگرگ ءَ راج چہ تاوان ءَ سرگْوز اَنت۔
