ھزاراں سلام پہ ترا ھمبلکیں ھمل!
انوں کہ من تھنا نشتگ ءُ اے نمدی ءَ پہ تو نبشتہ کنگ ءَ آں ، وھد ءُ پاس شپ ءِ یازده ءُ سینزدہ منٹ اِنت۔ اے ساھت ءَ من وتی لوگ ءِ پیژگاہ ءَ نپادانی سر ءَ تچک ءُ میتگ ءِ لیٹ مرتگ اَنت ، بلے ماه ءَ دراھیں میتگ رژناہ کتگ۔ دمک انچوش رژناہ اَنت گْوش ئے کہ روچ اِنت۔ سرجمیں میتگ ھاموش ءُ ھچ برمش ءُ توار نیست ، بس چرتے ءِ چری چری ءِ توار چہ کمو دیر ءَ پیداک ءُ شپ پہ بے تواری جزان۔
ھمل!
بلکیں تو ھم چو منی وڑ ءَ جیڑگ ءَ بہ بہ ئے کہ اے وھد ءَ من پرچا ترا یات کتگ؟ پد ءَ من وتی تھنائی ءِ ھال ءَ ترا پرچا گْوشگ ءَ آں؟
بلے منی مھروانیں سنگت!
گپ اگاں یات کنگ ءِ بہ بیت ، ما و ھچ وھد ءَ چہ تو بے ترانگ نہ اِیں۔ یات ھما مردم کنگ بیت کہ مردم چہ آئی ءَ بے ترانگ بہ بیت۔ ھمل جان تو انچیں کردے ءِ واھند کہ زمانگ چہ تو بے ترانگ بیت نہ کنت ، من و گنتر کہ منی زندگی ءِ یک ءُ دو بیگاه تئی ھمراھی ءُ ھوری ءَ گْوستگ۔
ھملوو!
من ترا ھال دیگ لوٹ آں کہ مرچی امبر سمین ءِ شئیرانی دومی دپتر “شپ تاک” چاپ ءُ شنگ بوتگ ،
من دو تاک لوٹائینتگ کہ دو سئے روچ ءِ تہ ءَ من ءَ سر بہ اَنت۔ یکے من پہ تو لوٹائینتگ اَت ، بلے پد ءَ ترانگ ءَ کپت آں کہ تو اد ءَ نہ ئِے ، بلے من دومی تاک کینسل نہ کنائینت۔
من اراده کتگ کہ ھمے کتاب ءَ تئی مانش ءِ سرون ءَ ایر کن آں ، تو ھردیں واب ءَ پاد کائِے گڑا کتاب ءَ وان ئِے۔ من زان آں ترا بے کتاب ءَ وش نہ بیت ، بلے ترا دگہ ھالے ھم دیگ لوٹ آں کہ ماھے بیت دژمن ءِ لشکرکشی برجاہ اِنت۔ کدی سائجی ءِ کوھاں پتریت کدی کیچ ، بولان ءُ ژوب ، تو الم زان ئِے کہ دژمن ءَ پروش وارتگ۔ نوں نہ زانت کہ چے بہ کنت ، بلکیں چو گرّیں مار ءَ سرسر جنگ ءَ اِنت۔
ھمل تو گپے ءَ سرپد ئِے کہ دژمن ءَ چہ شمئے مانشاں ھم ترس اِیت ، تئی مانش ءِ دیمی نیمگ ءَ راہ ءِ سر ءَ بدواہ ءَ چُنگی یے بستگ ءُ دو سپاھیگ نادینتگ۔ ھمے ترس ءَ کہ بلکیں تو پاد بہ یا ئِے ءُ آئی بنجل ءَ تیرگواری بہ کن ئِے۔
ھملجان مرچی تئی مات اتک ءُ تئی مانش ءِ سر ءَ اگربتی ءُ سوچکی یے بُن دات ، گلاب ءِ پل چنڈ اِت ءُ نیک دوا ءِ کت۔
ھمل پدائیگیں سرمچار!
تو گپے زان ئِے تئی مات مرچاں مھکم اِنت ، انچوش کہ تئی مھر پہ زمین ءَ مھکم اَت۔ ھمل جان تو دژمن پروش دات ، تو دژمن ءِ ودی کرتگیں ترس چہ وتی میتگ ءِ مردمانی دل ءَ کش اِت۔ تئی میتگ ءِ پیر ءُ ورنا ، زھگ ءُ زالبول درست تئی سر ءَ پھر بند اَنت ءُ ترا ” شھید ء وتن ” ءِ نام ءَ توار جن اَنت۔ ھرکس کہ تئی مانش ءِ سر ءَ روت ، گڑا مھناج ءِ گْوشتگیں اے سوت ءَ الم گْوش اِیت ” ھمل پدائی سرمچار “
اے نمدی ءَ چہ ھمد ءَ آسر کن آں ، ھمل جان ھاوند ءِ میار ئِے۔
تئی دیریگیں سنگت
رمس: 17 مئی 2024
