اے ساھت جنت ءَ کمتر نہ اِنت نبشتہ کار: منزور آدل

تو سرمچارے بہ بہ ئے ءُ چہ گس ءَ در بہ کپ ئے کہ تئی ھند ءُ میتگ ءَ زورگریں پاکستان ءِ لشکر بئیت ءُ بنجل بہ کنت ، ءُ اے وھد ءَ تئی امر کساس چاردہ یا پانزدہ سال بہ بیت۔ تئی بروت نوک شنزگ ءَ بہ بہ اَنت ، تئی زنوک ءِ سر ءَ بس چار ٹال ریش بہ بیت۔ آ وھد ءَ تو انچو نرم ءُ نازرک بہ بہ ئے ءُ وتی مات ءُ پت ءَ را پہ چم ءِ چارگ ءَ دل مہ بہ ئے ، تئی رنگ چو الگدار ءَ زرد یا چو ٹماٹر ءَ سھر بہ بیت۔ تو وتی میتگ ءِ کلیں ھمساھگ ءُ مردماں چو چکے ءَ دوست بہ بہ ئے ، شمئے ھر سیاد ءُ ھمساھگ کہ لوگ ءَ بئیت آ الم تئی گُباں بہ گیپت ءُ ترا گوں مسکرائی بہ کنت ءُ دست ءَ سر ءَ ایر بہ مرز اِیت۔

لشکر ءِ آھگ ءُ نندگ ءَ چہ پد شمئے ھند ءِ توامیں مردم بہ لڈ اَنت ءُ دگہ ھندے ءَ بہ رو اَنت ءُ آباد بہ بہ اَنت۔ تو گوں راجی آجوئی ءِ جنگولاں دیم پہ کوہ ءَ بہ روئے ، کساس سرجمیں سالے ءَ وتی لوگ ءِ مردماں مہ گندئے۔ سالے ءَ پد کہ تو وتی لوگ ءَ پہ گندوکی بہ روئے ، تو لوگ ءَ سلام بہ دئے ءُ تئی مات تئی گندگ ءَ ھوار چمانی ارساں داشت مہ کنت ءُ بہ گْوش اِیت کہ ” من تئی سالونکی ءِ مراد نہ دیست اَنت۔ منی واھگ بوتگ کہ من ترا گوں سالونکی ءِ پوشاکاں بہ گنداں ، بلے منی اے واھگ گوں ھاکاں بوت”۔

تو وتی مات ءَ تسلا بہ دئے ءُ بہ گْوش ئے ” اماں! اللہ ھیر کنت ، تو منی سالونکی ءِ مراداں الم گندئے۔ اے دژمن درامدے ، ءُ اے گلزمین مئیگ اِنت۔ ما الم روچے ناں روچے اے دژمن ءَ چہ وتی سرڈگار ءَ در کن اِیں ، انشااللہ تئی اے واھگ الم سرجم بیت”۔

تو گوں وتی سرمچاریں ھمراھاں شام بہ کن ئے ءُ پد ءَ دیم پہ وتی اوتاک ءَ در بہ کپ ئے ، ھمے درکپگ ءِ وھد ءَ تئی مات ترا نیک دوائی بہ کنت ءُ دست ءَ بڈ ءَ بہ جنت۔ چیزے مدت ءَ پد شمئے ھند ءِ مردم پد ءَ کم کم ءَ بہ رو اَنت ءُ وتی ھما کْوھنیں لوگاں آباد بہ بہ اَنت۔ تو گوں سنگتاں دوریں دیارے ءَ بہ روئے ، کساس ھشت سال ءَ تئی سر جند ءِ دوار ءَ مہ کپ اِیت۔ اے ھشتیں سالانی تہ ءَ کدی کدی تئی لوگ ءِ مردمانی گوم ءَ بس گوں مات ءَ ھال بہ بیت۔ تو ھر وھد ءَ کہ موبائل ءَ گپ ءُ ھال کن ئے ، کدی کدی تئی مات گریوگی بہ بیت ءُ بلے انگت ترا تسلا بہ دنت۔ بلکیں تئی مات ءُ پت ءِ لوگ ناشریں لشکر ءِ مزنیں بنجل ءِ کش ءَ بہ بہ اَنت ءُ تو وتی لوگ ءَ شت مہ کن ئے۔

ھشت سال ءَ پد تو وتی نزیکیں مردمے ءَ را
ھال بہ کن ئے ءُ بہ گْوش ئے کہ ” تو برو منی مات ءَ را بہ گْوش مرچی شپ بہ یا من تئی چارگ ءَ کا آں”۔ تئی نزیکیں مردم مات ءَ ھال بہ دنت ءُ مات تئی آھگ ءَ پیسر بئیت ءُ ھمائی ءِ لوگ ءَ وداریگ بہ بیت ، ءُ آ ھمے جیڑگ ءَ بہ بیت کہ ھشت سال ءَ پد منی چک چونیں رنگے ءَ بیت۔ آ بہ گْوش اِیت منی دل ءَ منی چک سکا لاگر اِنت ، آ گوں ھمے وڑیں جیڑگاں جیڑگ ءَ بہ بیت ءُ تو سلام بہ دئے ، تئی مات کہ ترا بہ گند اِیت آئی ءِ دل ءَ آئرا سپتے ارجل رس اِتگ۔

تئی گندگ ءَ گوں آ وتی چمانی ارساں داشت مہ کنت ، بلے ترا انگت تسلا بہ دنت ءُ بہ گْوش اِیت کہ ” من نہ گریواں منی چک”۔ ھمے ساھت ءَ تئی مات تئی سر ءَ وتی کونڈ ءِ سر ءَ ایر بہ کنت ءُ دست ءُ پاداں بہ پرنچ اِیت ، تو چہ زندگی ءِ کلیں رنج ءُ گماں شمشکار ءُ بے ھیال بہ بہ ئے۔ تئی مات ترا وتی سرزاناں بہ نادین اِیت ءُ گُباں بہ گیپت ءُ برے تئی سر ءَ بہ پٹ اِیت ، بلے چمے چہ ارساں پُر بہ بہ اَنت ءُ ترا انگت تسلا بہ دنت داں
تو پہ روگ ءَ جاڑیگ بہ بہ ئے۔ تئی مات ترا دست ءَ بڈ ءَ بہ جنت ءُ گوں دل ءِ جھلانکی ءَ دوا ء نیک بہ کنت ءُ گپڑے راہ ءَ ترا راہ بہ دنت ، گڑا اے ساھت چہ جنت ءَ ھچ رنگ ءَ کمتر نہ اِنت۔

5/2/2024