منی کوٹی ءَ ناکو کمانچر ءِ کش اِتگیں اکس من ءَ مدام گلامی ءِ بدیں دْروشم ءَ پیشدار اِیت۔ اے اکس ءِ تہ ءَ سے کسانیں گونڈل ھست ءُ ایشاناں آپ ءِ کین گون ءُ ودار ءَ اَنت کہ پہ ما یکے آپ بہ یار اِیت۔ اے اکس ایوک ءَ ھمے گونڈلانی اکس ءَ پیشدارگ ءَ نہ اِنت ، بلکیں سرجمیں بلوچستان ءِ اکس ءَ پیشدارگ ءَ اِنت۔ بلوچ ءِ نیزگاری ءُ آسراتی نہ بوگ ءِ درستیں تکاں پدر کنگ ءَ اِنت۔
مروچی ھمے اکس گری ءِ جھد ءِ برورد اِنت کہ چاگرد ءِ اڑ ءُ جنجال دیم ءَ پیداک اَنت۔ بلوچستان ءَ پہ وت ءَ ھزاراں کارست جوڑ کتگ ، ءُ ھمے کارستانی توکا یکے ناکو کمانچر اِنت۔ اے ھمے کارست اِنت کہ ایشی ءِ تہ ءَ دم برگ نیست اَت ، شپ ءُ روچ پہ بلوچ ءُ بلوچ سرڈگار ءَ کار کنگ ءَ اَت۔
ناکو کمانچر ءِ کیمرہ ءَ چہ ھر کش اِتگیں اکس گلامی ءِ چھرگ ءَ جنت ، پمیشکا ناکو تھنا یک اکس گرے ناں بلکیں اکس کشی ءَ ھوار پولکار ءُ اھوالکاری ءِ جاہ ھم گپتگ اَت۔ ھردیں کہ بلوچستان ءِ کجام ھم میتگ یا بازار ویل ءِ آماچ بیتگ ، چہ رسانکدری مردماں پیش ناکو ساڑی بیتگ۔ ناکو کمانچر ءَ وتی کیمرہ چو توپک ءَ کارمرز کتگ۔ ناکو کمانچر ءَ بلوچستان ءِ ھر ندارگ ءَ را یک نوکیں رنگے بکشاتگ ، ءُ ناکو ءِ کیمرہ ءَ چہ ھر دراتگیں اکس ءَ پژدرے گون۔
چوشیں مارا بازیں اکسکارنی درور دست کپ اِیت کہ آیاں وتی کیمرہ چو توپک ءَ کارمرز کتگ۔ ایشی ءِ درور شریف کریموں اِنت کہ اے زرباری اپریکن ئیگ اِنت۔ اے چہ وتی اکساں یک نوکیں آشوبے جزینت۔ راگھودای یک ھندوستانی اکس کشے بیت کہ آ ھندوستان ءِ بھر ءُ بانگ ءِ بگیر ءَ اکس کش اِیت۔ چوشیں درور سک باز اِنت کہ ایشاں بازیں کار کتگ۔
ناکو کمانچر گوں وتی کیمرہ ءَ پاکستان ءَ بلوچستان ءِ دیمروئی ءِ درستیں پروپیگنڈہ بےسوب کرت اَنت۔ بلوچستان ءِ گْواچنیں دْروشم اکسانی رنگ ءَ سرجمیں بلوچ راج ءِ دیم ءَ سھرا کرت اَنت ، چوناھیا اگاں اکس گرے بہ بیت یا تامُر سازے ، آئی ءَ را گوں وتی زمین ءَ مھر کہ بیت گڑا چاگردی جیڑہ ، اڑ ءُ جنجالاں ھم اکسانی دْروشم ءَ سھرا کنت۔
چوش کہ ناکو کمانچر ءَ اکسانی توکا مدام نیزگاری ، بزگی ءُ گلامی ءِ دْروشم گندگ بیتگ۔ ھمے رنگ ءَ پہ راج ءِ دیمروئی ءُ گلامی ءِ پروش دیگ ءِ واستا ھر تبے مردم کار کرت کنت۔ ناکو کمانچر ءَ وتی کیمرہ ءِ توکا بلوچستان ءِ زیبائی ءَ بہ گر داں بلوچستان ءِ نیزگاری ءَ درست وتی کیمرہ ءِ توکا جاگاہ داتگ اِت اَنت۔
کمانچر ءَ وتی کیمرہ ءِ توکا گھگیری ، زھرشانی ءُ زورگری ءِ بگیر ءَ یک نوکیں گْوستانکے نبشتگ کت۔چوشیں جاوراں گوں اکس کشی یک سکیں گرانیں کارے اَت ، بلے ناکو ءَ گرانی ءُ ارزانی نہ چار اِت ءُ بس بلوچ چار اِت۔ دگنیا ءِ توکا ناکو ءِ دابیں مارا انچیں اکس گر ھم گندگ ءَ کئیت کہ آیاں گوں وتی کیمرہ ءَ نوکیں زرمبشت جزینتگ۔ اے درور مارگریٹ بورک وائٹ اِنت کہ اے زال ءَ امریکا ءِ توکا کیمرہ ءِ کمک ءَ یک آشوبے جزینتگ۔ ناکو کمانچر ءِ اکساں آشوب ءُ چاگردی دیمروئی ءِ گْواچن ءُ سکین سھرا بوتگ ، ءُ ناکو کمانچر ءِ اکساں زند ءِ راستی پدر کتگ اَت۔
