دْروت منی مکھیں ماتی!
من وش ءُ جوڑ آں ، امیت کن آں کہ تو اوں وش ءُ جوڑ بہ ئے۔
ماتی! اے نمدی ءَ کہ من پہ ترا نبشتہ کنگ ءَ آں ، روچ ءِ ساھت دہ ءُ نیم اِنت۔ مئے نیمگ ءَ مرچی سے روچ اِنت کہ ھور اِنت۔ کورانی آپ تچگ ءَ اَنت ، کوہ سک زیبدار اَنت ، لھتیں سنگت کوھانی سر ءَ نشتگ ءُ لھتیں سنگت گوں سیاہ چاہ ءَ دلگوش ، بلے من ءَ وتی آپ ءَ میچلیں رلّی چیر ءَ دلپلاپ وپتگ آں۔
ھمے کہ من سر ءَ پہ واب ءَ ایر کن آں داں واب نیست ءُ انگت جمبر اِنت ، ءُ تئی داتگیں شال من ءَ پہ چیرگیجگ ءَ دل نہ بیت کہ انگت تئی بوہ ءَ کنت۔ اے مہ جیڑ کہ من تئی گوم ءَ ھال نہ کن آں ، بلکیں ما گوں شومیں پاکستان ءَ سک جنگ ءَ اِیں، ھاھاھاھاھا۔ گوں جنگ ءَ انچو دزگٹ بوتگ اِیں کہ وتی ھم یات نیاتکگ اَنت۔ برے برے چہ وت ءَ اوں بے ھیال باں کہ من وت کجا آں ، مروچی تئی یات باریں پہ چونی ءَ اَتک ھاھاھاھا ، بلے توازہ کن آں تئی یات مدام کئیت۔
ماتی! من اِش کتگ کہ تو بے بلاہ بیمار ءُ مدام منی نام گِر ئِے کہ بہ گْوش کہ بہ یا ترا چاراں ، بلے ماتی بہ بکش کہ من انی سک دور آں ءُ آھگ ءِ ھچ وڑ ءُ ڈول نیست۔جاورانی نگیگی ءَ تو وت سرپد ئِے ، پہ من ھچ پریشان مبو کہ منی بچیگ کدی کئیت اِنت ، الم روچے وت ءَ سر کن آں ، بلے اے مہ جیڑ کہ کدی کئیت اِنت۔
ماتی! من ءَ زمین ءُ راج ءِ گماں سک نادْراہ کتگ ، من وتی بزگ ءُ واریں راج ءَ چار اِت نہ کن آں۔ من تئی اکس دوشی چار اِت کہ تو مُسلہ ءِ سرا نشتگ ئِے ءُ تئی دست برز ءَ دوا کنگ ءَ ئِے ، من زان آں کہ تو پہ منی سلامتی ءَ دوا کنگ ءَ ئِے۔ ماتی تو وتی دواں گوں مارا الم یات بہ کن کہ مئے وتن آجو بہ بیت۔
ماتی! ترا یات اِنت تو گْوشت ” من زان آں تو یک روچے منی سر ءَ گار کن ئے گوں سرمچارانی اکسانی چارگ ءَ”۔ ھاھاھاھا ، مرچی تئی وتی دست ءَ یک سرمچارے ءِ اکس اِنت آ تئی وتی بچ اِنت۔ اے سرمچار داں گڈی تیر ءَ پہ وتی مات ءُ گْوھارنی لج ءُ ننگ ءَ جنگ کنت۔ ءُ اے لگور ءُ مِنڈی چمیں دژمن ءَ چہ وتی ڈیھ ءَ در کنت۔
ماتی! من ءَ یات اِنت تو گْوشت کہ ” بہ وان ، وھدے کہ چہ وانگجاہ ءَ پارگ بہ ئے گڑا بہ یا وتی میتگ ءِ دراھیں چکاں سبک بہ دئے”۔
پھل کن ماتی من ونت نہ کت ، بلے من جزماں کہ من وتی آیوکیں پدریچ ءَ الم نوکیں زندے بکشاں، پرچا کہ اے جنگ من ایوک ءَ پہ وتی لوگ ءِ واستا بندات نہ کتگ ، بلکیں اے جنگ کلیں بلوچانی جنگ اِنت۔
ماتی! من اِش کت کہ تو پہ منی سور ءَ چن ءُ لانچ کنگ ئِے کہ وتی بچ ءَ سالونک کناں ، منی دل ءَ من سالونک آں۔ پرچا کہ من وتی ھمے گور ءِ پچاں گنداں من ءَ سما بیت کہ باند ءَ منی سور اِنت، ھاھاھاھا۔ منی سور ءَ یل کن کستریں برات ءَ سور بہ دئے ھمود ءَ اِنت ، منی سور بیت۔ بلے من ءَ ایوک ءَ دشتار نہ بیت کہ پلانی ءِ۔۔۔۔۔۔۔۔۔۔
ماتی! اے منی اولی نمدی اِنت ، من وت نہ زان آں کہ من چے گْوشت ءُ چے گْوشگ ءَ آں۔ پمیشکا ماتی من وتی گپ ءَ گونڈ گراں کہ سھب ءَ منی گاٹ اِنت واب و نیست ، بلے جھد کن آں کہ واب بہ کپ آں۔ من و زان آں کہ انی تئی چم ارسیگ اَنت ، بلے پہ من ءَ کدی ھم ارسیگ مبو ، پرچا کہ تو یک سرمچارے ءِ مات ئِے ءُ پہ سرمچارانی ماتاں گریوگ ایب اِنت۔
سلامت بات ئِے ماتی۔
تئی سرمچاریں بچ: شیھک بلوچ
