بلوچ راجی راهشون ءُ بلوچستان آجوئی سنگر ” بی ایل ایپ ” ءِ سرکماش ڈاکٹر اللہ نزر ءِ گوں ایس آر اے ءِ تاک مزاھمت ءَ گند ءُ نند

بلوچی رجانک: هسابجار

مزاهمت : تو یک راجی ءُ جنگی بلوچ راهشونے ءِ بستار ءَ بلوچستان ءِ هستیں سیاسی ، راجمانی ءُ جنگی جاوراں چتور چار ئے ؟

ڈاکٹر اللہ نزر بلوچ: آشوب دُژمیں واکاں مدام جھانی لُٹ پُل کنوکیں واکانی کمک ءُ پلہ مرزی گوں بیت۔ من یک آجوئی لوٹوکیں سپاهیگے ، بلوچستان ءِ گچینی سیاسی ءُ راجمانی جاوراں گوں وتی جند ءِ راجمانی پدریں دْروشمے ءَ یک بلاهیں بدلی یے ناں تھنا من بلکیں بلوچستان ءِ آجوئی ءِ سر ءَ بیچار کنوکیں باسمائیں مردم ءُ جھانی واک گند اَنت ، چوش کہ چین ءِ وڑیں ڈیھ ءُ همّارهیں واکے گوں وتی لُٹ ءُ پُلیں شوربندیاں پدکنزگ ءَ لاچار بیگ اِنت۔ تو گندگ ءَ ئے کہ ماں بلوچستان ءَ دگہ بازیں باز راجی زردار بلوچ ءِ ڈگار ءَ پہ زر جنگ ءَ دل جنگ ءَ اِنت۔ هو اے راستے کہ زورگر ءُ آشوبی واک همسنگ نہ اَنت۔
بلے بلوچ راج ءِ بازیں دیمونیاں ناں ایوک ءَ پاکستان ءَ بلوچ ءِ آجوئی ءِ راجی جنز منّ اِتگ ، بلکیں ( وسّاسچیں پیسریگیں سرکماش کاکڑ ءَ میان اسمتانی رسانکدر ءِ دیم ءَ ) منّ اِتگ کہ بلوچ وتی آجوئی ءِ جنگ ءَ انت۔ دودمانی مڈی ناں ایوک ءَ رکینتگ ، بلکیں بلوچ راجمان ءِ تہ ءَ آشوبی واکانی سوب ءَ یک ٹوهیں آشوبی لبزانکے ساچگ بیتگ۔ دومی نیمگ ءَ زالبول آجوئی ءِ جنز ءِ تہ ءَ یک مزنیں کردے پیلو کنگ ءَ اَنت کہ پہ یک آشوبی جنزے ءَ سکیں بلاهیں سوبمندی یے۔
آشوب دژمنیں واک پوجی کاروائی ءُ اُرش ءُ کشنده ٹولی ءِ جوڑ کنگ ءُ جمھوریت ءِ نام ءَ بلوچ ءِ آجوئی ءِ جنگ ءِ دیم ءَ چو سلاهے ءَ کارمرز کنگ ءَ بے سوب بیتگ۔ هشت پروری ءِ وسّاچیں گچین کاریاں بلوچ ءِ بھر نہ زیرگ یک پدّریں درورے۔

مزاهمت: تو هندی جاورالاں گیشتر اسرائیل ءُ هماس ءِ جنگ ءُ جھانی جاورالانی درگت ءَ چے گْوش ئے ؟

ڈاکٹر الله نزر بلوچ: مارا یک راجے ءِ بستار ءَ هندی ءُ میان اُستمانی چونیں هم جیڑهے ءِ شر ءُ هراب هردُکیں سان الم گر اَنت گوں۔ نی جهان ءِ آ یک کُتبی پشت نہ کپتگ۔ چین ءُ روس ءِ همسنتی ءُ هندوستان ءُ امریکا ءِ ” انڈو پیسفیک ” ءِ هواری ءَ چاراں هماس ، اسرائیل ءِ جنگ نوکیں گپ نہ اَنت۔

مزاهمت: چو و بلوچ ءِ جنگ سکیں دیریگیں جنگے ، پُشت ءِ بیست ، بیست ءُ پنچیں سالانی جنگ ءِ مئے هردکانی یکیں دژمن بزاں پنجاپی لُٹ پُل کنوکانی مزنیں کچے ءَ پوجی ، مالی ءُ جانی تاوانے بیتگ ، بلے اے کُل شے آں ابید تئی دل ءَ آ کجام سبب اَنت کہ بلوچستان ءِ آجوئی ءِ دیم ءَ اڑاند انت ؟

ڈاکٹر الله نزر: لیکھی بنیاد ءَ بلوچ ءِ جنگی جنز گوں زورگری ءَ بندات بیت۔ تو پُشت ءِ بیست ءُ پنچیں سالانی سیاسی چیرجنگی ءِ کہ گپ ءَ کن ئے اے گوں وتی دْروشم ءَ چہ آهاں چٹ جتا اِنت ءُ پمیشکا مئے دژمن ءَ پوجی ، مالیءُ جانی تاوان وارتگ اشی ءِ پجی ءَ نپسیاتی هساب ءَ هم پروش ئےِ وارتگ۔ تئی جست ءِ دومی بھر کہ آجوئی ءِ دیم ءَ اڑاند ءُ سبب ءِ بابت ءَ من گْوشاں بلکیں دنیا هم ، کہ یک تھاریں ریاستے ( ڈیپ سٹیٹ ) ءُ ناشرکاری ءِ بُنزه بیگ ءِ پجی ءَ یک ایٹمی سِلاهانی ملکے۔ من گْوشاں میان اُستمانی واک اشی ءِ باڑائیاں پہ وتی گرزانی هاتر ءَ ارزان ءَ بھا گپت کن اَنت۔ پمیشکا آهاں اے ماں آکسیجن ٹینٹے ءَ کتگ اش هما جھان کہ وت ءَ دودانی واهند گُوش اِیت اے آهانی دوتل ءُ دوپوستی ءَ پدر کنت۔ اگاں بہ چارئے پیسریگیں سیویت یونین چہ پاکستان ءَ مستریں ایٹمی واکدارے اَت ، گوں اے دگہ سبباں هوار آ گیشتر بے زرّی ءَ پروشت ءُ بورینت۔
منی دل ءَ اے وسّاچیں ریاست پاکستان وتی همسنتی ئےِ کہ بیست ءُ پنچ سال داشت نہ کت۔ هستیں وسّاچیں ریاست پاکستان ءَ وتی اُمبر جتگ نی دیر نہ کنت-

مزاهمت: زرباری ایشیا ءِ اے بهرگ ءِ تہ ءَ گلام جوڑ کتگیں دو دپتری راج بلوچ ءُ سندیانی آجوئی ءِ هاتر ءَ ھندی ءُ جھانی جاورال چینچک هک ءَ اِنت ؟ یا اے جاورهال وتی هک ءَ چتور بدلینگ بہ اَنت۔

ڈاکٹر الله نزر: من همے سرپد باں کہ زرباری ایشیا ءِ تہ ءَ درستاں توان تر ءُ واکداریں آجوئی جنز بلوچ ءُ سندیانیگ اِنت ءُ پٹان هم سُر ءُ پُرے کنگ ءَ انت۔ من ساری ءَ گْوشتگ ات کہ جھانی واک ءُ هندی واک چہ مئے آجوئی ءِ جنگ ءَ تچک ءَ یا دست ماں دستی ءَ پائده چست کنگ ءَ انت ءُ اے سرپد انت هم کہ آجوئیں ءُ وتواکیں بلوچستان ءُ سندهودیش آهانی هک ءَ انت بلے وتی ریاستی گرزانی هاتر ءَ اے تھلیں راستی ءَ ایربرگ ءَ دل جنگ ءَ اَنت۔ تو گندگ ءَ ئے کہ اے بدماشیں ریاست ءِ کرداں آئی ءِ همساهگ ناں ایوک ءَ مھکم نہ اِنت بلکیں امریکا ءِ یازده ستمبر 11 / 9 ءِ وئیل بہ بیت یا ممبئی ءِ اُرش یا برتانیا ءَ لندن ءِ اُرش بہ بیت یا انیگیں اوگانستان ءَ کندهار ءِ وئیل یا ایران ءَ کرمان ءِ یا روس ءِ مئیپل ءِ سر ءَ اُرش ءِ وئیل بہ بیت اے درستانی رگ ءُ ریشگانی رُدوم چہ پاکستان ءَ بیگ ءَ انت ءُ اے جھانی ایمنی ءُ سلامتی ءِ هاتر ءَ اے دمان ءَ یک مزنیں هترے۔ من گْوشاں هندی واک اے گپ ءَ سرپد اَنت راجی ، زمینی ءُ دودمانی ریاست بزاں آجوئیں بلوچستان ، سندهودیش ءُ پشتونستان جھانی ایمنی ءِ مانزمان اِنت۔

مزاهمت: بلوچ آجوئی لوٹوکیں جنگی گلانی هم سنتیں گل ” براس ” ءِ هواری ءَ سندی آجوئی لوٹوکیں گل ” ایس آر اے ” هم هوار اِنت – اے هم سنتی ءَ بلوچستان ءُ سند ءِ آجوئی ءِ جنگ چینچک دیمتر ءَ جنز اِتگ ؟ یا دیمتر ءَ چونیں شوربندیانی پد ءَ هردُکیں بزگیں راجانی آجوئی ءِ هاتر ءَ مزنیں ءُ مھکمیں آسرے در کت کن اَنت۔

ڈاکٹر الله نزر: آجوئی ءِ جنز شُولکشّ بنت براس ءُ ایس اے آر ءَ سک باز مزنیں کار کتگ چوش کہ منی زانگ انت بلوچ ءُ سندی وتی آجوئی ءِ جنگ ءِ درچ ءَ همینچک برجاه بدار اَنت کہ اے درچ ءِ تہ ءَ هچ وڑیں نزوری مہ بیت ءُ گوں همے درچ ءِ برجمی ءَ ما وتی مھکم ءُ مدامی ئیں آسر ءَ سر بیت کن اِیں ، پرچا کہ اے بے زمہ دار ءُ وسّاچیں ریاست ءَ پوجی تاوان دیگ ءِ پجی ءَ مالی تاوان اشی ءِ بوجیگ ءَ ڈُبینت کنت ءُ دنیا هم اشی ءَ دیراں دارگ نہ لوٹ اِیت۔
اشی ءِ هواری ءَ من گوں نوکیں سندی بزاں اردو ءَ هبر کنوکیں ورناهاں هم وتی پیگام ءَ سر کنگ لوٹاں کہ شمئے مرگ ءُ زند گوں سند ءَ بندوک اِنت ءُ ابید ء سند ءَ شما وتی موکا پرستانی دست ءَ لُٹ ءُ پل ءِ آماچ بیان ب ئے ءُ اے آبادیں مھلوک شمارا سهب ءُ بیگاه کینگ داری ءِ درس ءَ دے انت چہ اے گزا ءَ وت ءَ چوٹین ات سندی بہ بئیت ءُ سندهودیش ءِ آجوئی ءِ جھد ءَ هوار بہ ات۔

مزاهمت: تئی اے گند ءُ نند ایس آر اے ءِ جھگیریں تاکبند ” مزاهمت ءَ سائیں جی ایم سید ءِ سالگشت ءِ درگت ءَ شنگ کنگ بیگ ءَ اِنت۔ اے بابت ءَ تو سائیں جی ایم سید ءِ جندے ءُ آئی ءِ جھد ءِ سر ءَ چے گْوشگ لوٹ ئے ؟

ڈاکٹر الله نزر: من اے تاکبند مزاهمت ءِ نیمگ ءَ سندی دانشور ءُ ورناهاں سائیں جی ایم سید ءِ جند ءِ بابت ءَ پُرمھریں کلوہ ءَ سر کنگ لوٹاں کہ آ سندی زبان ءُ دودمان ءُ آجوئی ءِ جنگ ءَ برجم بدار انت ءُ سائیں جی ایم سید ءِ گشتن ، اِلمی لوٹ ءُ اَمل کنگ ءِ جھد ءَ وتی زند ءِ بھرے جوڑ بہ کن اَنت آئی ءِ المی لوٹ ءُ اَملی جھد پہ کلیں بزگیں راجاں راه ءِ چراگ اِنت۔

مزاهمت: تو ایس آر اے ءِ اے جھگیریں تاکبند ” مزاهمت ” ءِ ڈس ءَ سندی راج ءُ گیشتر سندی ورناهاں چے کلوہ سر کنگ لوٹ ئے ؟

ڈاکٹر الله نزر: پہ سندی ورناهاں منی کلوہ ایش اِنت کہ آ وتی راج ءِ جاگیردار کہ مدام سند ءِ آجوئی ءِ دیم ءَ اڑاند اَنت ، بلکیں پنجاپ ءَ واکمند کنگ ءَ انت آهانی بایت ءَ وتی راج ءَ سرپد بہ کن انت۔ بلکیں” مشینری” ءِ داب ءَ سند ءِ هر لوگ ءَ وتی آجوئی ءِ کلوہ ءَ سر بہ کن انت ، چد ءُ گیشتر مھکم ءُ هم سنت بہ بنت ، پرچا کہ بزگیں ءُ زیردستانی بھر ءُ بانگی زورگر ءِ سوبمندی اِنت ایشی ءَ هوار من نوکیں سندی بزاں اردو ءَ هبر کنوکیں ورناهاں هم همے کلوہ ءَ سر کنگ لوٹاں شمئے مرگ ءُ زند گوں سند ءَ بندوک انت ءُ بید ء سند ءَ شما دست ء وتی موکاپرستاں لُٹ ءُ پلانی آماچ بہ ات ءُ اے واجہ کار شمارا سھب ءُ بیگاه کینگ داری ءِ درس ءَ دے انت چہ ایشاں وت ءَ چوٹین ات ءُ سندی بہ بہ ات ءُ پہ سندهودیش ءِ آجوئی ءَ بھر بہ زیر ات۔